प्रेरितो कै काम 20 - सिरमौरी नौवाँ नियम

मकिदुनिया, यूनान औरौ त्रोआस दा पौलुस

¹ जोबै रोल़ा बोन्‍द हौए गौआ तौ पौलुसे चैलै खै बौएदैयौ हिम्मत दै, औरौ तिनकै धोरे दा आगु जायौ कै मकिदुनिया प्रदेश कै ढौबौ हौटा।

² तैसी सारै प्रदेश दा हौयौ औरौ चैलो खै बैजाए हिम्मत दैयौ कै सै यूनान प्रदेश जिथु अखाया प्रदेश बै बौल़ौ तिथै ओऊवा।

³ जोबै तीन मीनै रौयौ कै तिथैदा जहाजो पांदी सीरिया प्रदेश कै ढौबौ जांदा लागै रौआ थिया, पौरौ तैणै शुणौ कै किछै यहूदी नेता तैसी बाटो पुंडा मारणौ कै ताको दै थिए औरौ इथकारिए तैणै मकिदुनिया प्रदेश शै हौयौ सीरिया प्रदेश खै जाणौ का फोयसला कौरा।

⁴ इयौं यात्रा दै बिरीया नोगर कै पुरूर्स का बैटा सोपत्रुस औरौ थिस्‍सलुनीके शहर मुंजीदै अरिस्‍तर्खुस औरौ सिकुन्‍दूस, औरौ दिरबे नोगर का गयुस, औरौ लुस्त्रा नोगर शा तीमुथियुस, औरौ एशिया प्रदेश का तुखिकुस औरौ त्रुफिमुस आसिया तौड़ी अमारै साथी यात्री थिए।

⁵ ऐजै साथी यात्री आमु दै औगौड़ियौ जायौ कै त्रोआस शहर दै पोंचैयो आमु सै ठोल़दै लागै।

⁶ पौरौ आमु दुए बाटी बाट हौयौ फिलिप्‍पी शहर कै यात्रा कौरे औरौ अखमीरी रोटी कै तैयारो कै बाद फिलिप्‍पी शहर शै पाणी कै जहाज पांदी बौठेयो पाँची दूसौ दै त्रोआस शहर दै तिनकै धोरे पौऊंचै, औरौ साती दूसौ तौड़ी तिथी रौवै।

यूतुखुस को जियुंदी हौणौ

⁷ हफते कै आगलै दूसै जोबै आमुए प्रभु भोज की रोटी तौड़णौ खै कौठै हुवे, तौ पौलुसे जू दूजै दूसै आगु जांदा लागै रौआ थिया, तिनुआरी बातौ कौरी, औरौ आधी राती तौड़ी उपदैश कौरदा रौआ।

⁸ जैसी उपले कोमरै दै आमु कौठै थिए, तिथै बौहितै दिवे बौल़ै रौवै थिए।

⁹ औरौ यूतुखुस नांव का ऐक जवान खिड़की पांदी बौठेयो खै गैहरी नींदो दा झौकै रौआ थिया, औरौ जोबै पौलुस बीसती तौड़ी बातौ कौरदा लागा तौ सै नींदो कै झौकै लैई तिजै मंजिल शा उदा रिड़ा, औरौ सै मौरे गौआ।

¹⁰ पौरौ पौलुस उदा हौटा औरौ तैसकै धोरे जायौ हौंगटै दा कौरेयौ गल़े लायौ खै बौल़ौ, “घबराये नी; जिथुकै ऐजा इबी बै जियुंदी औसौ।”

¹¹ औरौ तैणै औटेयौ ऊबै जायौ खै रोटी तौड़ी तोबै प्रभु भोज लौआ औरौ होटेयो कै संगति कौरे। औरौ इशैक देर तौड़ी तिनुआरी बातौ कौरदा रौआ कै झीश हौए गौए; औरौ तिथकै बाद सै आगु हौटा।

¹² औरौ सै तैसी जवानो खै जियुंदा लायौ खै बौहितै खुशी हुवे।

त्रोआस शै मीलेतुस की यात्रा

¹³ पौलुसे फोयसला लौआ कै सै अस्‍सुस नगर कारिए हांडेयो यात्रा कौरेयौ जांदा। बाकी आमै सौबै जोणे जहाजो पांदी समुन्द्री बाटो बाटी तैसदै औगौड़ियौ हौटै गौवै, औरौ आमै तिथैदै तैसीकै आपणै साथै जहाजो पांदी निणो कै बारै मुंजी सोंचै लो थियु।

¹⁴ जोबै सै अस्‍सुस नगर दा आमु कै भैटा तौ आमुए तैसी जहाजो पांदी बोठाल़ेयो खै मितुलेने नगर दै ओऊवे।

¹⁵ ओकी दूसै तिथैदै यात्रा कौरेयौ आमै खियुस नगर कै धोरे शै होटेयो सामुस नगर दै पौऊंचै औरौ तिथकै आगलै दूसै मीलेतुस नगर दै ओऊवे।

¹⁶ पौरौ पौलुसे इफिसुस शहर दा ना रुकणौ का फोयसला कौरा जिथुकै सै एशिया प्रदेश दा हौजौ जादा सौमय नी बीतणा चांव थिया। जिथुकै सै काल़े रौआ थिया, कै जै हौए सौकौ, तौ सै पिन्‍तेकुस्‍त तैयारो कै दूसै यरूशलेम शहर दा रौंव।

इफिसुस शहर कै बुड़ेईको खै उपदैश

¹⁷ औरौ जोबै आमै मीलेतुस शहर दै उतरे, तोबै पौलुसे इफिसुस शहर कै कलीसिया कै अगुवो खै सौंदेश भैजा।

¹⁸ जोबै सै तैसकै धोरे ओऊवे, तौ तिनुखै बौल़ौ, “तुऐं जाणौए, कै आगलै ही दूसै जोबै हांव एशिया प्रदेश दा पोऊंचा, हांव ऐलो तौड़ी हर सौमय तोंवारै साथै कैशैखै रौआ।

¹⁹ औरौ बौड़ी दीनता शै औरौ आशु बोवाय-बोवायो, औरौ तिनु परीक्षाओं मुंजी जू यहूदी नेता कै चालबाजी कै बौजैह शै मुं पांदी आए गोई; हांव प्रभु कै सेवा कौरदा ही रौआ।

²⁰ औरौ जू-जू बातौ तोंवारै फायदै की थी, तिनुखै बौताणौ औरौ लोगौ कै सामणै औरौ घोरे-घोरे हिम्मत कै साथै शिखांदा रौआ।

²¹ औरौ यहूदी लोग औरौ यूनान देश कै लोगौ कै सामणै गवाही दैंदा रौआ कै पाप कौरणा छोड़ दैव औरौ पौरमेशवर कै ढौबौ मन लाव, औरौ अमारै प्रभु यीशु मसीह पांदी बिशवाश कौरौ।

²² औरौ ऐबै, हांव पवित्र आत्मा कै आज्ञा का पालन कौरेयौ यरूशलेम शहर खै जोऊं, औरौ ना जाणु, कै तिथै मुंआरी का-का बीतल़ो,

²³ सिरफ ऐजौ कै पवित्र आत्मा हर नगर दै चैतावणी दैय-दैयौ मुंकैई बौल़ौ कै कैद औरौ कौल़ेश तांव कारिए तैयार औसौ।

²⁴ पौरौ हांव आपणै प्राणो खै किछै ना सौमझु कै आपी आरी प्यार कौरु, पौरौ ऐजौ कै हांव आपणै दौड़ खै, औरौ तियौं सेवा खै पूरी कौरु, जू मोऐं पौरमेशवर कै अनुग्रह कै सुसमाचार पांदी गवाही दैणौ कारिए प्रभु यीशु कैईंदै पाए राए।

