प्रेरितो कै काम 14 - सिरमौरी नौवाँ नियम

पौलुस औरौ बरनबास का इकुनियुम शहर दा विरोध

¹ इकुनियुम शहर दो ऐशै हौं कै पौलुस औरौ बरनबास यहूदी लोगौ कै सभा-घोरो दै साथ-साथ हौटै, औरौ ऐशणी बातौ कौरी कै यहूदियों औरौ बैगानै यहूदी लोगौ मुंजीदै बौहितै लोगै बिशवाश कौरा।

² पौरौ बिशवाश ना कौरणौवाल़ै यहूदी लोगै बैगानै यहूदी लोगौ कै मन बिशवाशी भाईयों कै खिलाफ दै भड़कौऊवे, औरौ बैर पौयदा कौर दिया।

³ औरौ पौलुस औरौ बरनबास बौहितै दूसौ तौड़ी तिथै रौवै, औरौ प्रभु कै भोरोशे पांदी बिना डौरे बातौ कौरौ थिए : औरौ पौरमेशवरे तिनुलैई निशान औरौ बौड़ै काम कौरे तिनुऐ साबित कौरौ कै पौरमेशवर कै अनुग्रह कै बारै मुंजी तिनका सौंदेश साचा थिया।

⁴ पौरौ नोगरो कै लोगौ दै फूट पौड़ै गौए थै; इथलैई कैतरै तौ यहूदी नेता कै ढौबौ औरौ कैतरै चोणेयौंदे चैलै कै ढौबौ हौए गौवै।

⁵ जोबै बैगानै यहूदी औरौ यहूदी लोग तिनकै बैज्जती औरौ तिनु पांदी पथराव कौरणौ कारिए आपणै सरदारो समैंत तिनु पांदी दोऊड़ै।

⁶ तौ सै इयौं बातौ कै जाणै गौवै औरौ लुकाउनिया प्रदेश कै लुस्त्रा औरौ दिरबे नोगरो दै, औरौ नेड़िक-बेड़िक कै प्रदेशो दै दौड़ै गौवै।

⁷ औरौ तिथै सुसमाचार शुणादै लागै।

लुस्त्रा शहर दा ऐकी लोंगड़े को ठीक हौणौ

⁸ लुस्त्रा शहर दा ऐक आदमी बौठै रौआ थिया, जैसकै लात कमजोर थिए। सै जन्म शा ही लोंगड़ा थिया, औरौ कौलोंई ना हांडै रैई थी।

⁹ तैणै पौलुस खै बातौ कौरदै बैई शौणै लौआ थिया, औरौ पौलुसे तैसकै ढौबौ ध्यान धोरेयौ दैखौ कै ऐसीखै ठीक हौणौ का बिशवाश औसौ।

¹⁰ औरौ जोर शै बौल़ौ, “आपणै लातो कै साहारै खौड़ा हौ।” तोबै सै उछल़ैयो हांडदा फिरदा लागा।

¹¹ लोगै पौलुस का ऐजा काम दैखैयो लुकाउनिया प्रदेश कै भाषा दो जोर शै बौल़ौ, “देवता आदमी कै रुपो दा हौयौ अमारै धोरे ओतरेयो आए रौआ।”

¹² औरौ बरनबास खै यूनानी देवता ज्यूस को नांव दियु औरौ पौलुस खै हिर्मेस को नांव दियु, जिथुकै सै मुख्य सौंदेश दैणौवाल़ा थिया।

¹³ औरौ ज्यूस कै तैसी मन्दिर कै पूजारी जू तिनकै नोगर कै सामणै थिया, बौल्ल़ोद औरौ फूलो कै हार दैवल़ी पांदी लायौ लोगौ कै साथै बलिदान कौरणा चांव थिया।

¹⁴ पौरौ चोणेयौंदे चैलै बरनबास औरौ पौलुसे जोबै ऐजौ शुणौ, तोबै सै बौहितै दुखी हुवे औरौ आपणै खोटणो फाडे़ औरौ भीड़ौ मुंजी बौढ़ गौवै औरौ जोर शै बौलदै लागै।

¹⁵ “ओए रै लोगौ, तुऐं का कौरौ? आमुए बै तौ तुऔं साए दुख-सुख भुगतणो वाल़ै आदमी औसौ, औरौ तुऔं सुसमाचार शुणौऊं, कै तुऐं इनु बैकार कै चीज़ौ शै जौई हौयौ जियुंदै पौरमेशवर कै ढौबौ आंव, जैणै स्वर्ग औरौ धोरती औरौ समुन्द्र औरौ जू किछै तिंदु औसौ बाणै राए।

¹⁶ तैणै बीतैयौंदे सौमय दै सौब देशो कै आपणै-आपणै बाटो पुंडे हांडणौ दियै।

¹⁷ तौ बै तैणै हमैशा आपणै मोजूद हौणौ का सबूत तिनु आछी चीज़ौ शै दिया जू सै कौरे सौकौ। जू कै गौयण शै पाणी औरौ मौसम कै हिसाब शै फसल दैयौ तुऔं कारिए खाणा औरौ तोंवारै मन कै खुशी लैई भौरदा रौआ।

¹⁸ ऐजौ बौलेयौ बै तिनुऐ लोगौ खै बौड़ी मुशकिल शै रौकै कै तिनु कारिए बलिदान ना कौरौ।

¹⁹ पौरौ कैतरै यहूदी लोगै अन्‍ताकिया शहर औरौ इकुनियुम शहरो शै आयौ लोगौ कै आपणै ढौबौ कौर दियै, औरौ पौलुस पांदी पथराव कौरा, औरौ मौरेयौंदा सौमझेयौ तैसी नोगर कै बायरै घोसिटैयौ लोय गौवै।

²⁰ पौरौ जोबै चैलै तैसकै चोऊ ढौबौ आयौ खौड़ै होवे, तौ सै बिज़यो नोगर दा हौटा औरौ दूजै दूसै बरनबास कै साथै दिरबे नोगर कै हौटै गौआ।

सीरिया कै अन्‍ताकिया शहर कै पाछु आणौ

²¹ तिथकै बाद पौलुस औरौ बरनबास तैसी नोगर कै लोगौ खै सुसमाचार शुणायौ, औरौ बौहितै चैलै बाणैयो, इथकै बाद, सै आपणै बाटो बाटी पाछु जांदै लागै। सै औटेयौ लुस्त्रा शहर कै हौटै। तोबै सै तिथैदै इकुनियुम शहर खै हौटै, औरौ तोबै सै पिसिदिया प्रदेश कै अन्‍ताकिया शहर खै हौटै।”

²² औरौ हरेक नोगर दै चैलो कै मन खै मजबूत कौरदै रौवै औरौ ऐजै उपदैश दैंव थिए कै बिशवाश दै बौणैयौंदे रौव; औरौ ऐजौ बौल़ौ थिए, “कै आमु बौड़ै कौल़ेश शै हौयौ पौरमेशवर कै राज्य दो जाणौ पौड़दौ।”

²³ औरौ तिनुऐ हरेक कलीसिया दै सौबी समूह कारिए अगुवे ठौहरा दियै औरौ उपवास कै साथै प्रार्थना कौरेयौ तिनु प्रभु यीशु कै सौंपै दिए जैसी पांदी तिनुऐ बिशवाश कौरे राए थिया।

²⁴ औरौ पिसिदिया प्रदेश शै हौयौ सै पंफूलिया प्रदेश दै पौऊंचै;

²⁵ औरौ सै पंफूलिया जिले कै पिरगा शहर दै पौरमेशवर का वचन शुणायौ अत्तलिया शहर दै ओऊवे।

²⁶ औरौ तिथैशै जहाज पांदी अन्‍ताकिया शहर कै पाछु हौटै गौवै, जिथदै तिनु पौरमेशवर कै अनुग्रह दै सौंपैयौ तैसी काम कारिए भैजै राए थिए जिथु सै ऐबै पूरु कौरेयौ पाछु आए रौवै थिए।

²⁷ अन्‍ताकिया शहर पोंचैयो, तिनुऐ कलीसिया कौठै कौरे औरौ बौतौऊ, कै पौरमेशवरे अमारै साथी हौयौ कैशणै बौड़ै-बौड़ै काम कौरे! औरौ कैशैखै पौरमेशवरे बैगानै यहूदी लोगौ खै यीशु मसीह पांदी बिशवाश कौरणौ कै लायक बाणै।

²⁸ तिथै पौलुस औरौ बरनबास चैलो कै साथी बौहितै दूसौ तौड़ी रौवै।