3 यूहन्ना 1 - सिरमौरी नौवाँ नियमशुभकामनाएँ 1 मोऐं यूहन्नाए कलीसिया कै अगुवे आपणै प्यारे दोस्त गयुस कै ऐजै चिट्ठी लैखै लौए जैसी आरी हांव साचा प्यार कौरु। 2 ओए रै प्यारे, मैरी ऐजै प्रार्थना औसौ कै जैशै तू आपणै बिशवाश दा मजबूत हौए रौआ, तैशैखैई तू सौबी बातौ दी तरककी कौरे औरौ तू ठीक-ठाक रौए। 3 जिथुकै किछै बिशवाशी भाईए आयौ मुखै तैरै बारै मुंजी बौताए राए कै तू कैशैखै भोरोशे कै साथै सौचाई शै जी रौआ तौ हांव ऐजौ शोणेयो बैजाए खुशी हौआ। 4 जोबै बै हांव ऐजौ शुणु कै सैजै लोग मैरै नानड़िया कै जैशणै औसौ औरौ सौचाई कै हिसाब शै जी रौवै तौ ऐजै बात मुखै हौजौ बै खुशी कौरे दैंव। गयुस कै तारीफ 5 ओए रै प्यारे गयुस, तुऐं बौड़ै ईमानदारी शै अमारै साथी बिशवाशी मसीह भाईटु कै मौदद कारिए बौहुत किछै कौरे राए जू सुसमाचार का प्रचार कौरणौ कारिए चोऊ ढौबौ यात्रा कौरौ। इथै तौड़ी कै तू तिनु लोगौ कै बै मौदद कौरे जिनु तू ना जाणै। 6 तिनुमुंजी दै किछै लोग इथै कै कलीसिया कै बिशवाशियौं कै साथै तैरै प्यार कै बारै मुंजी बौताए राए जू तू आपणै मसीहियों शै कौरे। ऐबै हांव तांव कैई बुलू कै ताखै ऐशणै लोगौ कै मौदद कौरणी चैंई जू ऐक जौगैह शै ओकी जौगैह दै सफर कौरौ जिथुकै ऐशै कौरणौ पौरमेशवर कै आछौ लागौ। 7 जिथुकै ऐजै लोग मसीह कै नांव कै लोगौ मुंजी फोयलाणो कारिए घुमदै लागै रौवै थिए, औरौ अबिशवाशी लोगौ कैईंदै किछै मौदद ना लोंव। 8 इथकारिए ऐशणै लोगौ का आपणै घोरे स्वागत कौरणा चैंई, ताकि आमै बै सौचाई कै प्रचार कै काम दा भाग लौए सौकु। दियुत्रिफेस औरौ दिमेत्रियुस 9 मोऐं आगै बै तोंवारै कलीसिया कै बिशवाशियौं कै ऐक चिट्ठी लैखै राए थै, पौरौ दियुत्रिफेस मैरी बातौ कै मानणौ शै मोना कौरौ जिथुकै सै सौदा शै खुद ही कलीसिया का ठोगड़ा बौणणौ चांव। 10 इथकारिए जोबै हांव आन्दा, तौ तोंवारै सामणै तैसकै दवारा कौरेयौंदे सौबै कामौ कै बौताए दैंदा यानी जू अमारै बारै मुंजी बुरी-बुरी बातौ बौल़ौए, औरौ ऐतरो ही नी, सै तौ आपी सुसमाचार प्रचार कौरणौवाल़ै बिशवाशी भाईयों खै ना अपनांव, औरौ जू तिनुकै अपनाणै चांव तिनुखै बै मना कौरौ औरौ तिनुखै कलीसिया दै बायरै निकाल़ै दैंव। 11 ओए रै प्यारे, जू बुराई कै काम कौरौ, तिनु लोगौ कै जैशणै ना बौणौ पौरौ भले काम कौरणौवाल़ै कै जैशणै बौणौ। जू भले काम कौरौए, सै ऐजौ दिखांव कै सै पौरमेशवर कै संतान औसौ, पौरौ जू बुरै काम कौरौ, सै पौरमेशवर कै ना पौछेयाणौ। 12 कलीसिया कै सौबै लोग बौल़ौए कै दिमेत्रियुस ऐक आछा आदमी औसौ औरौ सौचाई कै हिसाब शै जियौंए, औरौ आमै बै ऐजौ बुलू कै सै ऐक आछा आदमी औसौ, औरौ तू जाणै कै आमै जू बौल़ै लो सैजौ साचौ औसौ। आखरी शुभकामनाएँ 13 हांव तुऔं हौजौ बै बौहिती बातौ बौताणी चोऊं पौरौ हांव इनु बातौ कै ऐशैखैई ऐकी चिट्ठी दी ना लिखणी चोऊं। 14 पौरौ हांव आशा कौरु कै हांव तुऔंआरी तावल़ा भैटिंदा औरौ तोबै हांव आमणै-सामणै तुऔंआरी बातौ कौरदा। 15 हांव प्रार्थना कौरु कै पौरमेशवर ताखै शान्तै दैंव। इथै कै मसीह दोस्त ताखै नमशकार कौरौ औरौ तू तिथै कै सौबी दोस्तो कै मैरी तरफ शै नमशकार बौल़ै दैया। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation