प्रेरितो कै काम 11 - सिरमौरी नौवाँ नियम

पतरस खै यरूशलेम शहर दो पाछु आणौ

¹ तोबै चोणेयौंदे चैलै औरौ बिशवाशी भाईए जू यहूदिया प्रदेश दै थिए शुणु, कै बैगानै यहूदीए बै पौरमेशवर का वचन मानै पाए।

² औरौ जोबै पतरस यरूशलेम शहर दा ओऊवा, तौ खतना कौरेयौंदे यहूदी बिशवाशी लोग तैसीआरी बैहस कौरदै लागै कै,

³ “तू (बिना खतना कौरेयौंदे) बैगानै यहूदी लोगौ कै घोरे हौटा औरौ तिथै जायौ तिनकै साथी खोऊ।”

⁴ तोबै पतरसे तिनु शुरु दु आखरी तौड़ी जू बातौ कुरनेलियुस कै घोरे होई सौबै शुणैई;

⁵ मोऐं याफा नगर दै प्रार्थना कौरे लोए थै, औरौ बेहोश हौयौ ऐक दर्शन दैखा, कै मानौ ऐक बौड़ी चादर कै जैशणौ चोऊ कुणै दै लोटकैयौंदे, गौयणै पौरैशौ ओतरेयो मैरै धोरे आयो।

⁶ जोबै मोऐं तिथपांदी ध्यान कौरा, तौ धोरती कै चौपाए औरौ जोंगली जानवर औरौ रेंगणैवाल़ै जन्तु औरौ गौयण कै चुड़कुल़ै दैखियै;

⁷ औरौ ऐजै आवाज़ बै शौणै, “ओए रै पतरस ऊबा बिज़, मार औरौ खा।”

⁸ मोऐं बौल़ौ, “ना प्रभु, ना; जिथुकै अपवित्र या अशुध्द चीज़ मोऐं कोदी ना खाए रैई।”

⁹ ऐसी जवाब लैई गौयण पौरैशै दुजाल़ियो आवाज़ आए, “जू किछै पौरमेशवरे शुध्द बाणै राए, तिथु अशुध्द नी बौल।”

¹⁰ तीन बैई ऐशैकैई हौं, तोबै सौबै ठुँ स्वर्ग दो खींचौ।

¹¹ तोबै तौलोंई तीन आदमी जिनु कुरनेलियुसे कैसरिया नगर शै भैजै राए थिए, तैसी घोरे दै आयौ खौड़ै हुवे जिथै आमै थिए।

¹² तोबै पवित्र आत्माए मुखै निशोंक हौयौ तिनुआरी जाणौ कारिए बौल़ौ, औरौ ऐजै छौ भाई बै मैरै ही साथी हौए गौवै, औरौ आमु तैसी आदमी कै घोरे दै हौटै।

¹³ औरौ कुरनेलियुसे बौतौऊ, कै तैणै ऐकी स्‍वर्गदूत खै आपणै घोरे खौड़ा दैखा, जैणै बौल़ौ, “याफा नगर दा आदमी भैजैयो शमौन कै जैसकै पतरस बै बौल़ौए, बौएदै पा।

¹⁴ सै तुऔं ऐशणी बातौ बोताला, जिथलैई पौरमेशवर ताखै औरौ तैरै घोराणे कै सौबी लोगौ खै बौचांदा।

¹⁵ जोबै हांव बातौ कौरदा लागा, तौ पवित्र आत्मा तिनु पांदी तैशैखैई उतरा, जैशैखै पिन्तेकुस्त कै तैयारो मुंजी आमु पांदी उतरा थिया।

¹⁶ तोबै मुखै प्रभु का सैजा वचन याद ओऊवा; जू तैणै बौल़ौ, यूहन्नाए तौ पाणी लैई बपतिस्मा दिया, पौरौ तुऐं पवित्र आत्मा लैई बपतिस्मा पांदै।

¹⁷ औरौ इथकारिए पौरमेशवरे तिनु बै सैजाई दान दैय राए, जू आमु प्रभु यीशु मसीह पांदी बिशवाश कौरणौ शै भैटी रौआ; तौ हांव कुण थिया जू पौरमेशवर कै रौकै सौकु थिया?”

¹⁸ ऐजौ शोणेयो सैजै यहूदी बिशवाशी चुपी रौवै, औरौ पौरमेशवर कै बौड़ाए कौरेयौ बौलदै लागै, “तोबै तौ पौरमेशवरे बैगानै यहूदी कै बै सौदा की जिन्दगी पाणौ कारिए यीशु मसीह पांदी बिशवाश कौरणौ का दान दैय राए।”

अन्‍ताकिया शहर दै शाऊल औरौ बरनबास

¹⁹ स्तिफनुस कै मारै जाणौ कै बाद, कैई बिशवाशी लोगै यरूशलेम शहर कै छोड़ दिया औरौ बैखरै गौवै, सै घुमदै-घुमदै फीनीके प्रदेश औरौ साइप्रस टापू औरौ सीरिया प्रदेश कै अन्‍ताकिया शहर दै पौऊंचै, पौरौ यहूदी लोगौ कै सिवाए कोसी ओकी खै यीशु कै बारै मुंजी सौंदेश ना शुणाए राए थी।

²⁰ पौरौ तिनुमुंजी दै साइप्रस टापू कै रौणौवाल़ै किछै बिशवाशी औरौ कुरेन कै रौणौवाल़ै लोग थिए, जू अन्‍ताकिया शहर दै आयौ बैगानै यहूदी लोगौ खै बै प्रभु यीशु कै सुसमाचार की बातौ शुणादै लागै।

²¹ औरौ प्रभु कै शौकतै तिनु पांदी थै, औरौ बौहितै बैगानै यहूदी लोगै तिनकै सौंदेश पांदी बिशवाश कौरा औरौ प्रभु यीशु पांदी बिशवाश कौरणा शुरु कौर दिया।

²² जोबै तिनकी चौर्चा यरूशलेम शहर कै कलीसिया कै शुणणौ दी आए, औरौ तिनुऐ बरनबास खै अन्‍ताकिया शहर भैजा।

²³ बरनबास तिथै पोंचैयो, औरौ पौरमेशवर कै अनुग्रह खै दैखैयो खुशी हौआ; औरौ सौबी खै उपदैश बौतांदा लागा, कै तन मन लायौ प्रभु शै लिपटै रौंव।

²⁴ बरनबास ऐक आछा आदमी थिया, औरौ पवित्र आत्मा औरौ बिशवाश शै भौरेयौंदा थिया, औरौ औकै भौरिशै लोग प्रभु आरी मिलै गौवै।

²⁵ तोबै बरनबास अन्‍ताकिया शहर खै छोड़ेयौ शाऊल खै जूणौ कारिए तरसुस शहर खै हौटै गौआ।

²⁶ औरौ जोबै तिनुआरी भैटिया तौ तैसी अन्‍ताकिया शहर दा लोऊवा, औरौ ऐशैखै हौं कै शाऊल औरौ बरनबास ऐकी सालो तौड़ी कलीसिया कै साथी भैटिंदा औरौ बौहितै लोगौ खै प्रभु यीशु कै बारै मुंजी बौतांदा रौआ, औरौ चैलै सौबी दै आगै अन्‍ताकिया शहर दै ही मसीह जाणै गौवै।

²⁷ तिनु दूसौ मुंजी किछै बिशवाशी जू पौरमेशवर की बातौ बौताणौवाल़ै थिए, यरूशलेम शहर शै अन्‍ताकिया शहर दै ओऊवे।

²⁸ तिनुमुंजी दै अगबुस नांव कै ऐकी पौरमेशवर की बातौ बौताणौवाल़ै खौड़ै हौयौ पवित्र आत्मा शै सौंदेश पायौ ऐजौ बौतौऊं, कै सौबै धोरती पांदी ऐक बौड़ा काल़ पौड़दा, औरौ सैजा काल़ महाराजा क्लौदियुस कै सौमय दा पौड़ा।

²⁹ तोबै चैलै फोयसला कौरा कै हरेक आपणी-आपणी हैसीयत कै हिसाब शै यहूदिया प्रदेश दै रौणौवाल़ै बिशवाशी भाईयों कारिए मौदद भैजौ।

³⁰ तिनुऐ ऐशैखैई कौरौ; औरौ बरनबास औरौ शाऊल कै हाथौ अगुवो कै धोरे किछै पौयसा भैज दिया।