2 तीमुथियुस 1 - सिरमौरी नौवाँ नियमशुभकामनाएँ 1 मोऐं पौलुसे ऐजै चिट्ठी लिखै लोए। पौरमेशवरे मुखै इथकारिए चोणे राए की हांव मसीह यीशु का चोणेयौंदा चैला बौणु ताकि हांव लोगौ खै बौताए सौकु कै तैणै मसीह यीशु दै बिशवाश कौरणौवाल़ौ खै ऐजै सौदा कै जिन्दगी दैणौ का वादा कौरे राए। 2 ओए रै तीमुथियुस, हांव ताखै ऐजै चिट्ठी लिखु, औरौ तू मुं कारिए ऐकी प्यारे बैटै कै जैशणा औसौ। हांव प्रार्थना कौरु कै पिता पौरमेशवर औरौ अमारा प्रभु मसीह यीशु तुऔं कै अनुग्रह औरौ दया औरौ शान्तै दैंव। धन्यवाद औरौ हिम्मत 3 हांव पौरमेशवर का धन्यवाद दियु, जैसकै मोऐं औरौ मैरै पुराणियाए शुद्ध विवेक कै साथै सेवा कौरे राए। जौल़ौ बै हांव प्रार्थना कौरु हांव तैरै नांव का जिक्र कौरणा हमैशा याद राखु। 4 मैरै याद औसौ कै तू कैतरा रुवा थिया जोबै मुखै ताखै छोड़ेयौ जाणौ पौड़ौ इथकारिए ऐबै तांवआरी भैटिणौ कै इछा राखुए, कै खुशी लैई भोरै जोऊं। 5 औरौ मुखै तैरै तैसी खरे बिशवाश कै याद आंव जू मसीह यीशु दा औसौ, जू औगौड़ियौ तैरी नानी लोइस, औरौ तैरी माँ यूनीके दा थिया, औरौ मुखै पाको औसौ, कै तांवदा बै औसौ। 6 इयौं बौजैह शै हांव ताखै याद दियोऊं कै तिनु वरदानो कै औटेयौ इस्तैमाल कौर जू पौरमेशवरे ताखै दैय राए थिए जौल़ौ मोऐं तैरै मुंडो पांदी आपणा हाथ राखा। 7 पौरमेशवरे आमु कै डरपोक ना बाणै रैई। पौरौ तैसका आत्मा आमु कै आत्मिक सामर्थ दैंव, आमु कै ओकीआरी प्यार कौरणौ दै अमारै मौदद कौरौ औरौ आमु कै आत्म संयम दैंव। सुसमाचार कारिए शर्मिंदा नी हौं 8 इथकारिए ओकी लोगौ कै अमारै प्रभु यीशु मसीह कै बारै मुंजी बौताणौ कारिए आमु शर्माणो नी चैंई औरौ ना ताखै इयौं बातौ शै शर्माणो चैंई कै हांव मसीह की सेवा कौरणौ कै बौजैह शै कोयदी दा औसौ बल्कि ताखै तियौं अनौखी शौकतै का इस्तैमाल कौरणा चैंई जू पौरमेशवर ताखै दैंव औरौ सुसमाचार कारिए मैरै दुखो दा मैरा साथ दै। 9 जैणै अमारा उध्दार कौरा, औरौ आमु ऐक पवित्र जीवन जिणौ कारिए बोइदै औरौ तैणै आमु इथकारिए ना बौएदै रैई जिथुकै आमै आछै काम कौरे राए; पौरौ आपणी योजना औरौ तैसी अनुग्रह कै हिसाब शै; जोबै इदै औगौड़ियौ कै पौरमेशवरे दुनिया बाणै, मसीह यीशु कै दुनिया दा मौरणौ कारिए भैजणौ कै दवारा आपणै दया दिखाणौ कै योजना बाणै राए थै। 10 पौरौ ऐबै अमारा उध्दारकर्ता यीशु मसीह आए गौआ, औरौ आमु पांदी आपणा अनुग्रह कौरा तैणै मौत की शौकतै कै हराए दै, औरौ आमु कै दिखोऊ कै सुसमाचार कै जरिए सौदा कै जिन्दगी कारिए ऐक बाट दिखाए राए। 11 पौरमेशवरे मुखै ऐसी सुसमाचार का प्रचार कौरणौ कारिए औरौ चोणेयौंदा चैला बौणणौ कारिए औरौ बैगानै यहूदी लोगौ कै उपदैश दैणौ कै खातिर चोणे राए। 12 औरौ इथ बौजै शै मोऐं इथै कोयदी दा दुख लौआ सौय पौरौ शर्मोऊं ना, जिथुकै हांव मसीह कै जाणुए जैसी पांदी मोऐं बिशवाश राए कौरे, औरौ मुखै पाको पौता औसौ, कै मसीह तैसी दूसौ तौड़ी जौल़ौ तौड़ी सै पाछु ना आंव, तैसी सुसमाचार कै रक्षा कौरणौ दा पूरी तरह शै काबिल औसौ जू तैणै मुखै दैय राए। बिशवाश कै प्रति वफादार 13 मैरै दवारा शोणेयौंदी साची शिक्षा खै आदर्श बाणैयो पालन कौर। बिशवाश औरौ प्यार कै साथै ऐशै कौर जिथुकै तू मसीह यीशु कै साथै एकजुट औसौ। 14 यीशु मसीह कै बारै मुंजी सुसमाचार कै रक्षा कौरौ जू पौरमेशवरे तुऔं दैय राए थिया, पवित्र आत्मा कै मौदद लैई जू आमुदा रौंव। 15 तू जाणैए कै एशिया प्रदेश दै रौणौवाल़ै कैई बिशवाशीए मुखै छोड़े दिया, जिनुमुंजी फूगिलुस औरौ हिरमुगिनेस औसौ। 16 उनेसिफुरूस कै घोराणे पांदी प्रभु दया कौरौ, जिथुकै सै मौखै भैटिंदा ओऊवा औरौ कैई बार मैरै मौदद कौरे, औरौ इथै कोयदी दा मुंआरी भैटिणौ कारिए आणौ खै बै शोर्मेई ना। 17 पौरौ जोबै सै रोम शहर दा ओऊवा, तौ सै हर जौगैह मुखै ज़ौयौ भैटिंदा ओऊवा। 18 हांव प्रार्थना कौरु कै न्याय कै दूसै प्रभु, उनेसिफुरूस कै आपणै महान दया दिखांव। औरौ तुऐं आपी बै आछी तरह शै जाणौए कै तैणै इफिसुस शहर दै मैरै कैतरै मौदद कौरे राए थै। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation