2 तीमुथियुस 3 - सिरमौरी नौवाँ नियमआखरी दूसौ की चैतावणी 1 तीमुथियुस, हांव चोऊं कै तू ऐजौ जाणै कै मसीह कै पाछु आणौ दै आगै आखरी दूसौ दा बुरा सौमय आन्दा। 2 जिथुकै लोग सिरफ आपी आरी प्यार कौरदै ओकी लोगौआरी नी, धन कै लोभी, डींगमार, घमण्डी, ओकी लोगौ की बैज्जती कौरणौवाल़ै, माँ बापू कै आज्ञा ना मानणोवाल़ै, ओकी लोगौ का सान ना मानणोवाल़ै, अपवित्र, 3 दया ना कौरणौवाल़ै, माफ नी कौरणौवाल़ै, दोष लाणोवाल़ै, औरौ जिनकी इछाएं आपणै काबू दी ना आथी औरौ ढीठ, औरौ भोलाए शै नफरत कौरणौवाल़ै हौंदै। 4 औरौ धौखा दैणौवाल़ै, जिद्दी, घमण्डी औरौ पौरमेशवर कै नी पौरौ सुख विलास कै चाणो वाल़ै हौन्दै। 5 सै पौरमेशवर का आदर कौरणौ कै दिखावा कौरदै, पौरौ सै पौरमेशवर कै अनौखी शौकतै कै बुरै जीवनो शै बौदल़णौ शै इन्कार कौरदै; ऐशणै लोगौआरी सौमबंध नी राख। 6 इनु मुंजीदै किछै लोग लोगौ कै घोरो दै जांव औरौ मूर्ख बैटमाणिशौ खै वश दी कौर दैंव जिनकै दिल तिनकै पाप कै बौजैह शै दोष कै भावनाओं शै भोरेयौंदे हौंव औरौ सौब भान्त कै इछाओं कै वश दै औसौ 7 सै सौदा नुई चीज़ौ शिखदै रौंव पौरौ सौचाई कै बारै मुंजी साची शिक्षा कै कौलोंई ना सौमझौ। 8 ऐजै झूठै शिक्षक साची सौंदेश का विरोध कौरौ जैशै यन्रेस औरौ यम्ब्रेसे मूसा कै खिलाफ हौए रौवै थिए। इनकै दिमाक भ्रष्ट औसौ सोही मायनै दै ऐजै मसीह पांदी बिशवाश ना कौरौ। 9 पौरौ सै जादा देर तौड़ी लोगौ कै धौखा ना दैय सौकदै। जिथुकै जैशै लोगै जाणै पौऊं कै यन्रेस औरौ यम्ब्रेस मूर्ख थिए, तैशैखैई सौब लोग जाणै पांदै कै ऐजै झूठै शिक्षक मूर्ख औसौ। मसीही जीवन दै संघर्ष 10 पौरौ ओए रै तीमुथियुस, तू आछै शै जाणै कै मोऐं का शिखाए लो, औरौ कैशै जीवन जियुं, मैरै जीवन का मकसद का औसौ औरौ मोऐं का बिशवाश कौरे राए। तू जाणैए कै हांव सब्र राखु, औरौ सौबी लोगौआरी प्यार कौरु, औरौ मोऐं बैजाए मुशकिलो सैहन कौरे रैई। 11 लोगै मुखै सोताए राए थिया, जिथकै बौजैह शै मोऐं दुख सैहन कौरा। तुऔं पौता औसौ कै अन्ताकिया, इकुनियुम औरौ लुस्त्रा शहर दै मुं पांदी कैशणै-कैशणै जूल्म हौवे, तोबै बै तिनु सौबी मुंजी शै प्रभुए मुखै छुड़ोऊवा। 12 तू आछै शै जाणैए कै लोग तिनु सौबी कै सतांदै जू मसीह यीशु कै अपनाएयो जीवन बितांव। 13 पौरौ बुरै औरौ धोकैबाज लोग, जादा बुरै काम कौरदै। सै लोगौ कै धौखा दैलै औरौ आपी बै लोगौ शै धौखा खालै। 14 ओए रै तीमुथियुस, तिनु बातौ कै जू तुऐं मुंकैई दी शिखै रैई औरौ जिथपांदी तुऐं बिशवाश कौरे राए। तिनु तू लगातार बिशवाश कै साथै मानदा रौव। आखिरकार, तू जाणै कै ताखै ऐजै सौचाई कुणै शिखाए राए। 15 बचपन शै ही तू पवित्र शास्त्र कै जाणै, जू पौरमेशवर ताखै मसीह यीशु पांदी बिशवाश कौरणौ औरौ बौचाणौ कै ज्ञान दैणौ लायक औसौ। 16 पूरा पवित्र शास्त्र पौरमेशवर कै ढौबौशा औसौ, औरौ लोगौ कै सच शिखाणौ कारिए औरौ डाटणौ कारिए औरौ तिनकै गौलतियौ खै सुधारणो कारिए तिनु आदैश दैणौ कारिए आमु कारिए मौददगार औसौ। 17 ताकि पौरमेशवर कै सेवा कौरणौवाल़ा आदमी सिध्द बौणौ औरौ सौब भान्त कै भले काम कौरणौ कारिए तैयार औरौ काबिल हौं। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation