प्रेरितो कै काम 25 - सिरमौरी नौवाँ नियम

फेस्तुस राज्यपाल कै सामणै

¹ ती दूसौ कै बाद फेस्तुस राज्यपाल बोणेयो यहूदिया प्रदेश दा ओऊवा, तोबै सै कैसरिया शहर शै यरूशलेम शहर खै हौटा।

² औरौ मुख्य यहूदी पुरोहित औरौ यहूदी नेताए, तैसकै सामणै पौलुस पांदी दोष लाए;

³ औरौ तिनुऐ फेस्तुस राज्यपाल शै बिन्ती कौरे कै सै तिनका साथ दैंव कै सै पौलुस कै यरूशलेम शहर दा बौईदो, जिथुखै सै तैसी बाटौ पुंडा ही मारणौ कै ताको दै लागै रौवै थिए।

⁴ फेस्तुस राज्यपाले जोवाब दिया, “पौलुस कैसरिया शहर दा कोयदी औसौ, औरौ हांव आपी तावल़ा तिथै जांदा।”

⁵ तोबै बुलू, “तुऔं मुंजीदै जू औधिकार राखौ, सै साथी हांडो, औरौ जै पौलुसे किछै गौलत काम कौरे राए, तौ तैसी पांदी दोष लाव।”

⁶ फेस्तुस यरूशलेम शहर दा रोए गौआ। सै आठ-दस दूस रौयौ कैसरिया शहर खै हौटा: औरौ दूजै दूसै न्याय आसन पांदी बौठेयो पौलुस खै लाणौ कै आज्ञा दै।

⁷ जोबै सै ओऊवा, तौ जू यहूदी नेता यरूशलेम शहर शै आए रौवै थिए, तिनुऐ आंडे-पांडे खौड़ै हौयौ तैसी पांदी भौरिशै गम्भीर दोष लोऊवे, जिथका सबूत सै दैय नी सौकौ थिए।

⁸ पौरौ पौलुसे जोवाब दिया, “मोऐं ना तौ यहूदी लोगौ कै कानून कै औरौ ना मन्दिरो कै औरौ ना महाराजा (कैसर) कै खिलाफ किछै पाप कौरे रैई।”

⁹ राज्यपाल फेस्तुसे यहूदी नेताओं कै खुश कौरणौ कै इछा शै पौलुस कैईंदु पूछु, “का तू चांए औसौ कै यरूशलेम शहर खै जांए; औरौ तिथै मैरै सामणै तैरा ऐजा मुकदमा तय कौरा जांव?”

पौलुस की महाराजा (कैसर) की दोहाऐ दैणी

¹⁰ पौलुसे बुलू, “हांव महाराजा (कैसर) कै न्याय आसन कै सामणै खौड़ा औसौ, औरौ ऐजाई सैजा ठाँव औसौ जिथै मैरा न्यांव हौणा चैंई, जैशै तू आछै तरह सै जाणै, यहूदी लोगौ का मोऐं किछै बै पाप नी कौरे रैई।

¹¹ जै हांव दोषी औसौ, औरौ मारै जाणौ कै लायक कुणजाई काम कौरे राए, तौ मोरणो शै ना भाजु; पौरौ जिनु बातौ का ऐजै मुं पांदी दोष लांव, जै तिनुमुंजी दै कुणजै बात साची नी निकल़ी, तौ कोसी खै ऐजा औधिकार ना आथी कै सै मुखै इनकै हाथौ दा दैय दैंव, मैरै बिन्ती औसौ कै मैरा न्यांव खुद महाराजा कै दवारा हौणा चैंई।”

¹² तोबै राज्यपाल फेस्तुसे मंत्रियो कै सभा कै साथै विचार कौरेयौ जोवाब दिया, “कै तुऐं महाराजा कै दवारा न्यांव कौरे जाणौ कै मांग कौरे राखी तौ तू महाराजा कै ही धोरे जांदा।”

अग्रिप्पा राजा कै सामणै पौलुस

¹³ किछै दूस बीतणौ कै बाद अग्रिप्पा राजा औरौ तैसकै नानड़ै बोइण बिरनीके कैसरिया शहर दै आयौ खै राज्यपाल फेस्तुस आरी भैटी।

¹⁴ तिनकै तिथै बौहितै दूस रौणौ कै बाद फेस्तुसे पौलुस कै बारै मुंजी राजा खै बौतौऊ, “ऐक आदमी औसौ, जैसी फेलिक्से कोयदै छोड़े राए।

¹⁵ जोबै हांव यरूशलेम शहर दा थिया, तौ मुख्य यहूदी पुरोहित औरौ यहूदियों कै बुड़ेईके तैसी पांदी दोष लोऊवे, औरौ चोऊ कै तैसी पांदी दण्‍ड कै आज्ञा दैय जांव।

¹⁶ पौरौ मोऐं तिनुखै जोवाब दिया, कै रोम शहर कै रौणौवाल़ै लोगौ कै ऐशणै भोवार नी आथी, कै कोसी आदमी खै दण्‍ड कारिए सौंपै दैंव, जांव तौड़ी आरोपी खै आपणै दोष लाणोवाल़ै कै सामणै खौड़ै हौयौ दोष का जोवाब दैणौ का मौका ना भैटौ।

¹⁷ इथकारिए जोबै यहूदी नेता मुं साथी इथै कैसरिया शहर दै ओऊवे तौ मोऐं किछै देर नी कौरी, पौरौ दूजै दूसै ही न्याय आसन पांदी बोठेयो, मोऐं आदैश दिया कै पौलुस खै अदालत दा लाव।

¹⁸ जोबै तैसकै आरोपी खौड़ै होवे, तौ तिनुऐ ऐशणी बुरी बातौ का दोष नी लैई, जैशणा हांव सौमझु थिया।

¹⁹ पौरौ तिनुमुंजी सिरफ आपणै धरम खै लोयो औरौ यीशु नांव का ऐक आदमी कै बारै मुंजी किछै मनमुटाव थिया, जैसकै मौत हौए रोए; पौरौ पौलुस दावा कौरौ की सै जियुंदी औसौ।

²⁰ जिथुकै मुखै पोता नी थी की इनु बातौ की जांच-पड़ताल कैशै कौरु, इथकारिए मोऐं पौलुस कैईंदु पूछु, ‘का तू यरूशलेम शहर जांदा, कै तिथै इनु बातौ का मुकदमा हौंव?’

²¹ पौरौ जोबै पौलुसे बौल़ौ मैरै बिन्ती औसौ कै मैरा न्याय का फोयसला खुद महाराजा कै दवारा कौरा जाणा चैंई। औरौ महाराजा कै इथै हौंव, तौ मोऐं आज्ञा दी, कै जौल़ौ तौड़ी तैसी महाराजा कै धोरे ना छाड़ै दी, तोलो तौड़ी तैसकै रोखवाल़ी कौरेया।”

²² तोबै अग्रिप्पाए राज्यपाल फेस्तुस खै बौल़ौ, “हांव बै तैसी आदमी कै शुणणी चोऊं।” तैणै बौल़ौ, “तू दोतियो शौणै पांदा।”

²³ औरौ दूजै दूसै, जोबै अग्रिप्पा औरौ बिरनीके बौड़ै धुमधाम शै आयौ, सैनिक गुट कै ठोगड़े औरौ नोगर कै सियाणै लोगौ खै साथै दवारो दै पौऊंचै। तोबै राज्यपाल फेस्तुसे आज्ञा दै, कै सै पौलुसो खै लियांव।

²⁴ राज्यपाल फेस्तुसे बौल़ौ, “ओए रै राजा अग्रिप्पा, औरौ ओए रै सौबै लोग जू इथैशै अमारै साथै औसौ तुऐं ऐसी आदमी कै दैखौ, जैसकै बारै मुंजी सौबै यहूदी लोगै यरूशलेम शहर दै औरौ इथै बै लैलियाय-लैलियायो मुं कैईंदै बिन्ती कौरे, कै ऐसको जियुंदी रौणौ ठीक नी आथी।

²⁵ पौरौ मोऐं जाणै पोऊँ कै तैणै ऐशणौ किछै नी कौरे रैई कै मारा जांव; औरौ जोबै कै तैणै आपी ही बिन्ती कौरे कै मैरा न्यांव का फोयसला खुद महाराजा कै दवारा हौणा चैंई। तौ मोऐं तैसी रोम शहर भैजणौ का फोयसला कौरा।

²⁶ पौरौ मोऐं तैसकै बारै मुंजी कुणजी बात ना पैई कै महाराजा खै लिखु, इथकारिए मोऐं तैसी तुंआरै सामणै औरौ खास कौरेयौ ओए रै राजा अग्रिप्पा तैरै सामणै लियाए राए, कै जांचणौ कै बाद मुखै किछै लिखणौ खै भेटलो।

²⁷ जिथुकै कोयदी खै भैजणा औरौ जू दोष तैसी पांदी लाए राए तिनुकै ना बौताणौ, मुखै आछौ नी लागी।”