प्रेरितो कै काम 24 - सिरमौरी नौवाँ नियमफेलिक्स कै सामणै पौलुस 1 पाँची दूसौ कै बाद हनन्याह महायहूदी पुरोहित कैई बुड़ेईको औरौ तिरतुल्लुस नांव कै कोसी वकील खै साथै नियौ कैसरिया नगर दै पौऊंचै, तिनुऐ राज्यपाल कै सामणै पौलुस पांदी दोष लाए। 2 जोबै पौलुसो खै बौईदा तौ तिरतुल्लुस तैसी पांदी दोष लायौ खै बौलदा लागा, “ओए रै महाप्रतापी फेलिक्स, तैरै दवारा आमु जू बौड़ा भला हौंव; औरौ तैरै इतंजाम शै इयौं जाति कारिए कैतरी बुराए सुधरदी लागै। 3 इथुकै आमु हर जौगैह औरौ हर तरह शै धन्यवाद कै साथै मानु। 4 पौरौ इथकारिए कै हांव तोंवारा जादा सौमय ना लोणा चोऊं, हांव तांव कैईंदै बिन्ती कौरु, कै कृपा कौरेयौ खै अमारी दो ऐक बातौ शौणै पा। 5 जिथुकै आमुए ऐसी आदमी खै झगड़ालु औरौ दुनिया कै सारै यहूदी लोगौ मुंजी बलवा कौरणौवाल़ा औरौ ऐजा नासरी पन्थ का मुखिया बै औसौ। 6 ऐणै मन्दिरो खै अशुध्द कौरणा चोऊवा, औरौ तोबै आमुए तैसी कोयदै बाणै दिया। (आमुए तैसी आपणै कानून कै हिसाब शै सौजा दैय राखदै; 7 पौरौ सैनिक गुट कै ठोगड़े लुसियासे ऐसकै धोरे आयौ ऐसी जोरै अमारै हाथौ पौरैशा झेड़ैयौ निया, 8 औरौ ऐसी पांदी दोष लाणोवाल़ै खै तैरै सामणै आणौ खै आज्ञा दी) इनु सौबी बातौ खै जिथकै बारै मुंजी आमै ऐसी पांदी दोष लोऊँ, तू आपी ही ऐसीखै पोरखियो सौचाई जाणै पान्दा।” 9 यहूदी लोगै बै तैसका साथ दैयौ बुलू, ऐजी बातौ साची औसौ। फेलिक्स कै सामणै पौलुस का जवाब दैणा 10 जोबै राज्यपाले पौलुसो खै बौलणौ कारिए इशारा कौरा, तौ तैणै जवाब दिया: मोऐं ऐजौ जाणैयौ कै तुऐं बौहितै सालो शै ऐसी देश का न्याय कौरे लौआ, औरौ इथकारिए खुशी सै आपणा जवाब दियु। 11 तू आपी जाणै सौकै, कै जौल़ौ दा उंडा हांव यरूशलेम शहर दा आराधना कौरणौ खै मन्दिर दा ओऊवा, मुखै बारौ दूसौ दै ऊबै ना होई। 12 तिनुऐ मुखै ना मन्दिर दा, ना यहूदी सभा-घोरो दा, ना नगर दा कोसी आरी झोगड़िंदै या भीड़ कौठै कौरदै दैखा। 13 औरौ ना तौ सै तिनु बातौ खै, जिनकै बारै मुंजी सै ऐबै मुं पांदी दोष लांव, तैरै सामणै तिनु सौचाई का सबूत दैय सौकौ। 14 पौरौ हांव तैरै सामणै मानै पोऊँ, कै हांव मसीह कै बाटो का चैला हौयौ आपणै पुराणिया कै पौरमेशवर कै सेवा कौरु, जैसी बाटो कै यहूदी अगुवे झूठी बौल़ौ, औरौ जू बातौ मूसा कै कानून औरौ पौरमेशवर कै बातौ बौताणौवाल़ै कै किताबो दी लैखै रैई, तिनु सौबी पांदी बिशवाश कौरु। 15 औरौ पौरमेशवर शै आशा राखु जू सैजै आपी बै राखौए, कै धरमी औरौ अधरमी दुईनै कै पौरमेशवर मौरेयौंदे मुंजीदा जियुंदी कौरदा। 