प्रेरितो कै काम 1 - सिरमौरी नौवाँ नियम

जाणकारी

¹ मानगिणेयोंदा थियुफिलुस, मोऐं आपणै आगलै किताब दो तुऔं खै तिनु सौबी बातौ कै बारै मुंजी बौताए राए, जिनु बातौ कै यीशुए स्वर्ग दै उठाए जाणौ शी आगै कौरणी औरौ शिखाणी शुरु कौरे रैई थी।

² इदा आगै कै पौरमेशवर तैसीखै स्वर्ग दा लोए गौआ, तैणै आपणै चोणेयौंदे चैलै खै पवित्र आत्मा की शौकतै शै तिनुखै आदैश दियै।

³ औरौ यीशु खै दुख उठाणौ औरौ मौरणौ कै बाद भौरिशै पाकै निशानो लैई आपी खै तिनु जियुंदी दिखांदा रौआ, औरौ चाल़ीश दूसौ तौड़ी सै चोणेयौंदे चैलै खै दैखिंदा रौआ, औरौ पौरमेशवर कै राज्य की बातौ कौरदा रौआ।

पवित्र आत्मा का वादा

⁴ ऐकी सौमय जोबै सैजै ऐक साथै थिए तौ यीशुए चोणेयौंदे चैलै कै आज्ञा दै, “यरूशलेम शहर कै नी छोड़ेया, पौरौ तैसी तौफे का इंतजार कौरदै रौव, जू मैरै पिता पौरमेशवरे तुऔं दैणौ का वादा कौरे राए, जिथकै बारै मुंजी तुऐं मुखै बौलदै बैई शौणै राए।

⁵ जिथुकै यूहन्ना बपतिस्मा दाताए लोगौ कै पाणी लैई बपतिस्मा दिया, पौरौ दैणिक दूसौ कै बाद पौरमेशवर तोंवारै साथै रौणौ कारिए पवित्र आत्मा भैजदा।”

⁶ तेथियोड़े जोबै चोणेयौंदे चैलै दुजाल़ियो यीशु आरी भेटिए तौ तिनुऐ यीशु कैईंदु पूछु, “ओए रै प्रभु, का तू इस्राएल देश कै आज़ाद कौरणौ कारिए औरौ दुजाल़ियो अमारै राज्‍य कै बाणणौ कारिए तैरा सौमय आए गौआ?”

⁷ यीशुए तिनुखै बौल़ौ, “तैसी सौमय औरौ काल़ो खै जाणणौ कै जौरुरत तुऔं ना आथी सिरफ मैरै पिता पौरमेशवर कै धोरे ही तिथु तय कौरणौ का औधिकार औसौ।

⁸ पौरौ जोबै पवित्र आत्मा तुऔं पांदी आला तोबै तुऐं अनौखी शौकतै पांदै, औरौ यरूशलेम शहर औरौ सौबै यहूदिया प्रदेश औरौ सामरिया प्रदेश तौड़ी औरौ सोंईसारी कै हर जौगैह तौड़ी लोगौ कै मैरै बारै मुंजी बौतांदै।”

यीशु का स्वर्ग खै जाणा

⁹ ऐजौ बौलणौ कै बाद यीशु तिनुकै दैखदै-दैखदै पौरमेशवरे तैसीखै स्वर्ग दा ऊबा निया, औरौ ऐकी बादल़ो की बौजैह शै तैसकै चैलै कै तैसी दैखी ना।

¹⁰ औरौ तैसकै जांदै बैई जोबै तिनुऐ गौयणै कै ढौबौ दैखै लो थियु, तोबै एकदम दो आदमी चिटै खोटणो बांबयो तिनकै धोरे आयौ खौड़ै हौवे।

¹¹ औरौ तिनुकै बौलदै लागै, “ओए रै गलील जिले कै आदमियों तुऐं काए खौड़ै हौयौ गौयणै ढौबौ दैख लौ? ऐजाई यीशु जैसी पौरमेशवरे तोंवारै धोरे दा स्‍वर्ग कै ढौबौ उठाए दिया, जैशै तुऐं तैसीखै स्‍वर्ग कै ढौबौ जांदै बैई दैख राए, तैशैकैई सै दुजाल़ियो पाछु आन्दा।”

समूह कै प्रार्थना

¹² जोबै स्‍वर्गदूत हौटै गौवै तोबै चोणेयौंदे चैलै जैतून नांव कै धारो पौरैशै यरूशलेम शहर कै पाछु ओऊवे, जू यरूशलेम शहर शै लमसम ऐकी किलोमीटर कै दूरी पांदी औसौ।

¹³ औरौ जोबै सै शहर दै पौऊंचै तौ सै तैसी उपले वाल़ै घोरो दै हौटै जिथै चोणेयौंदे चैलै पतरस, यूहन्ना, याकूब, अन्द्रियास, फिलिप्‍पुस, थोमा, बरतुल्मै, मत्ती, हलफईस का बैटा याकूब, शमौन जेलोतेस औरौ याकूब का बैटा यहूदा रौंव थिए।

¹⁴ तिनकै साथै तिथैशी बैजाए बैटमाणिशौ थी जिनुवै यीशु कै मौदद कौरे राए थै औरौ यीशु कै माँ मरियम तैसकै भाईयों कै साथै बौठेयो ऐक मन हौयौ प्रार्थना कौरेया कौरौ थिए।

ऐक नौवें चैलै का चुनाव

¹⁵ औरौ तिनु दूसौ दै जोबै लमसम ऐक शौ बीश बिशवाशी कौठै थिए, तोबै पतरस तिनकै बीच मुंजी खौड़ै हौयौ बौलदा लागा।

¹⁶ “ओए रै, भाईयों जौरुरी थियु, कै पवित्र शास्त्र दो यहूदा कै बारै मुंजी लिखैयौंदी बात पूरी हौं, जू पवित्र आत्माए बौहुत सौमय आगै राजा दाऊद कै जरिए यहूदा इस्‍करियोती कै बारै दो बौताए राए थियु कै सै यीशु कै पाकौड़णौ वाल़ै लोगौ का बौतैईया बौणै गौआ।

¹⁷ जिथुकै सै आमु लोगौ मुंजीदा ऐक थिया, औरौ इयौं सेवा कै काम मुंजी मिलैयौंदा थिया।

¹⁸ (तुऐं जाणौए कै यहूदाए धौखै कै कमाए कै पौयसै यहूदी नेताओं कै पाछु दैय दिए। औरौ यहूदाए आपी खै फांशी लाए दै औरौ मुंडो कै ढौबौशा जोमीनो पांदी छुटा औरौ तैसकौ पेट फाटै गौ, औरौ सौबै आन्‍दड़ी बायरै निकल़ै गोई। औरौ तैसकै मौरणौ कै बाद तैसकै पौयसै लैई यहूदी नेताए ऐक बागड़ी मोलै कौरे।

¹⁹ औरौ इयौं बातौ खै यरूशलेम शहर कै सौबै रौणौवाल़ै लोग जाणै गौवै, औरौ इथकारिए सैजै लोग तैसी जौगैह कै आपणी भाषा दै ‘हकलदमा’ यानी ‘लोऊ कै बागड़ी’ बौलदै लागै)।

²⁰ जिथुकै राजा दाऊदे भजन संहिता दो लैखै राए, ‘तैसकौ घोर उजडै़ जांव, औरौ तिथै कुणिए ना बोसो, औरौ राजा दाऊद ओकी जौगैह ऐशैखै बौल़ौ तैसका ठाँव कुणिए ओका लोए लो।’

^21-22 इथकारिए ऐजौ जौरुरी औसौ, कै ऐक ऐशणा आदमी चोणे जांव, जू यीशु मसीह कै सौबै कामौ कै सौमय का गवाह औसौ। प्रभु यीशु खै यूहन्ना कै दवारा बपतिस्मा दैय जाणौ शै लोयो तैसी स्वर्ग कै उठाए जाणै तौड़ी ऐजा आदमी अमारै साथै प्रभु यीशु कै मौरेयौंदे मुंजीदा जियुंदी हौणौ का गवाह बौणौ।”

²³ तोबै तिनुऐ दु आदमी कै चुणै, ऐकी यूसुफ कै, जैसीकै बरसब्बास बै बौल़ौए, जैसकौ उपनांव यूसतुस औसौ, औरौ दूजै को नांव मतियाह औसौ।

²⁴ औरौ ऐजौ बौलेयौ प्रार्थना कौरे, “ओए रै प्रभु, तू जू सौबी कै मोनो कै जाणै, ऐजौ प्रगट कौर कै इनु दु मुंजीदा तुऐं कोसी कै चोणे राए।

²⁵ कै सै इयौं सेवकाई का काम औरौ चोणेयौंदे चैलै का ठाँव लो, जिथुकै यहूदा इस्‍करियोती मौरे गौआ औरौ तैसी ठाँव कै छोड़ेयौ तैसी जौगैह पांदी हौटै गौआ, जिथै तैसी हौणौ चैंई।”

²⁶ तोबै तिनुऐ तिनकै बारै मुंजी चिट्ठी पाई औरौ चिट्ठी मतियाह कै नांव पांदी निकल़ै, औरौ तैसी ग्‍यारो चोणेयौंदे चैलै कै साथै बारवाँ चैला माना।