प्रेरितो कै काम 16 - सिरमौरी नौवाँ नियमपौलुस औरौ तीमुथियुस 1 तोबै पौलुस औरौ सिलास दिरबे औरौ लुस्त्रा शहर दै बै हौटै। तिथै तीमुथियुस नांव का ऐक चैला रौंव थिया। तैसकै माँ यहूदी बिशवाशी थी, पौरौ तैसका बापू यूनान देश का रौणौवाल़ा थिया। 2 औरौ लुस्त्रा औरौ इकुनियुम शहर कै बिशवाशी भाईटु मुंजी तैसका आछा नांव थिया। 3 पौलुस कै इछा थै कै सै तैसकै साथी चालौ; औरौ जू यहूदी लोग तिनु ठाँव दै थिए तिनकी बौजैह शै तैणै तीमुथियुस का खतना कौरा, जिथुकै सै सौबवे जाणौ थिए, कै तैसका बापू यूनान देश का रौणौवाल़ा थिया। 4 पौलुस औरौ तैसकै साथी जोबै नोगरो-नोगरो जांव थिए तौ सै तिनु नियमौ कै जू यरूशलेम शहर कै चोणेयौंदे चैलै औरौ अगुवे बाणै राए थिए, तिनु नियम कै मानणौ कारिए बिशवाशियौं तौड़ी पौऊचांव थिए। 5 तैशैखैई कलीसिया बिशवाश दै मोजबूत हौए गौए औरौ गिनती दी बै रौज बौढ़दै लागै। पौलुस का दर्शन 6 औरौ सै फ्रूगिया प्रदेश औरौ गलातिया प्रदेशो दै हौयौ कै हौटै, जिथुकै तिनु पवित्र आत्माए एशिया प्रदेश दा वचन शुणाणौ शै मोना कौरा। 7 सै मूसिया प्रदेश कै नेड़िक पोंचैयो कै, बितूनिया प्रदेश जाणौ चांव थिए; पौरौ यीशु कै आत्माए तिनु जाणौ ना दी। 8 इथकारिए सै मूसिया प्रदेश दै हौयौ कै बंदरगाह वाल़ै त्रोआस शहर दै ओऊवे। 9 तिथै पौलुसे राती कै ऐक दर्शन दैखा कै ऐक मकिदुनिया प्रदेश का रौणौवाल़ा आदमी खौड़ा हौआ, तैसीयादै बिन्ती कौरेयौ बौलदा लागा, “समुन्द्र कै पार जायौ कै मकिदुनिया प्रदेश दा आ, औरौ अमारै मौदद कौर।” 10 पौलुस का ऐजा दर्शन दैखदै ही आमुए तौलोंई मकिदुनिया प्रदेश जाणौ चोऊ, ऐजौ सौमझेयौ कै पौरमेशवरे आमु तिनु सुसमाचार शुणाणौ कारिए बौएदै राए। 11 इथकारिए त्रोआस शहर शै आमु समुन्द्र कै बाटो बाटी सीधै सुमात्राके टापू औरौ दूजै दूसै नियापुलिस शहर दै ओऊवे। 12 तिथैदै आमु फिलिप्पी शहर पौऊंचै, जू मकिदुनिया प्रदेश का मुख्य नोगर, औरौ रोम देश कै लोगौ की बोस्ती औसौ; औरौ आमुए तैसी नोगरो दै कुछैक दूसौ तौड़ी रौवै। 13 विशांव कै दूसै आमुए नोगरो कै फाटक कै बायरै नोंदी कै किनारे ऐजौ सौमझेयौ कै हौटै कै तिथै यहूदी लोगौ कै प्रार्थना कौरणौ का ठाँव हौला; औरौ बौठेयो तिनु बैटमाणिशौ शै जू कौठी हौए रोए थी, बातौ कौरदै लागै। यूरोप कै आगलै बिशवाशी 14 औरौ लुदिया नांव कै थुआतीरा शहर कै मोंगे बैंगनी रंगो कै खोटणो बिकणोवाल़ी ऐक बैटमाणिश जू पौरमेशवर कै भोक्ती कौरणौवाल़ै थी, ऐजी बातौ शौणै लोए थी। प्रभुए तियौंका मन खोले दिया, ताकि पौलुस की बातौ पांदी ध्यान लांव। 15 औरौ जोबै तियैं आपणै कुड़बे समैंत बपतिस्मा लौआ, तौ तियैं बिन्ती कौरे, “जै तुऐं मुखै सौथीखै प्रभु कै बिशवाशनी सौमझौ, तौ चालैयौ मैरै घोरे रौव, औरौ सै आमु कै मौनायो कै लोय गौए।” दुष्टआत्मा शै छुटकारा 16 जोबै आमै प्रार्थना कौरणौ कै ठाँव दै जांदै लागै रौवै थिए, तौ आमु कै ऐक दासी भैटी, जियौं दै ऐशणी दुष्टआत्मा थै जिथकै मौदद लैई सै हौणौवाल़ी बातौ बौतांव थै, औरौ हौणौवाल़ी बातौ खै बौतायौ सै आपणै मालिको कारिए भौरिशौ कमायौ लांव थै। 17 सै पौलुस कै औरौ अमारै पौछौड़ियौ आयौ लैरौ मारदै लागै, “ऐजै आदमी परमप्रधान पौरमेशवर कै दास औसौ, जू तुऔं कै उध्दार कै बाट बौतांव।” 18 सै बौहितै दूसौ तौड़ी ऐशैखैई कौरदै रोए, पौरौ पौलुस पौरैशान हौआ, औरौ पाछु फिरैयौ तियौं दुष्टआत्मा कै बौल़ौ, “हांव ताखै यीशु मसीह कै नांव शै आज्ञा दियु कै तू इयौं पौरैशै आगु जा औरौ सै तियौं घोड़ियो दै आगु हौटै गौए।” 