प्रेरितो कै काम 19 - सिरमौरी नौवाँ नियम

इफिसुस शहर दा पौलुस

¹ जोबै अपुल्लोस कुरिन्‍थुस शहर दा थिया, तोबै पौलुस दूरदराज प्रदेशो शा हौयौ कै इफिसुस शहर दा ओऊवा, औरौ तिथै किछै चैलै आरी भैटिया।

² तैणै बौल़ौ, “का तुऐं बिशवाश कौरदै बैई पवित्र आत्मा पाए राए?” तिनुऐ तैसीखै बौल़ौ, “आमुए तौ पवित्र आत्मा की चौर्चा बै शौणै ना रैई।”

³ पौलुसे तिनुखै बौल़ौ, “तोबै तुऐं कैशणा बपतिस्मा लोए राए, तौ इथका का मतलब थिया?” तिनुऐ बौल़ौ, “आमुए सैजा बपतिस्मा लोए राए जू यूहन्ना दैंव थिया।”

⁴ पौलुसे बौल़ौ, “यूहन्नाए तिनु लोगौ खै बपतिस्मा दिया जिनुवै पाप कौरणै छोड़े राए, औरौ पौरमेशवर कै ढौबौ फिरै गौवै। पौरौ तैणै इस्राएल कै लोगौ खै बौल़ौ कै सै यीशु पांदी बिशवाश कौरौ जू तैसकै बाद आन्दा, जू कै मसीह औसौ।”

⁵ ऐजौ शोणेयो तिनुऐ प्रभु यीशु कै नांव शै बपतिस्मा लौआ।

⁶ औरौ जोबै पौलुसे तिनु पांदी हाथ राखै, तौ तिनु पांदी पवित्र आत्मा ओऊवा, औरौ सै सांत-भांत कै भाषा बौलदै औरौ पौरमेशवर की बातौ बौतांदै लागै।

⁷ ऐजै सौबै लमसम बारौ मर्द थिए।

⁸ तोबै पौलुस यहूदी सभा-घोरो दा जायौ ती मीनै तौड़ी निडर हौयौ बौलदा रौआ, औरौ पौरमेशवर कै राज्य कै बारै मुंजी बैहस कौरदा औरौ सौमझांदा रौआ।

⁹ पौरौ जोबै किछै लोगै कठोर हौयौ तैसकी बातौ का बिशवाश नी कौरी पौरौ लोगौ कै सामणै ऐसी मसीह गुट कै बुरु बौलदै लागै, तोबै तैणै तिनुखै छोड़े दियै औरौ चैलै कै जौई कौरे दियै, औरौ रौज तुरत्रुस इसकूलौ दै शिक्षा दैया कौरौ थिया।

¹⁰ दो सालो तौड़ी ऐशैखैई हौंदौ रो, इथै तौड़ी कै एशिया प्रदेश कै रौणौवाल़ै यहूदी लोगै औरौ यूनान देश कै रौणौवाल़ै सौबी लोगै प्रभु का वचन शौणै पोऊवा।

इफिसुस शहर दै सामर्थ कै अनौखै काम

¹¹ पौरमेशवर पौलुस लैई अनौखै औरौ चौमत्कार कै काम दिखांव थिया।

¹² इथै तौड़ी कि रुमाल औरौ खोटणो तैसकै शोरीरो पांदी छुवायो कै बीमारों पांदी पांव थिए, औरौ तिनकी बीमारी ठीक हौए जांव थी; औरौ दुष्टआत्माएं तिनु मुंजी दी आगु जांव थी।

¹³ पौरौ किछै यहूदी लोग जू झाड़ फूंक कौरेयौ दुष्टआत्माओं खै बायरै घाड़ो थिए, ऐजौ कौरदै लागै कै जिनुदी दुष्टआत्मा हौंव तिनु पांदी यीशु कु नांव लोयो झाड़ फूंक कौरेयौ बौलदै लागै, “जैसी यीशु का प्रचार पौलुस कौरौ, हांव तुऔं बायरै आणौ कै आज्ञा दियु।”

¹⁴ औरौ सिक्‍कवा नांव कै ऐकी मुख्य यहूदी पुरोहित कै सात बैटै थिए, जू ऐशणौ सांडो थिए।

¹⁵ पौरौ दुष्टआत्माएं जवाब दिया, “यीशु खै हांव जाणुए, औरौ पौलुस खै बै पौछेयाणुए; पौरौ तुऐं कुण औसौ?”

¹⁶ औरौ तैसी आदमीए जैसदै दुष्टआत्मा थै; तियैं तिनु पांदी पिल़चैयो, तिनु सौबी खै आपणै काबू दै कौरे दियै, औरौ तिनुखै ऐशै मारै, कै सै नांगै औरौ घायल हौयौ तैसी घोरो पौरैशै आगु दोऊड़ै।

¹⁷ ऐजै बात इफिसुस शहर कै रौणौवाल़ै सौबै यहूदी औरौ यूनान देश कै लोग बै जाणै गौवै, औरौ तिनु सौबी कै डौर लागै गौआ; औरौ प्रभु यीशु कै नांव कै बौड़ाए हौए।

¹⁸ औरौ जिनुवै बिशवाश कौर राए थिया, तिनुमुंजी दै बौहितै लोगै आयौ आपणै-आपणै बुरै कामौ खै खुलैआम मानै पाए।

¹⁹ औरौ जादू टोना कौरणौवाल़ै मुंजीदै बौहितै आपणी-आपणी पोथियां कौठी कौरेयौ सौबी कै सामणै जोल़ाए दी; औरौ जोबै तिनकै कीमत जोड़े, तौ पचाश हजार चांदी कै सिक्‍को कै बराबर निकल़ी।

²⁰ ऐशैखैई प्रभु का वचन शौकतै कै साथै फौयल़दा गौआ औरौ हावी हौंदा रौआ।

²¹ जोबै ऐजी बातौ हौए गोई तोबै पौलुसे फोयसला कौरा कै मकिदुनिया औरौ अखाया प्रदेशो कै बिशवाशियौं आरी भैटिणौ कै बाद यरूशलेम शहर कै जोऊंबा, औरौ बौल़ौ, “यरूशलेम शहर जाणौ कै बाद मैरै राजधानी रोम शहर खै बै दैखणौ जौरुरी औसौ।

²² इथकारिए आपणी सेवा कौरणौवाल़ै मुंजीदै तीमुथियुस औरौ इरास्तुस खै मकिदुनिया प्रदेश दै तिनुखै आपी दै औगौड़ियौ भैजै दियै, औरौ आपी किछै दूसौ तौड़ी एशिया प्रदेश कै इफिसुस शहर दा रौआ।”

इफिसुस शहर दा रोल़ा

²³ तोलो कै सौमय मसीह कै गुट कै बारै मुंजी बौड़ा रोल़ा हौआ।

²⁴ जिथुकै दिमेत्रियुस नांव का ऐक सुनार यूनान कै देवी अरतिमिस देवी कै मन्दिर की चांदी कै मूर्ति बाणौ थिया, औरौ सै कारीगरो कै तिथु बाणणौ कारिए बौहिता पोयसा दैंव थिया।

²⁵ दिमेत्रियुसे आपणै कारीगरो खै बोईदै औरौ ऐशणी चीज़ौ कै कारीगरो खै बै कौठै कौरेयौ बौल़ौ, “ओए रै भाईयों तुऐं जाणौ कै ऐसी कामौ लैई आमु किशैक धन भैटौ।

²⁶ औरौ तुऐं दैखौ औरौ शुणौए कै सिरफ इफिसुस शहर ही नी, पौरौ एशिया प्रदेश कै सौबै गांव दै बौल बौलेयौ ऐसी पौलुसे बौहितै लोगौ खै सौमझाए औरौ भरमाए बै राए, कै जू हाथौ की कारीगरी औसौ, सै ईशवर ना आथी।

²⁷ औरौ ऐबै सिरफ ऐसी ऐकी बातौ का ही डौर नी आथी कै अमारै ऐसी धान्‍धे की इज्जत जांदी रोंदी, पौरौ ऐजौ कै महान देवी अरतिमिस देवी का मन्दिर बैकार सौमझा जांदा औरौ जैसी पूरै एशिया प्रदेश औरौ दुनिया भर दा पूजौए इथकै खासियत बै जांदी रोए।”

²⁸ सौबै कारीगर ऐजौ शोणेयो कै गुस्से शै भोरै गौवै औरौ लैरौ मारैयौ बौलदै लागै, “इफिसुस शहर की अरतिमिस देवी, महान औसौ!”

²⁹ औरौ सारै नोगरो दा बोईता रोल़ा मोचाए दिया औरौ लोगै मकिदुनिया प्रदेश कै रौणौवाल़ै गयुस औरौ अरिस्‍तर्खुस, खै जू पौलुस कै साथी यात्री थिए, पाकड़ै दियै, औरौ ऐक साथै रंगशाला दै दौड़ै गौवै।

³⁰ जोबै पौलुस बै रंगशाला दा भीतरै जायौ लोगौआरी बात कौरणा चांव थिया तौ चैलै तैसी जाणौ ना दी।

³¹ आसिया प्रदेश कै राज्यपालो मुंजीदै बै तैसकै कैई दोस्‍ते तैसीया बैवरा भैजा औरौ बिन्ती कौरे, कै रंगशाला दै जायौ आपणै जान खै खतरै दै नी पाया।

³² रंगशाला कै भीतरै, सौबी लोगै लैरौ मारी लोई थी, कुणिए किछै लैरौ मारी लोई थी तौ कुणिए किछै ओकी; औरौ सौब ठुँ गड़बड़ थियु। औरौ बौहितै लोग तौ ऐजौ जाणौ बै नी थिए कै किथु कौठै हौए रौवै।

³³ तोबै भीड़ौ मुंजीदै किछै यहूदी लोगै सिकन्‍दर खै भीड़ कै सामणै ढोकयोऊंवा, औरौ औगौड़ियौ कौरा औरौ सिकन्‍दरे मेसो रौयौ हाथौ लैई इशारा कौरेयौ लोगौ खै सौमझाणौ कै कौचिश कौरे लोए थै।

³⁴ पौरौ जोबै तिनुऐ जाणै पोऊँ कै सै यहूदी औसौ औरौ यहूदी लोग, मसीही लोगौ साए मूर्तिपूजा ना कौरौ, तौ सौब कै सौब ऐकी भाषा दै दो घांटे तौड़ी लैरौ मारदै रौवै, “इफिसुस शहर की देवी अरतिमिस देवी, महान औसौ।”

³⁵ तोबै नोगरो कै मन्‍त्रीए लोगौ कै चुपी कौरायो बौल़ौ, “ओए रै इफिसुस शहर कै लोगौ, सौबवे जाणौए, कै इफिसियों का नोगर महान देवी अरतिमिस कै मन्दिर की दैखभाल कौरे लोए, औरौ तियौंकै पवित्र मूर्ती गौयणी पौरैशी उदी छुटी रोए।

³⁶ औरौ जोबै कै इनु बातौ का खातमा ना हौए सौकौ, तौ ठीक औसौ, कै तुऐं चुपी रौंव; औरौ बिना सोंचै-सौमझै किछै नी कौरेया।

³⁷ जिथुकै तुऐं इनु आदमी खै लाए राए, जू ना मन्दिर कै लूटणौवाल़ै आथी, औरौ ना अमारी देवी कै नेंदैया कौरणौवाल़ै आथी।

³⁸ जै दिमेत्रियुस औरौ तैसकै साथी कारीगरो खै कोसीआरी बै शिकायत हौंव तौ सै अदालत दै जाए सौकौ, औरौ तिनकै झोगड़े का न्याय कौरणौ कारिए तिथै राज्यपाल बै औसौ; तिथैशै लोग ऐकी दूजै पांदी इलजाम लाए सौकौ।

³⁹ पौरौ जै तुऐं कोसी ओकी बातौ कै बारै मुंजी किछै पूछणु चांव, तौ शहर कै सभा दा फोयसला कौरा जांदा।

⁴⁰ जिथुकै मुखै डौर औसौ कै आमै रोम देश कै सरकार दवारा रोल़ा शुरु कौरणौ कै इलजाम लाए जाणौ कै खतरै दै औसौ। इथकारिए कै इथकै किछै बौजैह नी आथी, औरौ आमु इयौं भीड़ कै कौठै हौणौ का किछै जोवाब ना दैय सौकु।”

⁴¹ औरौ ऐजौ बौलेयौ तैणै सभा कै आगु छाड़ै।