²⁵ औरौ ऐबै हांव जाणुए, कै तुऐं सौबै जिनुमुंजी मोऐं पौरमेशवर कै राज्य का प्रचार कौरा, तुऐं मुखै हौजौ ना दैखदै।

²⁶ इथकारिए हांव ऐलो कै दूसै तुऔं खै गवाही दैयौ बुलू, कै जै तुऔं मुंजीदै कुणिए बै यीशु पांदी बिशवाश कौरे बिना मौरे जांव, तौ ऐजी मैरी जुमैवारी ना आथी।

²⁷ जिथुकै मोऐं तुऔं कै सैजौ सौबै ठुँ बौताए राए जू पौरमेशवर चांव कै तुऐं जाणौ औरौ मोऐं तुंवादौ किछै ना छुपैई।

²⁸ इथकारिए आपणै औरौ पूरै झुंड की दैख-रैख कौरौ; जिथमुंजी पवित्र आत्माए तुऔं ठोगड़े बाणै राए कै तुऐं पौरमेशवर कै कलीसिया कै रोखवाल़ै कौरौ, जिथुकै पौरमेशवरे आपणै लोगौ खै आपणै लोऊ लैई खरीदै राए।

²⁹ हांव जाणुए, कै मैरै जाणौ कै बाद तोंवारै बीच मुंजी झूठै गुरु आन्दै औरौ बिशवाशियौं खै भोरमांदै। सै तिनु फाड़णौवाल़ै भेड़िए कै जैशणै हौंदै जू भेड़ो खै मारै दैंव।

³⁰ इथै तौड़ी कै तोंवारै आपणै बिशवाशियौं कै झुंड मुंजीदै, ऐशणै-ऐशणै लोग आन्दै, जू चैलै खै आपणै पौछौड़ियौ खिंचणो कारिए उलटी सीधी बातौ बौलदै।

³¹ इथकारिए बिजैयौंदे रौया, औरौ याद कौरेया कै मोऐं ती सालो तौड़ी रात दूस आशु बोवाय-बोवायो, सौबी खै सौमझाणौ नी छुड़ी।

³² औरौ ऐबै हांव तुऔं पौरमेशवर कै, औरौ तैसकै अनुग्रह कै वचन खै सौंपै दियु, जू तुऔं बिशवाश दै मोजबूत कौरे सौकौ, औरौ पौरमेशवर तुऔं सैजै विरासत दैंदा जियौं दैणौ का वायदा तैणै तिनु सौबी लोगौ शै कौरे राए जू तैसकै जरिए पवित्र हौए रौवै।

³³ मोऐं कोसी कै चांदी, सूनु या खोटणो का लालच नी कौरी।

³⁴ तुऐं आपी बै जाणौए कै इनु हाथै मैरी औरौ मैरै साथियो की जौरुरत पूरी कौरी।

³⁵ मोऐं तुऔं सौबै ठुँ कौरेयौ दिखाए राए, कै ऐशैखैई मैहनत कौरेयौ कमजोर लोगौ खै सोम्‍भाल़ो, औरौ प्रभु यीशु कै वचनो खै याद राखणै जौरुरी औसौ, तैणै आपी ही बौल़ै राए: लोणो शै दैणौ बढ़िया औसौ।”

³⁶ ऐजौ बौलेयौ तैणै घुंडू नियुड़ायो औरौ तिनु सौबी कै साथी प्रार्थना कौरे।

³⁷ तोबै सै सौबै बौहितै रुए औरौ पौलुस कै गल़े लायौ तैसी खोपटियांदै लागै।

³⁸ तिनुऐ खास कौरेयौ इयौं बातौ का दुख कौरे लौआ थिया, जू तैणै बौल़ै राए थी, कै तुऐं मुखै हौजौ ना दैखदै। औरौ तिनुऐ तैसी जहाजो तौड़ी छोड़ा।