प्रेरितो कै काम 23 - सिरमौरी नौवाँ नियम

¹ पौलुसे महासभा कै ढौबौ टकटकी लायौ खै दैखौ, औरौ बौल़ौ, “ओए रै भाईयों, मोऐं ऐलो तौड़ी पौरमेशवर कारिए बिल्कुल साची विवेक शै जिन्दगी बिताए राए।”

² पौलुसे जू बौल़ौ ऐजौ शोणेयो कै हनन्‍याह महायहूदी पुरोहिते, तिनुखै जू तैसकै धोरे खौड़ै थिए, तैसकै मुँओं पांदी चढताल़ा लाणौ कै आज्ञा दै।

³ जोबै कोसीए पौलुसो कै चढताल़ा लाया, तिथकै बाद, पौलुसे तैसी बौल़ौ, “ओए रै पाखंडी, पौरमेशवर ताखै मारदाए। तू मूसा कै कानून कै हिसाब शै मैरा न्याय कौरणौ कारिए बौठै रौआ, औरौ तोबै का मूसा कै कानून कै खिलाफ मुखै मारणौ की आज्ञा दैय?”

⁴ जू नेड़िक खौड़ै थिए, तिनुऐ बौल़ौ, “का तू पौरमेशवर कै महायहूदी पुरोहित कै नेंदैया कौरे?”

⁵ पौलुसे बौल़ौ, “ओए रै भाईयों, हांव ना जाणु थिया, कै ऐजा महायहूदी पुरोहित औसौ, जिथुकै पवित्र शास्त्र दो लैख राए, आपणै लोगौ कै प्रधान कै बुरु नी बौल।”

⁶ तोबै पौलुसे ऐजौ जाणैयौ, कै किछै सदूकी लोग औरौ किछै फरीसी लोग औसौ, महासभा मुंजी जोर शै बौल़ौ, “ओए रै भाईयों हांव फरीसी औरौ फरीसियों कै सन्तान का औसौ, मैरा मुकदमा इथकारिए हौंदा लागै रौआ जिथुकै मुखै आशा औसौ कै पौरमेशवर मौरेयौंदे लोगौ खै मौरेयौंदे मुंजीदा जियुंदी कौरदा।

⁷ जोबै तैणै ऐजै बात बौल़ै तोबै फरीसी औरौ सदूकी लोगौ मुंजी झोगड़ा हौंदा लागा, औरौ सभा घोरो दै फूट पौड़ै गौए।

⁸ जिथुकै सदूकी लोगौ का ऐजा बिशवाश औसौ, कै लोग मौरणौ कै बाद मौरेयौंदे मुंजीदै जियुंदी ना हौंदै, ना स्‍वर्गदूत औरौ ना आत्मा आथी, पौरौ फरीसी लोग इनु सौबी बातौ दा बिशवाश कौरौ।

⁹ तोबै बौड़ा रोल़ा पौड़ा औरौ किछै यहूदी शास्त्री जू मूसा कै कानून शिखाणौ वाल़ै थिए, खौड़ै हौयौ औरौ ऐजौ बौलेयौ बैहस कौरदै लागै, आमुए ऐसी आदमी दी किछै बै बुराए ना पैई औरौ हौए सौकौ कै ऐक आत्मा या स्‍वर्गदूतै ऐसीआरी बात कौरे राए”

¹⁰ जोबै तिथै बैजाए बैहस हौंदै लागै, तौ सैनिक गुट कै सरदारे ऐसी डौरौ शै कै सै पौलुसो कै टुकड़ै-टुकड़ै नी कौरे दैंव सैनिक गुट कै आज्ञा दै की ओतरेयो पौलुस खै सभा कै सदस्यों कै बीचो मुंजीदा जोरै घाड़ो, औरौ गढ़ दा लोय जाव।

¹¹ तैसी रातै प्रभु यीशुए पौलुस कै धोरे खौड़ै हौयौ बौल़ौ, “ओए रै पौलुस सब्र राख; जिथुकै जैशणै तुऐं यरूशलेम शहर दै मैरै गवाही दै, तैशैखैई ताखै रोम देश दै बै गवाही दैणी पौड़दै।”

पौलुस कै मारणौ का षडयंत्र

¹² जोबै झीश हौए, तौ किछै यहूदी लोगै तरकीब बाणै, औरौ तिनुऐ ऐजै शौं खाए कै जांव तौड़ी आमु पौलुस खै मारै नी दियु, तांव तौड़ी आमु ना किछै खोऊं औरौ ना किछै पियुं।

¹³ जिनुवै ऐजै शौं खाए राए थी, सै चाल़ीश दै बै जादा आदमी थिए।

¹⁴ तिनुऐ मुख्य यहूदी पुरोहित औरौ बुड़ेईको कै नेड़िक आयौ बौल़ौ, “आमुए ऐजै शौं खाए राए कै जांव तौड़ी आमु पौलुस खै मारै नी दियु, तांव तौड़ी जै किछै बै खोऊं, तौ आमु पांदी लानत औसौ।”

¹⁵ इथकारिए ऐबै महासभा समैंत सैनिक गुट कै ठोगड़े खै ऐशै सोमझाव, कै जोबै सै पौलुस खै तोंवारै धोरे लेयालै, तोबै ऐशणा दिखावा कौरेया कै तुऐं तैसकै मुकदमे कै बारै मुंजी हौजौ बै ठीक शै जांच कौरणा चांव, औरौ आमु तैसकै पोऊंचणौ दै औगौड़ियौ ही तैसी मार दैणौ कारिए तैयार रौंदै।

