प्रेरितो कै काम 15 - सिरमौरी नौवाँ नियम

यरूशलेम शहर कै सभा

¹ तोबै किछै य‌हूदी बिशवाशी यहूदिया प्रदेश शै अन्‍ताकिया शहर खै आए औरौ बिशवाशियौं खै शिखांदै लागै कै, “जै मूसा कै कानून कै हिसाब शै तोंवारा खतना ना हौं तौ तुऐं उध्दार ना पाए सौकौ।”

² जोबै पौलुस औरौ बरनबास का तिनुआरी मनमुटाव औरौ बैहसबाजी हौए तौ ऐजा फौयसल़ा हौआ कै पौलुस औरौ बरनबास औरौ तिनुमुंजी दै किछै आदमी इयौं बातौ कै बारै मुंजी चौर्चा कौरणौ कारिए चोणेयौंदे चैलै औरौ अगुवो कै धोरे यरूशलेम शहर खै भैजै जांव।

³ औरौ कलीसिया कै लोगै तिनु बाटो पुंडे कै पौयसै औरौ खाणौ दियु; औरौ सै फीनीके प्रदेश औरौ सामरिया प्रदेश शै हौयौ कै कैशै बैगानै यहूदी लोग सुसमाचार शोणेयो मसीह दै बिशवाशी बोणदै लागै रौवै, औरौ इयौं बात लैई सौबै बिशवाशी भाईयों खै बैजाए खोशे हौए।

⁴ जोबै सै यरूशलेम शहर दै पौऊंचै, तौ कलीसिया औरौ चोणेयौंदे चैलै औरौ अगुवे तिनुआरी खुशी हौयौ भैटियै, औरौ पौलुस औरौ बरनबासे बौतौऊ कै पौरमेशवरे तिनकै साथी हौयौ कैशणै-कैशणै काम कौरे राए थिए।

⁵ पौरौ फरीसी लोगौ कै गुट मुंजीदै जिनुवै बिशवाश कौरे राए थिया, “तिनुमुंजी दै कैतरै बिज़यो बौल़ौ, तिनु बैगानै यहूदी लोगौ खै खतना कौरणौ कै औरौ मूसा कै कानून खै मानणौ कै आज्ञा दैणी चैंई।”

⁶ तोबै चोणेयौंदे चैलै औरौ अगुवे इयौं बातौ कै बारै मुंजी विचार कौरणौ कारिए कौठै हुवे।

⁷ तोबै पतरसे बौहितै बैहसबाजी हौए जाणौ कै बाद खौड़ै हौयौ तिनुखै बौल़ौ, “ओए रै बिशवाशी भाईयों, तुऐं जाणौ, कै बौहितै दूस हौए गौवै, कै पौरमेशवरे तुऔं मुंजी शा मुखै चोणे राए, कै बैगानै यहूदी लोग मैरै दवारा सुसमाचार का वचन शोणेयो बिशवाश कौरौ।”

⁸ औरौ मन कै जांचणौ वाल़ै पौरमेशवरे तिनुखै बै आमु साए पवित्र आत्मा दैयौ दिखोऊ कै पौरमेशवरे तिनु आपणै लोग जाणैयौ अपनाए राए।

⁹ औरौ बिशवाश कै दवारा तिनकै मन शुध्द कौरेयौ आमु मुंजी औरौ तिनुमुंजी कुणजाई फोरक ना राखै रैई।

¹⁰ तौ हौजौ तुऐं बैगानै यहूदी लोगौ खै इनु सौबी नियम-कानूनो कै मानणौ कारिए जोर जबरदस्ती किथु कौरे लोए। जोबै पौरमेशवरे दिखाए राए कै तिनु तिनकै नियम-कानूनो कै मानणौ कै जौरुरत ना आथी। जिनु ना अमारै बुड़ेईके मानी औरौ ना आमै यहूदी मानै सौकौ।

¹¹ ऐशै कौरणौ ठीक ना आथी, पौरौ अमारा बिशवाश तौ ऐजा औसौ कै जैशणै ढंग शै सैजै प्रभु यीशु कै अनुग्रह शै उध्दार पांदै, तैशैखैई आमु बै पांदै, ना कै मूसा कै कानून का पालन कौरेयौ।

¹² तोबै सारी सभा चुपी हौयौ पौलुस औरौ बरनबास कै शुणदै लागै, कै पौरमेशवरे तिनकै दवारा बैगानै यहूदी लोगौ मुंजी कैशणै बौड़ै-बौड़ै निशान औरौ अनौखै काम दिखाए।

याकूब का फैसला

¹³ जोबै पौलुस औरौ बरनबास बौल़ै पोऊँ, तौ याकूब बौलदा लागा, “ओए रै बिशवाशी भाईयों, मैरी शुणौ।

¹⁴ शमौन पतरसे सौमझौऊवे, कै पौरमेशवरे आगैई बैगानै यहूदी लोगौ पांदी कैशणै दया कौरे, औरौ तिनुमुंजी दै कैतरै खै आपणै लोग हौणौ कारिए चुणै।

¹⁵ औरौ बैगानै यहूदी लोगौ का ऐजा बदलाव तियौं बातौ शै मानै जांव, जियौं बातौ कै बारै मुंजी पौरमेशवर कै बातौ बौताणौवाल़ै पवित्र शास्त्र दो बैजाए औगौड़ियौ लैख राए,

¹⁶ इथकै बाद हांव हौजौ आयौ राजा दाऊद का तोम्बू जू तैसकै बौयरीए बोरबाद कौरे दिया तैसी हौजौ बाणदा औरौ खौड़ा कौरदा।

¹⁷ इथकारिए कै औकै सौबै लोग यानी सौबै बैगानै यहूदी लोगौ समैंत जिनु मोऐं आपणै लोग हौणौ कारिए बोईदै,

¹⁸ ऐजा सैजाई प्रभु बौल़ौ जू दुनिया कै बाणणौ शै आगै इनु बातौ का समाचार दैंदा आए रौआ।

¹⁹ इथकारिए मैरा विचार ऐजा औसौ, कै बैगानै यहूदी लोगौ मुंजीदै जू लोग पौरमेशवर कै धोरे आंव तिनु पांदी दबाव नी पाव कै तिनु अमारै सौब यहूदी कानून औरौ भोवारो खै मानणै चैंई।

²⁰ पौरौ आमुए तिनु ऐक चिट्ठी लिखयो भैजै दै, ऐजौ बौताणौ कारिए कै सै सैजौ खाणौ नै खांव जू लोगै मूर्ति कै आगै चौढ़ाए राए औरौ गौलत सौमबंध औरौ गल़ा घोटेयौंदे गोरु को मांस नै खाया औरौ गोरु को लोऊ नै खाया।

²¹ जिथुकै मूसा कै ऐसी कानून का प्रचार पुराणै सौमय शै नोगर-नोगर दा हौंदा आए रौआ, औरौ सै हर विशांव कै दूसै यहूदी सभा-घोरो दै पौढ़ै जांव।”

गैर-यहूदी बिशवासियौं का पत्र

²² तोबै यरूशलेम शहर दै सौबै कलीसिया समैंत चोणेयौंदे चैलै औरौ अगुवो खै आछौ लागौ, कै आपी मुंजीदै किछै आदमियों कै चुणो, यानी यहूदा जैसकौ औकौ नांव बरसब्‍बा औसौ, औरौ सीलास कै जू बिशवाशी भाईयों मुंजी जादा इजतदार थिया; औरौ तिनु पौलुस औरौ बरनबास कै साथी अन्‍ताकिया शहर दै कलीसिया कै धोरे भैजै।

²³ औरौ तिनुऐ इयौं चिट्ठी खै तिनुआरी भैजै, “अन्‍ताकिया शहर औरौ सीरिया प्रदेश औरौ किलिकिया प्रदेश कै रौणौवाल़ै जू बैगानै यहूदी बिशवाशियौं मुंजीदै औसौ तिनकै चोणेयौंदे चैलै औरौ अगुवो भाईयों का नमशकार।

²⁴ आमुए शौणै राए कै आमु मुंजीदै कुणिए तिथै जायौ तुऔं आपणै बातौ लैई डोराए दिए; औरौ तोंवारै मन बौदलै दिए पौरौ आमुए तिनुखै ऐशै कौरणौ कै आज्ञा ना दैय रैई थी।

²⁵ इथकारिए आमुए ऐक मन हौयौ ठीक सौमझौ, कै आमुए कोसी आदमियों खै चुणणो का फोयसला लौआ, औरौ आपणै प्यारे बरनबास औरौ पौलुस कै साथै तोंवारै धोरे भैज राए।

²⁶ ऐजै तौ ऐशणै आदमी औसौ, जिनुवै आपणै प्राण अमारै प्रभु यीशु मसीह कारिए जोखिम दै पाए।

²⁷ औरौ आमुए यहूदा औरौ सीलास कै भैजै राए, जू आपी आयौ तुऔं ऐजी बातौ बौताए दैंदै।

²⁸ पवित्र आत्मा खै, औरौ आमुखै बै ऐजौ ठीक लागौ कै इनु जौरुरी बातौ खै छोड़ेयौ; तुऔं पांदी हौजौ कुणजाई बोझ ना पौड़ौ;

²⁹ कै तुऐं सैजौ खाणौ नै खांव जू लोगै मूर्तो कै आगै चौढ़ाए राए औरौ गल़ा घोटेयौंदे गोरु को मांस नै खाया औरौ गोरु को लोऊ नै पैया औरौ गौलत सौमबंध शै दूर रौया। इनु दै दूर रौया तौ तोंवारा भला हौंदा। हौजौ कै शुभकामना।”

³⁰ तोबै सै विदा हौयौ अन्‍ताकिया शहर दै पौऊंचै, औरौ सभा खै कौठै कौरेयौ इनु चिट्ठी दैय दै।

³¹ औरौ सै पौढ़ेयौ तैसी उपदैश कै बातौ शै बौहितै खुशी होवे।

³² औरौ यहूदा औरौ सीलासे जू आपी बै पौरमेशवर कै बातौ बौताणौवाल़ै थिए, बौहिती बातौ शै बिशवाशी भाईयों खै उपदैश दैयौ मोजबूत कौरे।

³³ यहूदा औरौ सीलास किछै दूस रौयौ बिशवाशी भाईयों खै आर्शीवाद दैयौ विदा हौवे कै आपणै भैजणौवाल़ै कै धोरे जांव।

³⁴ पौरौ सीलासे अन्‍ताकिया शहर दै रौणौ का फोयसला कौरा, इथकारिए यहूदा इकली ही यरूशलेम शहर कै पाछु हौटा।

³⁵ औरौ पौलुस औरौ बरनबास अन्‍ताकिया शहर दै रौए गौवै औरौ औकै भौरिशै लोगौ कै साथै प्रभु यीशु कै वचन का उपदैश कौरदै औरौ सुसमाचार शुणादै रौवै।

पौलुस औरौ बरनबास दा मनमुटाव

³⁶ किछै दूसौ कै बाद पौलुसे बरनबास खै बौल़ौ, “जिनु-जिनु नोगरो दा आमुए प्रभु का वचन शुणाए राए थिया, आव, हौजौ तिनुमुंजी जायौ आपणै बिशवाशी भाईयों खै दैखुगै कै कैशणै औसौ।”

³⁷ तोबै बरनबासे यहून्ना जैसीखै मरकुस बै बौल़ौ, साथ लोणो का विचार कौरा।

³⁸ पौरौ पौलुसे यहून्ना (मरकुस) कै जू पंफूलिया प्रदेश दा तिनुदा जौई हौए गौआ थिया, औरौ कामौ पांदी तिनकै साथी ना हुटी, साथ निणा आछौ ना सौमझी।

³⁹ तिनुमुंजी ऐशणै बैहस हौए कै पौलुस औरौ बरनबास ऐकी दूजै शै जौई हौए गौवै; औरौ बरनबास, मरकुस कै नियौ जहाज शै साइप्रस टापू कै हौटै गौआ।

पौलुस औरौ सीलास कै दूजै प्रचार यात्रा

⁴⁰ पौरौ पौलुसे सीलास खै चुणा, औरौ बिशवाशी भाईयों खै पौरमेशवर कै अनुग्रह दै सौंपैयौ अन्‍ताकिया शहर शै चालै पौड़ै।

⁴¹ तोबै सै पूरै सीरिया प्रदेश औरौ किलिकिया प्रदेश दै हौटै औरौ कलीसिया कै बिशवाशियौं खै मोजबूत कौरदै बैई हौटै।