प्रेरितो कै काम 10 - सिरमौरी नौवाँ नियम

कुरनेलियुस का दर्शन

¹ कैसरिया नगर दा कुरनेलियुस नांव का ऐक आदमी थिया, जू इतालियानी नांव सैनिक गुट का सूबेदार थिया।

² सै पौरमेशवर कै भोक्‍ती कौरौ थिया, औरौ आपणै सौबै कुड़बे समैंत पौरमेशवर शै डौरौ थिया, औरौ गरीब यहूदी लोगौ कै बैजाए दान दैंव थिया, औरौ हमैशा पौरमेशवर शै प्रार्थना कौरौ थिया।

³ ऐकी दूसै, दोफारी कै लमसम ती बोजे तैणै दर्शन दो साफ-साफ दैखौ कै पौरमेशवर कै ऐकी स्‍वर्गदूतै तैसकै धोरे भीतरै आयौ बौल़ौ, “ओए रै कुरनेलियुस।”

⁴ कुरनेलियुसे तैसी ध्यान शै दैखा औरौ डौरेयौ बौल़ौ, “ओए रै मालिक का औसौ?” तैणै तैसी बौल़ौ, “तैरी प्रार्थनाए औरौ तैरै दान याद कारिए पौरमेशवर कै सामणै पौऊंचै रौवै।

⁵ औरौ ऐबै याफा नगर दै आदमी भैज, औरौ शमौन नांव कै ऐकी आदमी खै बोईदै पा जैसीखै पतरस बै बौल़ौए।

⁶ शमौन ऐसी सौमय कुणजाई चामड़े का धान्‍धा कौरणौवाल़ै कै घोरे मैहमान बौणैयौं टीकी रौआ थिया, जैसकौ घोर समुन्द्रो कै किनारे पांदी थियु।”

⁷ जोबै स्‍वर्गदूत कुरनेलियुस शै बातौ कौरेयौ हौटै गौआ, तोबै कुरनेलियुसे दु नोकरो खै, जू तैसकै धोरे हाजिर रौंव थिए तिनुमुंजी दै ऐकी कै बौईदा, जू पौरमेशवर कै भोक्‍ती कौरणौवाल़ा सिपाही थिया।

⁸ औरौ तिनुखै सौबै बातौ बौताएयो याफा नगर दा पतरस खै लाणौ कारिए छाड़ै।

पतरस का दर्शन

⁹ औरौ जोबै कुरनेलियुस कै भैजैयौंदे तीन आदमी हांडदै-हांडदै दूजै दूसै दोफारो कै सौमय नगर कै नेड़िक पौऊंचै, तौ तैसी सौमय पतरस बै छोतौ पांदी प्रार्थना कौरणौ कारिए हौटै गौआ।

¹⁰ तैसी भूख लागै औरौ किछै खाणौ चांव थिया, पौरौ जोबै तिनुऐ खाणौ कै तैयारी कौरे लोए थी तौ सै बेहोश हौए गौआ।

¹¹ औरौ तैणै दैखौ, कै स्वर्ग खोले गौ; औरौ किछै चीज़ कुणजै ऐक बौड़ै चादर कै जैशणै चोऊ कुणै शै लोटकैयौंदे, धोरती कै ढौबौ उतरदै लागै रोए थै।

¹² जिथमुंजी धोरती कै सौबै भान्त कै चौपाए औरौ रेंगणैवाल़ै कीड़ै मकोड़े औरौ गौयण कै चुड़कुल़ै थिए। इनु मुंजी कुणजैई जीव-जन्तु ऐशणै थिए जू अशुध्द थिए औरौ मूसा कै कानून कै हिसाब शै इनु खाणै मोना थिए।

¹³ औरौ तैसकै ऐक ऐशणी आवाज़ शौणै, “ओए रै पतरस बिज़ मार औरौ खा।”

¹⁴ पौरौ पतरसे बौल़ौ, “ना प्रभु, कौलोंई बै नी; जिथुकै मोऐं कौलोंई अपवित्र या अशुध्द चीज़ ना खाए रैई।”

¹⁵ तैसकै दुजाल़ियो आवाज़ शौणै, “जू किछै पौरमेशवरे शुध्द कौरे राए, तिथु तू अशुध्द नी बौल।”

¹⁶ औरौ तीन बैई ऐशैकैई हौं; तोबै तौलोंई सैजै चादर स्वर्ग कै ढौबौ ऊबै टिपै गौए।

कुरनेलियुस कै घोरे पतरस

¹⁷ जोबै पतरस आपणै मनो दा दुविधा दा थिया, कै ऐसी दर्शन का मतलब का हौए सौकौ जू मोऐं दैख राए, तोबै सैजै आदमी जिनु कुरनेलियुसे भैजै राए थिए, शमौन कै घोरो का पोता लायौ दवारो पांदी आयौ खौड़ै हौवे।

¹⁸ औरौ धाव दैयौ पूछदै लागै, “का शमौन जैसकै पतरस बै बौल़ौए, इथैशा मैहमान औसौ?”

¹⁹ पतरस तैसी दर्शन पांदी सोंचै ही लो थियु कै पवित्र आत्माए तैसी बौल़ौ “दैख, ती आदमीए ताखै जौए लौआ।

²⁰ ऊबा बिज़यो उदा जा, बैशक सैजा आदमी बैगाना यहूदी औसौ, इथकारिए निशोंक तिनुआरी हौए जा, जिथुकै मोऐं तिनु भैजै राए।”

²¹ तोबै पतरसे धैनै ओतरेयो तिनु आदमी कै बौल़ौ, “दैखौ, जैसीखै तुऐं जौए लौआ, सै हांव ही औसौ; तोंवारै आणौ कै का बौजैह औसौ?”

²² तिनुऐ बौल़ौ, “कुरनेलियुस सूबेदार जू धरमी औरौ पौरमेशवर शै डोरणोवाल़ा औरौ सौबै यहूदी जाति कै लोगौ दा सुनांव आदमी औसौ, तैणै ऐक पवित्र स्‍वर्गदूतौ शै ऐजै बात पाए राए, कै ताखै आपणै घोरे बौएदैयौ तांव कैईंदा उपदैश शुणौ।”

²³ तोबै तैणै तिनु भीतरै बौएदैयौ तिनुखै रौणौ कै ठाँव दिया। औरौ दूजै दूसै, सै तिनकै साथै हौटा, औरौ याफा नगर कै कुणजैई भाई तैसकै साथै हौटै गौवै।

²⁴ तिजै दूसै सै कैसरिया नगर पौऊंचै, औरौ कुरनेलियुसे आपणै कुड़बे औरौ प्यारे दोस्तो कै कौठै कौरेयौ तिनका इंतजार कौरे लौआ थिया।

²⁵ जोबै पतरस भीतरै आन्दा लागै रौआ थिया, तौ कुरनेलियुस तैसीआरी भैटिया, औरौ तैसकै लातो पांदी पौड़ेयौ तैसी ढाल़ कौरा।

²⁶ पौरौ पतरसे तैसी बिजाल़यो बौल़ौ, “खौड़ा हौं, मैरी आराधना नी कौर हांव बै तौ आदमी औसौ।”

²⁷ औरौ तैसीआरी बातौ कौरेयौ भीतरै हौटा, औरौ भौरिशै लोगौ कै कौठै दैखैयो

²⁸ पतरसे तिनुकै बौल़ौ, “तुऐं जाणौए, कै बैगानै यहूदी लोगौ कै संगति कौरणै या तिनकै इथै जाणौ आमु यहूदी लोगौ कारिए अमारै कानून कै खिलाफ औसौ, पौरौ पौरमेशवरे मुखै बौताए राए कै कोसी आदमी कै अपवित्र या अशुध्द ना बुलू।

²⁹ इथकारिए मुखै जोबै बौईदा गौआ तौ बिना किछै पूछै आगु हौटा। ऐबै हांव पूछु कै मुखै कोसी कामौ कारिए बौएदै राए?”

³⁰ कुरनेलियुसे बौल़ौ, “चार दूस आगै, ऐसी सौमय, मोऐं आपणै घोरे दै दोफारी कै ती बोजे प्रार्थना कौरे लोए थै, कै ऐक आदमी चौमकिला खोटणो बाम्बैयौ, मैरै सामणै आयौ खौड़ा हौए गौआ।

³¹ औरौ बौलदा लागा, ‘ओए रै कुरनेलियुस, तैरी प्रार्थना शौणै पाए औरौ तैरै दान पौरमेशवर कै सामणै याद राए कौरे।’

³² इथकारिए कोसी खै याफा नगर भैजैयो शमौन खै जैसी कै पतरस बै बौल़ौए, बौईद। सै समुन्द्र कै किनारे, चामड़े का धान्‍धा कौरणौवाल़ै शमौन कै घोरे मैहमान औसौ जोबै सै आला, तौ ताखै पौरमेशवर कै ढौबौशा ऐक सौंदेश बौतांदा।

³³ तोबै मोऐं तावल़ै तैरै धोरे लोग भैजै, औरौ तुऐं ठीक कियु जू आए गौआ। ऐबै आमु सौबै इथै पौरमेशवर कै सामणै औसौ, ताकि जू किछै पौरमेशवरे ताखै बौल़ै राए सैजौ शुणु।”

कुरनेलियुस कै घोरे पतरस का उपदैश

³⁴ तोबै पतरसे बौल़ौ, ऐबै मुखै बिशवाश हौए गौआ, कै पौरमेशवर कोसी का पक्ष ना लोंव,

³⁵ यानी हर देश दा जू पौरमेशवर शै डौरौ औरौ धरम कै काम कौरौ सै तिनु अपनावंए।

³⁶ तुऔं तैसी खबर कै बारै मुंजी पोता औसौ, जू पौरमेशवरे अमारै खातिर यानी इस्राएल देश कै लोगौ कै दैय राए थै। तैणै शान्तै कै बारै मुंजी सुसमाचार शुणौऊवा जू लोगौ खै यीशु मसीह पांदी बिशवाश कौरणौ कै दवारा भैटी सौकौ। सै सौबी लोगौ का पौरमेशवर औसौ।

³⁷ सैजा वचन तुऐं जाणौए, जू यूहन्ना कै बपतिस्मा कै प्रचार कै बाद गलील जिले शै शुरु हौयौ सारै यहूदिया प्रदेश दा फोयलै गौआ:

³⁸ पौरमेशवरे कैशैखै नासरत गांव कै यीशु खै पवित्र आत्मा औरौ अनौखी शौकतै लैई अभिषेक कौरा; सै भोलाए कौरदा औरौ सौबी खै जू शैतान कै सोताएयौंदे थिए, आछा कौरदा फिरा, जिथुकै पौरमेशवर तैसकै साथै थिया।

³⁹ औरौ आमुए चोणेयौंदे चैलै लोगौ खै तिनु सौबी बातौ कै बारै मुंजी बौताए लो, जू आमु यीशु कै यरूशलेम शहर दै औरौ बाकी यहूदी देश दै कौरदै दैखा औरौ यरूशलेम कै यहूदी नेताए तैसीखै क्रूसो पांदी लोटकायो मारै दिया।

⁴⁰ पौरौ पौरमेशवरे तिजै दूसै तैसीकै मौरेयौंदे मुंजीदा जियुंदी कौरा, औरौ दिखाए बै दिया।

⁴¹ सौबी लोगै तैसी ना दैखी पौरौ तिनु गवाहै जू पौरमेशवर कै चोणेयौंदे चैलै औसौ जिनुखै पौरमेशवरे औगौड़ियौ ही चोणे राए थिए, मतलब आमु जिनुवै तैसकै मौरेयौंदे मुंजीदै जियुंदी हौणौ कै बाद तैसकै साथी खोऊ पियु;

⁴² औरौ तैणै आमु आज्ञा दै कै सौबी लोगौ मुंजी प्रचार कौरेया औरौ गवाही दैया कै यीशु सैजाई औसौ जैसी पौरमेशवरे जियुंदै औरौ मौरेयौंदे का न्यायी बाणै राए।

⁴³ तैसकै सौबै पौरमेशवर कै बातौ बौताणौवाल़ै गवाही दैंव कै जू कुणिए यीशु पांदी बिशवाश कौरला, तैसी तैसकै नांव कै दवारा पापौ की माफी भैटदै।

बैगानै-यहूदियों पांदी पवित्र आत्मा का आणा

⁴⁴ पतरसे ऐजी बातौ बौल़ै ही लोई थी कै वचन कै सौबै शुणणौवाल़ै पांदी पवित्र आत्मा उतरे गौए।

⁴⁵ औरौ जैतरै खतना कौरेयौंदे यहूदी बिशवाशी पतरस कै साथी आए रौवै थिए, सै सौबै हैरान हुवे कै बैगानै यहूदी पांदी बै पवित्र आत्मा का दान दैय राए।

⁴⁶ जिथुकै तिनुऐ तिनु सांत-भांत की भाषा बौलदै औरौ पौरमेशवर कै बौड़ाए कौरदै शौणै, इथपांदी पतरसे बौल़ौ,

⁴⁷ “का ऐबै कुणिए इनु पाणी लैई रौकै सौकौ कै ऐजै बपतिस्मा नी पांव, जिनुवै आमु साए पौरमेशवर की औरौ शै पवित्र आत्मा पाए राए?”

⁴⁸ औरौ जू लोग कुरनेलियुस कै घोरे पुंडे कौठै थिए, तिनु लोगौ खै पतरसे आज्ञा दै की तिनु यीशु मसीह कै नांव शै बपतिस्मा दिया जांव। तोबै तिनुऐ पतरस शै बिन्ती कौरे, कै किछै दूस हौजौ अमारै साथी रौव। औरौ इथकारिए पतरस औरौ किछै यहूदी बिशवाशी किछै दूसौ कारिए तिथै रौकै गौवै।