प्रेरितो कै काम 22 - सिरमौरी नौवाँ नियम

भीड़ दा पौलुस का सौंदेश

¹ “ओए रै भाईयों औरौ बापूओं, मैरा जोवाब शुणौ, जू हांव ऐबै तोंवारै सामणै बुलू।”

² सै ऐजौ शोणेयो कि पौलुस तिनुआरी इब्रानी भाषा दा बौलांव, चुपी रौवै। तोबै तैणै बुलू:

³ “हांव तौ यहूदी आदमी औसौ, मैरा जन्म किलिकिया प्रदेश कै तरसुस शहर दा हौआ, पौरौ ऐसी नोगर दा गमलीएल कै लातो कै धोरे बोठेयो शिक्षा पाए, औरौ पुराणिया मूसा कै कानून कै बै ठीक ढंग शै शिखाए राए; औरौ पौरमेशवर कारिए ऐशणै धुन लाए राए थी, जैशणी तुऐं सौबीए ऐलो लाए राए।”

⁴ मोऐं तौ मर्द औरौ बैटमाणिश दुईनै खै बांनैयौ खै, औरौ कोयदखाने दै पायौ खै, मसीह कै गुट खै इथै तौड़ी सताए कै तिनु मोरवाए बै दिए।

⁵ इयौं बातौ कारिए महायहूदी पुरोहित औरौ सौबै बुड़ेईको कै सभा गवाह औसौ, कै तिनुमुंजी दै हांव यहूदी भाईयों कारिए चिट्ठी नियौ खै दमिश्क शहर खै चालै रौआ थिया, कै जू तिथै हौं तिनु सौजा दियाणौ कारिए बांनैयौ खै यरूशलेम शहर दै नियुं।

मन बौदल़णौ कै बारै मुंजी बौताणौ

⁶ “जोबै हांव यात्रा कौरेयौ दमिश्क शहर कै नेड़िक पोऊंचा, तौ ऐशैखै हौं की दोफारो कै लमसम एकदम ऐक बोड़ो पेयाशो गौयण पौरैशौ मैरै चोऊ ढौबौ खै चौमकौ।

⁷ औरौ हांव जोमीनो पांदी धैनै रीड़ा औरौ ऐशणी धाव शौणै, ‘ओए रै शाऊल, ओए रै शाऊल, तू मुखै किथु सोतांए।’

⁸ मोऐं जोवाब दिया, ‘ओए रै प्रभु, तू कुण औसौ?’ तैणै मुखै बौल़ौ, ‘हांव नासरत गांव का यीशु औसौ, जैसीखै तू सोतांए।’

⁹ औरौ मैरै साथीए पेयाशो दैखौ, औरौ तिनुऐ ऐक आवाज़ शौणै, पौरौ जू मुं आरी बौलाए रौआ थिया, तिथु सै सौमझी ना सौकी की तियैं आवाज़ै मुखै का बौल़ौ।

¹⁰ तोबै मोऐं बुलू, ‘ओए रै प्रभु, हांव का कौरु?’ प्रभुए मुखै बुलू, ‘ऊबा बिज़यो खै दमिश्क शहर दा जा, औरौ जू किछै ताखै कौरणौ कारिए ठोहराए राए, सैजौ ताखै सौबै बौताए दैंदै।’

¹¹ जोबै तिथु झमाकैदार पेयाशो कै बौजैह शै मैरै किछै ना दैखी, तौ हांव आपणै साथियो का हाथ पाकड़ेयो दमिश्क शहर दा ओऊवा।”

¹² “तोबै हनन्‍याह नांव का कानून खै हिसाब शै ऐक भोक्‍त आदमी जू मूसा कै कानून खै मानणौ वाल़ा थिया, जू दमिश्क नगर कै रौणौवाल़ै सौबी यहूदी लोगौ मुंजीदा सुनाम थिया, मैरै धोरे ओऊवा।

¹³ औरौ खौड़ै हौयौ मुखै बौल़ौ, ‘ओए रै भाई शाऊल, औटेयौ दैखदा लाग।’ तैसी घड़ी मैरी आखी खोले गोई औरौ मोऐं तैसी दैखा।

¹⁴ तोबै तैणै बौल़ौ, ‘अमारै पुराणिया खै पौरमेशवरे ताखै इथकारिए ठोराए राए, कै तू तैसखै इछा खै जाणै, औरौ तैसी धरमी यानी मसीह खै दैखै, औरौ तैसकै आवाज़ शौणै।

¹⁵ जिथुकै तू तैसकै ढौबौशा सौबी आदमी कै सामणै तिनु बातौ का गवाह हौंदा, जू तुऐं दैखै औरौ शौणै रैई।’

¹⁶ ऐबै देर काए कौरे? बिज़, औरौ आपणै पापौ कै माफी पाणौ कारिए तैसका नांव लोयो खै बपतिस्मा लो।”

¹⁷ “जोबै मोऐं हौजौ यरूशलेम शहर दै आयौ मन्दिरो दै प्रार्थना कौरे लोए थी, तौ मोऐं ऐक दर्शन दैखा।

¹⁸ औरौ तैसीखै दैखा की सै मुखै बौल़ौ, ‘तावल़ो कौरेयौ यरूशलेम शहर पौरैशा आगु जा; जिथुकै सैजै लोग जू इथैशै औसौ मैरै बारै मुंजी तैरी गवाही ना मानदै।’

¹⁹ मोऐं बौल़ौ, ‘ओए रै प्रभु सैजै तौ आपी जाणौए, कै हांव तांव पांदी बिशवाश कौरणौवाल़ै खै कोयदखाने दै पोऊँ औरौ जौगैह-जौगैह यहूदी सभा-घोर दै पिटोऊं थिया। इथकारिए, मैरै सौमझ ना आए रैई कै यरूशलेम शहर दै यहूदी लोग मुं पांदी बिशवाश काए ना कौरदै।

²⁰ औरौ जोबै तैरै गवाह स्तिफनुस का लोऊ बोवाय जांदा लागै रौआ थिया, तोबै बै हांव तिथै खौड़ा थिया, औरौ इयौं बात दा सहमत थिया, औरौ तैसकै मारणौ वाल़ै कै खोटणो कै रोखवाल़ी कौरु थिया।’

²¹ औरौ प्रभुए मुखै बौल़ौ, आगु जा: जिथुकै हांव ताखै बैगानै यहूदी लोगौ कै धोरे दूर-दूर भैजदा।”

²² इथै तौड़ी तौ लोग पौलुस कै बात शुणदै रौवै, पौरौ तोबै जोर शै आवाज़ मारेयों लेलियोवे, “ऐसी आदमी खै मारै दैव; ऐसको जियुंदी रौणौ ठीक ना आथी!”

²³ जोबै सै लैरौ मारदै औरौ आपणै बायरै वाल़ै खोटणो फेरकांदै औरौ गुस्सा हौयौ गौयणै दै धूल उड़ांदै लागै।

²⁴ तौ सैनिक-गुट खै ठोगड़े बौल़ौ, “ऐसीखै कटगरेह दा लोय जाव; औरौ कौड़ै मारैयौ जांचो, कै हांव जाणु कै लोग कियों बौजैह लैई तैसकै खिलाफ दै ऐशैखै लैलियाए रौवै।”

²⁵ जोबै तिनुऐ तैसी तशमै लैई बाना तौ पौलुसे तैसी सूबेदारो खै जू तैसकै सामणै खौड़ा थिया, बुलू का ऐजौ ठीक औसौ, कै तुऐं ऐक रोम देश कै आदमी खै औरौ सै बै बिना दोष लायौ कौड़ै मारो?

²⁶ सूबेदारे ऐजौ शोणेयो सैनिक-गुट कै ठोगड़े कै धोरे जायौ बुलू, “तुऐं ऐजौ का कौरे लौ? ऐजा तौ रोम देश का रौणौवाल़ा आदमी औसौ।”

²⁷ तोबै सैनिक-गुट कै ठोगड़े तैसकै धोरे आयौ बुलू, “मुखै बोता, का तू रोम देश का आदमी औसौ?” तैणै बुलू, “हां।”

²⁸ ऐजौ शोणेयो सैनिक-गुट कै ठोगड़े बुलू, “मोऐं रोम देश का आदमी हौणौ का पद बौहितै रुपीये दैयौ खै पाए राए।” पौलुसे बुलू, “हांव तौ जन्म शै रोम देश का औसौ।”

²⁹ तोबै जू लोग तैसीखै जांचणौ पांदी थिए, सै तौलोंई तैसकै धोरे दै हौटै गौवै; औरौ सैनिक गुट का ठोगड़ा बै ऐजौ जाणियौ कै ऐजा रोम देश का औसौ, औरौ मोऐं तैसीकै बानै राए, औरौ सै डौरे गौआ।

महासभा कै सामणै पौलुस

³⁰ दूजै दूसै तैणै ठीक-ठीक जाणणौ की इछा शै कै यहूदी लोग तैसी पांदी किथु दोष लांव, इथकारिए तैसकै बन्धन खोले दिए, औरौ मुख्य यहूदी पुरोहितो औरौ सारै यहूदी महासभा खै कौठै हौणौ कै आज्ञा दै, औरौ पौलुस खै धैनै लायौ तिनकै सामणै खौड़ा कौरे दिया।