19 जोबै तियांरै मालिकै दैखौ, कै अमारी कमाए कै आशा खत्म हौए गौए, तौ पौलुस औरौ सीलास कै थाम्बैयौ बाज़ारो कै चौकी दै प्रधानों कै धोरे खिंचैयौ लोए गौवै। 20 औरौ तिनु फौजदारी कै राज्यपाल कै धोरे लोय गौवै औरौ बौल़ौ, “ऐजै लोग जू यहूदी औसौ, इनुवे अमारै नोगर दै बौड़ी हलचल मोचाए राए; 21 औरौ ऐशणै भोवार बौताए लौवै, जिनु अपनाणै या मानणै आमु रोम शहर कै रौणौवाल़ै कारिए ठीक ना आथी।” पौलुस औरौ सीलास कोयदी दै 22 तोबै भीड़ कै लोग पौलुस औरौ सीलास कै खिलाफ दै कौठै हौयौ आए, औरौ राज्यपाले तिनकै खोटणो चिरेयौ कै खोले दिए, औरौ तिनु डैंगै शै मारणौ कै आज्ञा दै। 23 औरौ तिनुऐ तिनु डैंगै लैई बैजाए मारैयौ कोयदै खाने दै डाकै दिए औरौ दरोगा खै आज्ञा दै कै तिनु चौकशी शै राखैया। 24 तैणै ऐशणै आज्ञा पायौ तिनु भीतरै कै कोठरी दै राखै दिए औरौ तिनकै लातो खै भारी भरकम लाकड़ी कै बैड़ी दै पाए दियै। पौलुस औरौ सीलास कै कोयदी पौरैशा छुटकारा 25 आधी राती कै लमसम पौलुस औरौ सीलास प्रार्थना कौरदै बैई पौरमेशवर कै भजन गाए लौवै थिए, औरौ कैदीए तिनुखै शौणै लौवै थिए। 26 कै तेथियोड़े एकदम ऐक बौड़ौ बौईचल ओऊ, इथै तौड़ी कै कोयदखाने कै नीयुं बै हिंजल़ी गौए औरौ तौलोंई सौबै दवार खोले गौवै औरौ सौबी की बैड़ी खोले गोई। 27 औरौ दरोगा ऊबा बिज़ा, औरौ कोयदखाने कै दवार खुली दैखैयो औरौ ऐजौ जाणैयौ कै कैदी भाग गौवै, औरौ तैणै तलवार खिंचैयौ कै आपी खै मारणा चोऊवा। 28 पौरौ पौलुसे जोर शै धाव दैयौ बौल़ौ, “आपी कै किछै बै नुकसान नी पोऊंचा, जिथुकै आमु सौबै इथी औसौ।” 29 तोबै सै दिवा मौगायों भीतरै ओऊवा, औरौ कामणैयौ पौलुस औरौ सीलासो कै सामणै रिड़ा। दरोगा का मन बौदल़णा 30 औरौ तिनु बायरै लायौ कै बौल़ौ, “ओए रै जनाब, उध्दार पाणौ कारिए हांव का कौरु?” 31 तिनुऐ बौल़ौ, “प्रभु यीशु मसीह पांदी बिशवाश कौर, तोबै तू औरौ तैरा कुड़बा उध्दार पांदा।” 32 औरौ तिनुऐ तैसी औरौ तैसकै सारै घोरो कै लोगौ खै प्रभु का वचन शुणौऊवा। 33 औरौ रातै खै तियौंई घड़ी तैणै तिनु आगु नियौ कै तिनकै घाव धोवे, औरौ तैणै आपणै सौबी लोगौआरी तौलोंई बपतिस्मा लौआ। 34 औरौ तैणै तिनु आपणै घोरे नियौ कै, तिनु खाणौ कै दियु, औरौ सौबी कुड़बे समैंत पौरमेशवर पांदी बिशवाश कौरेयौ सैजै सौबै जोणे बैजाए खुशी होवे। 35 आगली झीशो तोबै राज्यपाले सिपाहियांगे बैवरा दिया कै तिनु आदमी कै छोड़ दैंव। 36 दरोगाए ऐजी बातौ पौलुसवागे बुली, “राज्यपाले तुऔं खै छोड़ दैणौ कै आज्ञा दैय राए, इथकारिए ऐबै शान्तै शै इथै दै आगु जाव।” 37 पौरौ पौलुसे तिनुखै बौल़ौ, “तिनुऐ आमु जू रोम शहर कै रौणौवाल़ै आदमी औसौ, दोषी जाणै बिना लोगौ कै सामणै मारै औरौ कोयदखाने दै खोटे औरौ ऐबै तिनुऐ आमु कै मेसो बाईंडे गाड़ै लौवै, ऐशै ना हौंदौ, पौरौ सै आपी आयौ कै आमु कै बायरै लोए जांव।” 38 सिपाहीए ऐजी बातौ राज्यपालो कै बौल़ै दी, औरौ सै ऐजौ शोणेयो कै कि सै रोम शहर कै रौणौवाल़ै औसौ, डौरे गौवै। 39 औरौ तिनुऐ आयौ कै तिनुवांदै माफी मांगै, औरौ बायरै जायौ कै बिन्ती कोरी, कै अमारै नोगरो पौरैशै आगु जाव। 40 सै कोयदखाने पौरैशै निकल़ैयो लुदिया कै घोरे हौटै, औरौ बिशवाशी भाईआरी भैटियो कै तिनु शान्तै दै, औरौ आगु हौटै। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation