प्रेरितो कै काम 12 - सिरमौरी नौवाँ नियम

हेरोदेस का बुरा बर्ताव

¹ तैसी सौमय हेरोदेस राजाए कलीसिया कै किछै लोगौ कै दुख दैणौ कारिए कोयद कौरे दियै।

² तैणै चोणेयौंदे चैलै यूहन्ना कै भाई याकूब कै तलवारी लैई मार दिया।

³ जोबै तैणै दैखौ, कै यहूदी लोग इथलैई खुश हौंव, तौ तैणै पतरस खै बै पाकड़ी दिया, ऐजौ अखमीरी रोटी कै तैयारो का सौमय थिया।

⁴ औरौ हेरोदेस राजाए पतरस खै पाकड़ेयो कोयदखाने दा पोऊवा, औरौ रोखवाल़ी कारिए, चार-चार सिपाहियो खै चार ठाँव दै राखै, इयौं मनशा शै कै फसह कै तैयारो कै बाद लोगौ खै सामणै तैसका न्याय कौरौ।

पतरस का कोयदखाने पौरैशा छुटकारा

⁵ कोयदखाने दै पतरस कै कुछैक दूसौ दै ऊबै रोखवाल़ी कौरे लोए थै, पौरौ कलीसिया कै लोगै तैसी कारिए मन लायौ पौरमेशवर कैईंदै प्रार्थना कौर लोए थै।

⁶ जोबै हेरोदेस राजा पतरस का न्यांव कौरणौ कारिए तैसी लोगौ कै सामणै लाणौ पांदी थिया, तियौं ऐकी राती दा आगै पतरस दु शांगुल़ी दा बांनैयौंदा, दु सिपाहियो कै बीचो दा सोतै रौआ थिया, औरौ रोखवाल़ै दवारो पांदी कोयदखाने कै रोखवाल़ै कौर लोए थै।

⁷ तोबै एकदम प्रभु का ऐक स्‍वर्गदूत पतरस कै नेड़िक खौड़ा हौआ, औरौ तियौं कोठरी दो पेयाशो चौमकौ, औरौ तैणै पतरस कै पोसली पांदी हाथ लायौ तैसी बिजाल़ा, औरौ बौल़ौ, “शट बिज़, तावल़ो कौर।” औरौ तैसकै हाथौ पौरैशी शांगुल़ी खौलेयौ धैनै छुटै गोई।

⁸ तोबै स्‍वर्गदूतै तैसी बौल़ौ, “कमर कोस, औरौ आपणै जूते लाए दै।” तैणै तैशैखैई कौरौ, स्‍वर्गदूतै तैसी बौल़ौ, “आपणा लोइया बाम्बैयौ मैरै पौछौड़ियौ हौए जा।”

⁹ सै निकल़ैयो तैसकै पौछौड़ियौ हौए गौआ; पौरौ ऐजौ नी जाणौ थिया कै जू किछै स्‍वर्गदूतै कौरे लो, सै साचौ औसौ, पौरौ तैणै सौमझौ कै मोऐं दर्शन दैख लौआ।

¹⁰ तोबै सै आगलै औरौ दूजै घड़ी दै निकल़ैयो तैसी लोहे कै फाटक पांदी पौऊंचै, जू आमु शहर कै ढौबौ लोय जांव, सै तिनु कारिए आपी ही खोले गौ, औरौ सै निकल़ैयो ऐकैई गल़ी हौयौ हौटै, तेथियो स्‍वर्गदूत तैसी छोड़ेयौ हौटै गौआ।

¹¹ तोबै पतरसे होशो दै आयौ बौल़ौ, “ऐबै मोऐं साचौ जाणै पोऊँ कै प्रभुए आपणा स्‍वर्गदूत छाड़ैयो मुखै राजा हेरोदेस कै कैद शै छुड़ाए राए, औरौ यहूदी अगुवे कै उमीदो खै नाकाम कौरे दी।”

¹² औरौ ऐजौ जाणैयौ कै पौरमेशवरे तैसी बौचाए दिया थिया पतरस तैसी यहून्ना कै जैसीखै मरकुस बै बौल़ौ तैसकी माँ मरियम कै घोरे ओऊवा, तिथै भौरिशै बिशवाशी लोग कौठै हौयौ प्रार्थना कौरे लोए थै।

¹³ जोबै तैणै घोरो की खिड़की खटखटाई तौ रुंदै नांव की ऐक दासी शुणदै आए।

¹⁴ औरौ पतरस कै आवाज़ पौछेयाणेयौ, तियैं खुशी कै मारै दवार नी खुली; पौरौ दौड़ैयौ भीतरै आए, औरौ बौतौऊ कै पतरस दैवल़ी पांदी खौड़ा औसौ।

¹⁵ तिनुऐ तियौंखै बौल़ौ, “तू पागल औसौ।” पौरौ तियैं बिशवाश शै बौल़ौ, औरौ ओड़ेयौंदे रोए कै ऐजाई पतरस औसौ, तोबै तिनुऐ बौल़ौ, “तैसका स्‍वर्गदूत हौला।”

¹⁶ पौरौ पतरस दवारो पांदी खटखठांदा ही रौआ, औरौ तिनुऐ खिड़की खोले, औरौ तैसी दैखैयो हैरान हौए गौवै।

¹⁷ तोबै तैणै तिनु हाथौ लैई इशारा कौरा कै चुपी रो; औरौ तिनु बौतौऊ कै प्रभुए कैशैकै मुखै कोयदै पौरैशा निकाल़ैयो लाए राए। हौजौ बौल़ौ, “याकूब औरौ तैसकै भाईयों खै ऐजै बात बौताए दैया।” तोबै निकल़ैयो सै ओकी जौगैह दा हौटै गौआ।

¹⁸ झीशो कोयदखाने कै सिपाहियो मुंजी बौड़ै हलचल मच गौए कै पतरस कुकै हौटा।

¹⁹ जोबै राजा हेरोदेसे तैसी जोणो का आदैश दिया औरौ ना भैटी, तौ रोखवाल़ै कैईंदा सवाल जवाब कौरा औरौ जोबै सै तैसी जवाब ना दैय सौकी तौ आज्ञा दै कै सै मार दियै जांव, औरौ सै यहूदिया प्रदेश कै छोड़ेयौ कैसरिया नगर दा जायौ दैणिक दूसौ कारिए रौंदा लागा।

हेरोदेस को कीड़ै पोड़ीयों मोरणो

²⁰ राजा हेरोदेस सोर औरौ सीदोन शहर कै लोगौ शै बैजाए गुस्से थिया। इथकारिए तिनु शहरो कै लोग हेरोदेस शै भैटिंदै ऐक मन हौयौ आए, सौबी शै औगौड़ियौ तिनुऐ बलास्‍तुस शै मौदद मांगै जू राजा का ऐक कर्मचारी थिया। तोबै तिनुऐ हेरोदेस शै सौमझौता कौरणौ कै बौल़ौ जिथुकै सै आपणै खाणौ कारिए राजा कै देश कै भोरोशे थिए।

²¹ जैसी दूसै राजा हेरोदेस तिनु शहरो कै लोगौ शै भैटिणौ कै तरकीब बाणै तैसी दूसै राजा हेरोदेस राज शाही खोटणो बाम्बैयौ सिंहासन पांदी बोठा; औरौ तिनु बखान दैन्दा लागा।

²² तोबै लोग बौलदै लागै, “ऐजै तौ आदमी कै नी ईशवर की आवाज़ औसौ।”

²³ तैसी सौमय प्रभु कै ऐकी स्‍वर्गदूतै तौलोंई तैसी मारा, जिथुकै तैणै पौरमेशवर कै महिमा ना कौरी औरौ तैसकै शोरीर दै कीड़ै पौड़ै गौवै औरौ सै मर गौआ।

²⁴ पौरमेशवर का वचन फौयल़दा गौआ औरौ बिशवाशियौं कै गिनती बौढ़दै लागै।

²⁵ यहूदिया प्रदेश दै यहूदी बिशवाशियौं की मौदद कौरणौ कारिए पौयसै दैणौ कै बाद, बरनबास औरौ शाऊल यरूशलेम शहर शै अन्‍ताकिया शहर कै पाछु ओऊवे, औरौ यहून्ना जैसीखै मरकुस बै बौल़ौ आपी आरी निया।