¹⁶ पौरौ पौलुस कै भांजै शुणु कै यहूदी लोगै पौलुस खै मारणौ कै तरकीब बाणै लोए थी, तौ गढ़ दा जायौ पौलुस खै सौंदेश दिया।

¹⁷ पौलुसे सूबेदारो मुंजीदा ऐकी खै आपणै धोरे बौएदैयौ बौल़ौ, “इनु जोवानो खै सैनिक गुट कै ठोगड़े कै नेड़िक लोय जाव, ऐजै तैसीखै किछै बौलणौ चांव।”

¹⁸ इथकारिए सूबेदार पौलुस कै भांजै खै सैनिक गुट कै ठोगड़े कै धोरे लोय गौआ औरौ बौल़ौ, “कैदी पौलुसे मुखै बौएदैयौ बिन्ती कौरे, कै ऐजा जवान सैनिक गुट कै ठोगड़े शै किछै बौलणौ चांव; ऐसी तैसकै धोरे लोए जांव।”

¹⁹ सैनिक गुट कै ठोगड़े तैसका हाथ पाकड़ेयो, औरौ तैसी जौई नियौ पूछु, “तू मुंकैई का बौलणौ चांए?”

²⁰ तैणै बौल़ौ, “यहूदी नेताए योजना बाणै राए, कै तांव कैईंदै बिन्ती कौरौ कै दोतियो पौलुस कै महासभा दा लायौ, ऐशणा दिखावा कौरेयौ कै तुऐं तैसकै बारै मुंजी हौजौ बै ठीक शै जांच कौरणा चांव।

²¹ पौरौ दया कौरेयौ तैशै नी कौरेया जैशै सै ताखै कौरणौ कारिए बौल़ौ, जिथुखै तिनुमुंजी दै चाल़ीश दै जादा आदमी तैसकै मारणौ कै ताको दै औसौ, जिनुवै ऐजी शौं खाए रैई कै जांव तौड़ी सै पौलुसो खै मारै नी दैंव, तांव तौड़ी ना खांदै ना पींदै, औरौ ऐबै सै तैयार औसौ औरौ तैरै वचन कै ठोल़नाए कौरे लोए।”

²² तोबै सैनिक गुट कै ठोगड़े जोवानो खै ऐजै आज्ञा दैयौ आगु छाड़ै, “कोसी कैंई नी बौलेया कै तुऐं मुखै ऐजी बातौ बौताए रैई।

पौलुस कै कैसरिया खै भैजणा

²³ सैनिक गुट कै ठोगड़े तोबै दु सूबेदारो खै बौएदैयौ खै बौल़ौ, दो सौ सैनिक, सतर शवार, औरौ दो सौ भाले खै कैसरिया शहर जाणौ कारिए तैयार कोरयो राखौ, तू राती कै नौ बोजे निकल़ेया।”

²⁴ औरौ पौलुस कै शवारी कारिए घोड़ा तैयार राखौ, कै तैसी फेलिक्स राज्यपाल कै धोरे ठीक ढंग शै पोऊंचाए दैंव।

²⁵ सैनिक गुट कै ठोगड़े ऐशैखैई राज्यपाल खै ऐक चिट्टी लैखै:

²⁶ “महाप्रतापी फेलिक्स राज्यपाल खै क्‍लौदियुस लुसियास की औरौ शा नमशकार।

²⁷ ऐसी आदमी खै यहूदी लोग पाकड़ेयौ खै मारणा चांव, पौरौ जोबै मोऐं जाणौ कै सै रोम शहर का रौणौवाल़ा औसौ, तौ सैनिक गुट नियौ खै बौचायौ लियोऊवा।

²⁸ औरौ हांव जाणु थिया, कै सै तैसी पांदी कियों बौजैह शै दोष लांव, इथकारिए तैसी तिनकी महासभा दै लोए गौवै।

²⁹ तोबै मोऐं जाणै पोऊँ, कै सै आपणै यहूदी कानून कै बैहस कै बारै मुंजी तैसी पांदी दोष लांव, पौरौ मारणौ या बानणो कै लायक तैसदा कुणजाई दोष नी थी।

³⁰ औरौ जोबै मुंआगो बौतौऊं, कै सै ऐसी आदमी कै मारणौ कै ताको दै लागै रौवै तौ मोऐं तौलोंई तैसीखै तैरै धोरे छाड़ै दिया; औरौ तिनु यहूदी लोगौ कै जिनुवै तैसी पांदी आरोप लाए राए तिनुकै आदैश दिया कै तैरै सामणै तैसी पांदी दोष लांव।”

³¹ तियौंई राती सैनिके दैयौंदै आदैशो कै पूरै कौरे: सै पौलुसो खै यरूशलेम शहर शै लोए गौवै औरौ तैसी अन्तिपत्रिस शहर दा लियोऊवा।

³² दूजै दूसै तिनिए घुड़-शवारों खै पौलुस कै साथै कैसरिया शहर कै डियाल़ेयो औरौ पौयदल सिपाही आपी यरूशलेम शहर खै पाछु ओऊवे।

³³ तिनुऐ कैसरिया नोगर पोंचैयो राज्यपाल खै चिट्टी दै; औरौ पौलुसो खै बै तैसकै सामणै खौड़ा कौरा।

³⁴ राज्यपाले चिट्टी पोढ़ेयो खै पूछु, “ऐजा कोसी प्रदेश का औसौ?”

³⁵ औरौ जोबै जाणै पोऊँ कै किलिकिया प्रदेश का औसौ; तौ तैसीकै बौल़ौ, “जोबै तैरै आरोपी बै आलै, तौ हांव तैरा मुकदमा लोड़दा।” औरौ तैणै पौलुस खै राजा हेरोदेस कै किले दै, रोखवाल़ी दै राखणौ कि आज्ञा दै।