2 तीमुथियुस 4 - सिरमौरी नौवाँ नियमवचन का प्रचार कौर 1 जोबै यीशु मसीह राजा कै समान शासन कौरदा आला, सै जियुंदी औरौ मौरेयौंदे दुईनै लोगौ का न्याय कौरदा, पौरमेशवर औरौ यीशु मसीह कै गवाह मानैयौ, हांव तुऔं याद दियायौ आदैश दियु। 2 कै तू पौरमेशवर कै वचन का प्रचार कौर; औरौ सौदा प्रचार कौरणौ कारिए तैयार रो चाहै लोग शुणणा चांव चाहै ना शुणणा चांव। ताखै लोगौ कै तिनकै गौलत काम बौताणै चैंई औरौ तिनकै पाप कारिए तिनु डांट ला, औरौ जोबै तू तिनु सब्र कै साथै शिखांए तौ ताखै तिनका हौंसला बै बौढ़ाणा चैंई। 3 जिथुकै ऐशणा सौमय आन्दा, जोबै लोग खरा उपदैश ना शौणै पांदै पौरौ लोग आपणी ही अभिलाषाओं पाछी चालदै औरौ सै ऐशणै बौहितै शिक्षक कै जौले जू तिनकै अभिलाषाओं कै हिसाब शै प्रचार कौरलै। 4 लोग सौचाई कै ना शुणदै पौरौ झूठी औरौ बोणी बौणाई कथा कहाणियो कै शुणल़ै। 5 पौरौ तू शान्तै शै रो, चाहै ताखै किछै बै हौए जांव औरौ चाहै इथमुंजी कैतरै बै दुख हौलै ताखै सुसमाचार बौताणौ कारिए कड़ी मैहनत कौरणी चैंई। औरौ पौरमेशवर का सेवक हौणै कै नातै ताखै सैजै सौबै काम कौरणै चैंई जू प्रभुए ताखै दैय राए। 6 हांव ताखै ऐजी आज्ञा दियु जिथुकै पौरमेशवर कारिए मैरै सेवा औरौ जीवन खत्म हौंदा लागै रौआ। जिथुकै हांव जाणुए कै हांव तावल़ा ही मौरणौवाल़ा औसौ। 7 जैशै ऐक आछा योध्दा लोड़ाए दै हार ना मानौ तैशैखैई मोऐं बै प्रभु कारिए कड़ी मैहनत कौरणै ना छुड़ी। मोऐं मसीह का दैएयौंदा काम पूरा कौरे राए, हांव प्रभु दा आखरी तौड़ी बिशवाश लायक रौए रौआ। 8 ऐबै जय का मुकुट स्वर्ग दा मुखै ठौल़ौए, जिथुकै मोऐं आपणै जीवन शै पौरमेशवर कै खुश कौरे राए। प्रभु जू धार्मिकता कै साथै सौबी लोगौ का न्याय कौरौ, सै तैसी दूसै मुखै सैजा इनाम तौलौ दैंदा जोबै न्याय कौरणौ कारिए सै औटेयौ आन्दा। पौरौ सै मुखै ही नी पौरौ तिनु सौबी लोगौ कै बै इनाम दैंदा जिनुवै तैसकै औटेयौ आणौ का बैसब्री शै इंतजार कौरे लौआ। तीमुथियुस कै सौंदेश 9 तीमुथियुस, तू मैरै धोरे तावल़ै आणौ कै कौचिश कौर। 10 जिथुकै देमासे इयौं दुनिया कै चीज़ौ शै प्यार राखैयौ मुखै छोड़े दिया, औरौ थिस्सलुनीके शहर खै हौटै गौआ। बिशवाशी भाई क्रेसकेंस गलातिया प्रदेश कै हौटै गौआ औरौ तीतुस दलतिया प्रदेश कै हौटै गौआ। 11 सिरफ लूका मैरै साथै औसौ जोबै तू मुं भैटिंदा दा आईला तौ मरकुस कै बै आपी साथै लाया; जिथुकै सै इथै मैरै काम कौरणौ कारिए मैरा मौददगार हौंदा। 12 तुखिकुस कै मोऐं इफिसुस शहर कै भैजै राए। 13 जोबै तू आईला, तौ सैजौ कोट बै लाया जिथु मोऐं त्रोआस शहर दै करपुस कै घोरे छोड़े राए थियु। मैरै किताबो कै बै लाया, औरौ खास कौरेयौ बाकरै कै चमड़े शै बौणैयौंदे कागजात कै बै लाया। 14 बासणौ बाणणौवाल़ै सिकन्दरे मुं आरी हर तरह शै बुराई कौरी रैई प्रभु तैसी तैसकै बुरै कामौ कै हिसाब शै बौदला दैंदा। 15 ताखै तैसी शै आपणै रक्षा कौरणी चैंई, जिथुकै तैणै मसीह कै बारै मुंजी अमारी शिक्षाओं का विरोध कौरे राए। 16 आगली बैई जोबै हांव रोम शहर कै अदालत दा आपणी बेगुनाई साबित कौरणौ कै हौटा, तोबै मैरै तरफ शै बौलणौ वाल़ा कुणिए बै ना थी, औरौ सौबीए मैरा साथ छोड़े दिया। हांव प्रार्थना कौरु कै पौरमेशवर इयौं बातौ कारिए तिनु माफ कौरौ। 17 पौरौ प्रभु मैरा मौददगार रौआ, औरौ मुखै शौकतै दै; ताकि हांव इथ लायक बौणै सौकु कै यीशु मसीह कै सुसमाचार तिनु लोगौ खै साफ-साफ शुणाए सौकु जू बैगानै यहूदी लोग अदालत दै मौजूद थिए। औरौ प्रभुए मुखै मौत शै बौचौऊंवा ठीक तैशैखै जैशै भूखै शेर कै मुँह शै बौचाया जांव। 18 औरौ प्रभु मुखै हरेक बुरै कामौ शै छुड़ांदा, औरौ सै मुखै सुरक्षा कै साथै स्वर्ग राज्य दा पोऊंचान्दा जिथै सै राज्य कौरौ तैसकै महिमा जुग-जुग हौन्दै रौंव। आमीन। आखरी शुभकामनाएँ 19 प्रिस्का औरौ तियौंकै घोरवाल़ै अक्विला कै, औरौ उनेसिफुरूस कै परिवार कै मैरा नमशकार। 20 बिशवाशी भाई इरास्तुस कुरिन्थुस शहर दा रौए गौआ, औरौ भाई त्रुफिमुस मीलेतुस शहर दा औसौ जिथुकै सै बीमार थिया। 21 तू जाड़ै दा औगौड़ियौ आणौ कै कौचिश कौर। यूबूलुस, औरौ पूदेंस औरौ लीनुस औरौ क्लौदिया, औरौ औकै सौबी बिशवाशी भाईयों का ताखै नमशकार। 22 हांव प्रार्थना कौरु कै पौरमेशवर औरौ तैसकै दया तोंवारै साथ रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation