प्रेरितो कै काम 17 - सिरमौरी नौवाँ नियम

थिस्सलुनीके शहर दै पौलुस औरौ सीलास

¹ तोबै पौलुस औरौ सीलास अम्‍फिपुलिस नोगर औरौ अपुल्‍लोनिया नोगर दै औटेयौ कै थिस्सलुनीके शहर दै ओऊवे, जिथै यहूदी लोगौ का ऐक यहूदी सभा-घोर थिया।

² पौलुस आपणै भोवारो कै हिसाब शै तिनकै धोरे हौटा, औरौ ती विशांव कै दूसै पवित्र शास्त्रो पौरैशै तिनुआरी बैहस कौरे।

³ औरौ तिथका मतलब खोले-खौलेयौ कै सौमझाए लौआ थिया कै मसीह का दुख उठाणा, औरौ मौरेयौंदे मुंजीदा जियुंदी हौणा, जौरुरी थिया, “ऐजाई यीशु जैसकै बारै मुंजी हांव तुऔं खै बौतौऊं, सै मसीह औसौ।”

⁴ तिनुमुंजी दै कैतरै यहूदी लोगै, औरौ पौरमेशवर का डौर मानणोवाल़ै बैगानै यहूदी लोगौ मुंजीदै बौहितै औरौ बौहुती सारी खास-खास बैटमाणिशै बिशवाश कौर पाए, औरौ पौलुस औरौ सीलास कै साथी मिलै गोई।

⁵ पौरौ यहूदी लोग जू ज़लन शै जौल़ै रौवै थिए तिनुऐ बाज़ारो पौरैशै लोगौ मुंजीदै कैई दुष्ट आदमियों खै आपणै साथी नियै, औरौ भीड़ लायौ खै नोगरो दा रोल़ा पाड़दै लागै, तिनुऐ यासोने कै घोरो पांदी हमला कौरा, पौलुस औरौ सीलास खै लोगौ कै सामणै लाणै चांव थिए।

⁶ तिनु तिथै ना दैखियौ कै, तिनिए यासोने औरौ किछै बिशवाशी भाईयों खै नोगरो कै राज्यपालो कै धोरे खिंचैयौ लैयाए, तिनिए लैलियायो कै बौल़ौ “ऐजै लोग जिनुवै हर जौगैह पौरैशानी खोड़ी कोरी राए, इथै बै आए रौवै।

⁷ औरौ यासोने तिनका आपणै घोरे स्वागत कौरा, औरौ ऐजै सौबै जोणे ऐशै बौल़ौ कै यीशु राजा औसौ, औरौ महाराजा (कैसर) कै आज्ञाओं कै खिलाफ काम कौरौ।”

⁸ जोबै भीड़ै औरौ नोगरो कै राज्यपाले ऐजी बातौ शुणी, तौ सै पौरैशान हौए गौवै।

⁹ औरौ तिनुऐ यासोने औरौ बाकी लोगौ खै जमानत पांदी छोड़े दियै।

बिरीया नगर दा पौलुस औरौ सीलास

¹⁰ बिशवाशी भाईए तौलोंई रातो रात पौलुस औरौ सीलास खै बिरीया नोगरो दै भैज दियै, औरौ सै तिथै पोंचैयो यहूदी लोगौ कै यहूदी सभा-घोरो दै हौटै।

¹¹ ऐजै लोग तौ थिस्सलुनीके शहर कै यहूदी लोगौ शै ठोगड़े थिए, औरौ तिनुऐ बौड़ै चाव शै वचन खै अपनोऊवा, औरौ हर रौज पवित्र शास्त्र पौरैशौ जांचदै रौवै कै ऐजी बातौ साची औसौ कै ना आथी।

¹² इथकारिए तिनुमुंजी दै बौहितै, औरौ खास-खास यूनान देश कै रौणोवाल़ी बैटमाणिशौ मुंजीदी, औरौ मोरदो मुंजीदै बौहितै बिशवाश कौरा।

¹³ पौरौ जोबै थिस्सलुनीके शहर कै यहूदी लोग जाणै गौवै कै पौलुस बिरीया नोगरो दा बै पौरमेशवर का वचन शुणांवए, तौ सैजै तिथै आयौ बै लोगौ खै भड़काणे औरौ हलचल मौचांदै लागै।

¹⁴ तोबै बिशवाशी भाईए तावल़ा पौलुस खै विदा कौरा कै समुन्द्र कै किनारे बाटी आगु जा; पौरौ सीलास औरौ तीमुथियुस बिरीया नोगरो दै रोए गौवै।

¹⁵ सैजै लोग जिनुवै पौलुस खै नै लौआ थिया तैसकै साथै एथेंस शहर तौड़ी हौटै, पौरौ पौलुस कै इयौं आज्ञा कै बौजैह शै सै बिरीया नोगरो कै पाछु हौटै गौवै कै सीलास औरौ तीमुथियुस खै तावल़ै ही तैसकै धोरे भैजै दैंव।

एथेंस शहर दा पौलुस

¹⁶ जोबै पौलुस एथेंस शहर दा तिनकी बाट जोंदा लाग रौआ थिया, तौ नोगरो खै मूर्ति लैई भौरेयौंदा दैखैयो खै तैसका मन बैजाए दुखी हौए गौआ।

¹⁷ इथकारिए सै यहूदी सभा-घोरो दा यहूदी लोगौ औरौ बैगानै यहूदी भोक्‍त मुंजीदै औरौ चौको पांदी जू लोग भैटौ थिए, तिनुआरी रौज बैहसबाजी कौरेया कौरौ थिया।

¹⁸ तोबै सैजै गुरुजी जू इपिकूरी औरौ स्‍तोईकी कौरेयौ जाणै जांव थिए, औरौ तिनुमुंजी दै किछै तैसीआरी बैहस कौरदै लागै, “ऐजा बकवादी का बौताणौ चांव?” पौरौ ओकीए बौल़ौ, “सै ओकी देवताओं का प्रचारक जाणियौ,” जिथुकै सै यीशु का औरौ मौरेयौंदे मुंजीदा जियुंदी हौणौ का सुसमाचार शुणांव थिया।

¹⁹ तोबै सै तैसी आपणै साथी अरियुपगुस नांव कै ऐकी महासभा दै लौय गौवै औरौ पूछु, का आमुए जाणै सौकु, कै ऐजी नोऐं शिक्षा जू तू शुणाए, का औसौ?

²⁰ जिथुकै तू ओकबान्ती बातौ आमु शुणाए, इथकारिए आमुए जाणणौ चोऊं कै इनु बातौ का मतलब का औसौ?

²¹ (इथकारिए कै सौबै एथेंस शहर कै रौणौवाल़ै औरौ प्रदेशी जू तिथै रौंव थिए नुई-नुई बातौ बौलणौ औरौ शुणणौ कै सिवाए औकै कोसी कामौ दा आपणा सौमय नी बितांव थिए)

अरियुपगुस दा पौलुस का उपदैश

²² तोबै पौलुसे अरियुपगुस नांव कै ऐकी महासभा दै खौड़ै हौयौ खै बौल़ौ, “ओए रै एथेंस शहर कै रौणौवाल़ै लोगौ, हांव दैखुए कै तुऐं हर बातौ दै देवताओं खै बौड़ै मानणोवाल़ै औसौ।

²³ जिथुकै मोऐं घोमै-फिरीयो तुंआरी पूज़णो की चीज़ौ दैख लोई थी, तौ ऐक ऐशणी वेदी बै भैटी, जिथपांदी लैख राए थियु, ‘अणजाणै ईशवर कारिए।’ इथकारिए जिनु तुऐं बिना जाणै पूजौ, हांव तुऔं तैसका समाचार शुणौऊं।

²⁴ जैसी पौरमेशवरे दुनिया औरौ तिथमुंजी सौबै चीज़ौ बाणी, सै स्वर्ग औरौ धोरती का स्‍वामी हौयौ हाथौ कै बौणैयौंदे मन्दिरो दा ना रौंव।

²⁵ ना तैसीकै कोसी चीज़ौ कै जौरुरत आथी, औरौ ना आदमियों कै मौदद की जौरुरत आथी, जिथुकै सै तौ आपी ही सौबी खै जीवन औरौ साँस औरौ सौब ठुँ दैंव।”

²⁶ तैणै ऐकी आदमी शै सौब जातियाँ सारै धोरती पांदी रौणौ कारिए बाणै राए; औरौ तिनकै ठैहरायौंदे सौमय औरौ निवासो की लोकिरो कै इथकारिए तय कौरी,

²⁷ पौरमेशवरे ऐशै इथकारिए कौरौ ताकि लोग तैसीकै जूओं, औरौ शायद सै तैसकै धोरे पौंचै सौकौ, तोबै बै सै आमु मुंजीदा कोसी दा बै दूर ना आथी।

²⁸ जिथुकै पौरमेशवर आमु साथी औसौ ताकि आमै जियुंदी रौंऊ, औरौ हांडदै फिरदै, औरौ आमु बौचेयौंदे रोऊं, ठीक तैशैकैई जैशैकै तोंवारै कैतरै कविए बौल़ै राए, “आमुए तौ तैसकै वंश बै औसौ।

²⁹ इथकारिए पौरमेशवर कै सन्‍तान हौयौ आमु ऐजौ नी सुंचणौ चैंई कै पौरमेशवर सूनै, चांदी, या पाथरो कै जैशणा औसौ, जू आदमी की कारीगरी सै औरौ सोंच-विचार शै बौणै रौआ।

³⁰ इथकारिए पौरमेशवरे लोगौ कै अज्ञानता कै सौमयो पांदी ध्यान ना दी, पौरौ ऐबै सौबी ठाँव दै सौबी आदमियों खै पाप कौरणै छोड़े दैणौ कै आज्ञा दैंव।

³¹ जिथुकै तैणै ऐक दूस ठोराए राए, जिंदै सै तैसी आदमी लैई धार्मिकता शै दुनिया का न्याय कौरदा, जैसी तैणै ठोराए राए, औरौ तैसी मौरेयौंदे मुंजीदा जियुंदा कौरेयौ कै इयौं बातौ का सबूत सौबी लोगौ खै दैय राए।”

³² मौरेयौंदे मुंजीदा जियुंदी हौणौ की बात शोणेयो किछै लोग तौ ठाटा कौरदै लागै औरौ कैतरै लोगै बौल़ौ, “ऐजै बात आमै तांव कैईंदै हौजौ कोलो शुणदै।”

³³ तैसी सौमय पौलुस तिनकै बीच पौरैशा आगु हौटा।

³⁴ पौरौ किछै आदमी तैसकै साथी मिल गौवै औरौ प्रभु पांदी बिशवाश कौरा; जिनु मुंजीदै दियुनुसियुस जू अरियुपगुस गुट का आदमी थिया, औरौ दमरिस नांव कै ऐक बैटमाणिश थी औरौ तिनकै साथै औकै बै किछै लोग थिए।