16 इथकारिए हांव आपी बै कौचिश कौरु, कै पौरमेशवर की औरौ आदमी कै ढौबौशा मैरा विवेक सौदा निर्दोष रौंव। 17 बौहितै सालो खै बाद हांव आपणै गरीब लोगौ कारिए तौफा पोऊंचाणौ औरौ पौरमेशवर खै बलिदान चौढ़ाणौ कारिए यरूशलेम शहर दा आए रौआ थिया। 18 तैसी सौमय तिनुऐ मन्दिर दा मुखै शुद्ध हौणौ कै भोवारो खै पूरा कौरदै बैई दैखा। तिथै ना कुणजै भीड़ थी औरौ ना ही कियौंई भान्त का रोल़ा थिया। तिथै आसिया प्रदेश कै किछै यहूदी लोग थिए जिनुवै रोल़ा पाड़ा। 19 जै मोऐं किछै गौलत कौरे राए थियु, तौ तिनु मुं पांदी आरोप लाणौ कारिए इथै तैरै सामणै हौणौ चैंई थियु। 20 या ऐजौ आपी ही बौतांव, कै जोबै हांव महासभा कै सामणै खौड़ा थिया, तौ तिनुऐ मुं दा कुणजा दोष पोऊवा? 21 सिरफ ऐक दोष जू सै मैरै खिलाफ लाए सौकौ, सै ऐजा औसौ जोबै मोऐं आँगणो दो जोर-जोर शै बौल़ौ थियु? ऐलो मैरा न्यांव तैरै दवारा हौंदा लागै रौआ जिथुकै हांव बिशवाश कौरु कै पौरमेशवर तिनु लोगौ खै जू मौरे गौवै होटेयो मौरेयौंदे मुंजीदा जियुंदी कौरदा। 22 राज्यपाल फेलिक्स जू ऐसी दल कि बातौ कै ठीक-ठीक जाणौ थिया, तिनु ऐजौ बौलेयौ मुकदमे की सुनवाई टाल़ै दी, “कि जोबै पलटन का ठोगड़ा लुसियास आला, तौ सै तुंआरी मुकदमे का फोयसला कौरदा।” 23 औरौ सूबेदार खै आज्ञा दै, कै पौलुस खै रोखवाल़ी दा राखौ, पौरौ तैसीकै ऐतरै आज़ादी जौरुर दैया कै तैसकै खास दोस्त आयौ तैसकै सेवा कौरे सौकौ। पौलुस कै राज्यपाल फेलिक्स औरौ तैसकै घोरवाल़ी शै बातचीत 24 किछै दूसौ कै बाद फेलिक्स राज्यपाल आपणै घोरवाल़ी द्रुसिल्ला खै, जू यहूदिनी थी, साथै नियौ कैसरिया नगर दा ओऊवा औरौ पौलुस खै बौएदैयौ तैसी बिशवाश कै बारै मुंजी जू मसीह यीशु पांदी औसौ, तैसीयांदो शुणु। 25 जोबै पौलुसे जू पौरमेशवर कै सामणै साचा औसौ औरौ आपणी इछावं पांदी काबू राखौ औरौ पौरमेशवर दवारा आणौवाल़ै न्याय कै बारै मुंजी बौताणौ शुरु कियु, तौ फेलिक्से डौरेयौ जोवाब दिया, “इबी तौ तू जा; जोबै मुंकैई सौमय हौला, हांव आपी ताखै बोईददा।” 26 राज्यपाल फेलिक्स तिनु बातौ कै बारै मुंजी डौरौ थिया जू पौलुसे बौल़ै रैई थी, तोबै बै सै कोबी कोबार तैसी बौईदो थिया औरौ तैसकै साथै बातौ कौरौ थिया जिथुकै तैसी आशा थी कै पौलुस कोयदखाने शै छुटणौ कारिए तैसी किछै रुपीये दैंदा। 27 पौरौ जोबै दो साल बीतै गोई, तौ फेलिक्स कै जौगैह पुरकियुस फेस्तुस राज्यपाल बौणै गौआ। औरौ फेलिक्स यहूदी लोगौ खै खुश कौरणौ की इछा शै पौलुस खै कोयदी दा ही राखा। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation