2 तीमुथियुस 2 - सिरमौरी नौवाँ नियमआछा सैनिक 1 इथकारिए ओए रै मैरा बैटा, तीमुथियुस आपणा हौंसला बौढ़ा, ऐजौ जाणैयौ कै पौरमेशवरे ताखै सैजा अनुग्रह दैय राए जू सिरफ मसीह यीशु कै ढौबौशा आंव। 2 तुऐं मुखै बौहितै लोगौ कै सामणै मसीह कै बारै मुंजी सौंदेश कै शिखांदै बैई शौणै राए। इथकारिए, हांव चोऊं कै तू बै ओकी बिशवाशियौं कै ऐजा ही सौंदेश शिखा जू बिशवाश लायक लोग औसौ, औरौ जू ओकी खै बै ऐजौई शिखाणौ कै लायक हौंदै। 3 मसीह यीशु कै ऐक आछै सैनिक कै जैशणै मैरै साथै दुखो कै सैहन कौर। 4 ऐक सैनिक जू सैना मुंजी काम कौरौ, तैसी सौमय दा सै ओका दुनियादारी का काम ना कौरौ, जिथुकै सै आपणै बौड़ै औधिकारी कै खुश कौरणा चांव। 5 ऐशैखैई जोबै कुणिए ओकी कै खिलाफ दौड़ दा दोऊड़ो, जै सै खेल कै नियमौ का पालन ना कौरौ, तौ कुणिए बै तैसी इनाम ना दैंदा। 6 जू किसान मैहनत कौरौ, फसल का हिस्सा आगै तैसी भैटणा चैंई। 7 सुंच कै ऐजै उदारण का शिखांव, औरौ प्रभु तुऔं कै इनु सौबी बातौ कै सौमझणौ दै मौदद कौरदा। 8 लगातार यीशु मसीह कै बारै मुंजी सुंचदै रौव। सै राजा दाऊद कै पीढ़ी शै औसौ, औरौ पौरमेशवरे तैसी मौरेयौंदे मुंजीदा जियुंदी कौरा; औरौ ऐजा सैजाई सुसमाचार औसौ जू हांव लोगौ कै शिखोऊं। 9 मोऐं कोयदखाने दा ऐक अपराधी कै जैशणा दुख सौयन कौरे लौआ जिथुकै हांव सुसमाचार का प्रचार कौरु। पौरौ कुणिए बै लोग पौरमेशवर कै वचन कै प्रचार कौरणौ शै रौकै ना सौकौ। 10 इथकारिए हांव तिनु लोगौ कै फायदै कारिए सौबै दुख सैहन कौरु, जिनु पौरमेशवरे चोणे राए, ताकि सै बै मसीह यीशु पांदी बिशवाश कौरौ औरौ बौचाए जांव, औरौ तियौं महिमा कै पांव जू सौदा बौणैयौंदे रौंव। 11 ऐजै बात सैजै औसौ, कै जै आमु मसीह कै साथै मौरे गौवै तौ तैसकै साथै जियुंदी बै हौंदै। 12 जै आमु मसीह कारिए दुख सैहन कौरु, तौ आमै तैसकै साथै राज्य बै कौरदै; पौरौ जै आमै बुलू कै आमै मसीह कै ना जाणु तौ सै बै बौलदा कै आमै तैसकै ना आथी। 13 जै आमै मसीह कै प्रति वफादार ना आथी, तोबै बै सै अमारै प्रति वफादार औसौ, जिथुकै सै हमैशा आपणै स्वभाव कै मुताबिक काम कौरौ। आछा कारीगर 14 आपणै लोगौ मुंजी कोसी खै बै इनु बातौ कै बिसरणो नै दै जू मोऐं ताखै बौताए रैई। औरौ पौरमेशवर कै ऐक गवाह कै रुप दी राखैयौ, ताखै तिनु चैतावणी दैणी चैंई कै सै शोब्दो पांदी बैहसबाजी नै कौरौ। ऐशणै बैहसबाजी कोसी कै मौदद ना कौरौ बल्कि तिनु लोगौ कै बिशवाश कै नुकसान पोऊंचाव जू तिनु शुणौए। 15 तू जैतरै कड़ी मैहनत कौरे सौकै तेतरे कौर ताकि पौरमेशवर ताखै ऐक ऐशणै सेवक कै रुप दा पूरी तरह शै अपनाए सौकौ जू आपणै काम की बौजैह शै शर्मिंदा नी हौंव औरौ जू साची सौंदेश कै सोही रीति शै शिखांव। 16 पौरौ दुनिया कै औरौ बैकार बातौ शै बौचेयौंदे रौव, जिथुकै जू लोग ऐशणी बातौ दै हिस्सा लोंव, सै हौजौ बै जादा पौरमेशवर शै दूर हौए जांव। 17 औरौ ऐशणी बातौ शोड़ेयौंदे घाव कै जैशणी फोयली जांव औरौ लोगौ कै बिशवाश कै नाश कौरे दैली जू इनु कै शुणौए। हुमिनयुस औरौ फिलेतुस आदमी तिनुमुंजी दै औसौ। 18 तिनुऐ सौचाई पांदी बिशवाश कौरणा बन्द कौरे दिया। तिनका मानणा औसौ कै पौरमेशवरे औगौड़ियौ ही मौरेयौंदे बिशवाशी कै सौदा कै जीवन कारिए मौरेयौंदे मुंजीदै जियुंदी कौरे राए। इयौं बौजैह शै तिनुऐ बिशवाशियौं कै मसीह कै शिक्षाओं पांदी बिशवाश कौरणौ शै रौकै लौवै। 19 पौरमेशवर कै लोग ऐकी नीयुं कै जैशणै औसौ जू हिलो ना यानी सै हमैशा बिशवाश दै बौणैयौंदे रौंव इयौं नीयुं पांदी ऐजै शोब्द लैखैयौंदे रौंव: “प्रभु जाणौए कै तैसकै लोग कुण औसौ,” औरौ ऐजौ बै कै जू कुणिए बै पौरमेशवर कै आराधना कौरौ तिनु बुराई कौरणै बन्द कौर दैणी चैंई। 20 बौड़ै घोरो दै ना सिरफ सूनु औरौ चांदी ही कै, पौरौ काठ औरौ माटी कै बासण बै हौंव, किछै बासणौ का इस्तैमाल खास मोके पांदी हौं औरौ किछै बासणौ का इस्तैमाल आम मकसदो कारिए हौं। 21 इथकारिए, जू बिशवाशी आपी कै तिनु सौबी बुरै कामौ शै जौई कौरदा, औरौ जैसका जीवन पवित्र हौला सै ऐक कीमती बासणौ कै जैशणा हौंदा जू खास मोके पांदी इस्तैमाल हौं, औरौ इथकारिए तैसका मालिक तैसका इस्तैमाल कौरे सौकदा औरौ सै सौबै भान्त कै आछै काम कौरे सौकौ। 22 इथकारिए, तिनु पापी लालसाओं शै बौचेयौंदे रौया जू जवान लोगौ कै आकर्षित कौरौ। औरौ जू शुध्द मन शै प्रभु का नांव ध्यान कौरौ, तिनकै साथै धार्मिकता, औरौ बिशवाश औरौ मैल मिलाप राखणौ कै कौचिश कौर। 23 पौरौ मूर्खता, औरौ अनजानी शिक्षा शै दूर रौव, जिथुकै तू जाणैए, कै इथलैई झोगड़े हौंव। 24 औरौ प्रभु कै सेवक कै झोगड़ालु नी हौणौ चैंई, पौरौ तैसी सौबी कै साथै दयालु हौणौ चैंई, पौरमेशवर कै वचन कै साफ तरीकै शै शिखाणै दा काबिल हौणौ चैंई औरौ लोगौ कै साथै धीरज राखणा चैंई। 25-26 तैसी दया शै तिनु लोगौ खै सौमझाणे चैंई जू तैसकै खिलाफ औसौ, शैतानै इनु लोगौ कै फोशाए राए औरौ तिनका कैहणा मानै राए। पौरौ पौरमेशवर तिनु पाप छोड़णे औरौ सौचाई खै जाणणौ दै मौदद कौरदा, ताकि सै आपणै होशो दै आंव औरौ तैसदै दूर हौए जांव। शैतानै तिनु धौखै शै सैजौ कौरवाए राए जू सै चांव कै सै कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation