2 थिस्सलुनीकियों 3 - सिरमौरी नौवाँ नियमआमु कारिए प्रार्थना कौरौ 1 ओए रै बिशवाशी भाईयों, आखिर दै, आमु कारिए प्रार्थना कौरौ, ताकि आमै तावल़ै सौबै जौगैह दै प्रभु यीशु मसीह कै बारै मुंजी सौंदेश कै पोऊंचाए सौकु औरौ लोग इथपांदी तैशैखैई बिशवाश कौरौ जैशै तुऐं कौरे राए थिया। 2 ऐजी बै प्रार्थना कौरौ कै पौरमेशवर आमु दुष्ट औरौ बुरै लोगौ कै दवारा नुकसान हौणौ शै बौचांव, जिथुकै बौहितै सारै लोग सुसमाचार कै शोणेयो बिशवाश ना कौरौ। 3 पौरौ प्रभु भोरोशे कै लायक औसौ, सै तुऔं आत्मिक तौर शै मोजबूत कौरदा औरौ दुष्ट शैतान शै तोंवारै रक्षा कौरदा। 4 औरौ आमु प्रभु दा तुऔं पांदी भोरोशा औसौ, औरौ आमुए तुऔं जू किछै कौरणौ कै बौल़ै राए, तुऐं तैशैखैई कौरे लो औरौ कौरदै बै रौया। 5 आमै प्रार्थना कौरु कै प्रभु यीशु मसीह तुऔं दिखांव कै पौरमेशवर तुऔंआरी कैतरा प्यार कौरौ, औरौ सताव खै तैशैखैई सैहन कौरेया जैशैखै मसीहे सैहन कौरे राए। आलस कै बारै मुंजी चैतावणी 6 ओए रै बिशवाशी भाईयों, तैसी औधिकार शै जू प्रभु यीशु मसीहे आमु दैय राए, कै ऐशणै कोसी बै बिशवाशी भाई औरौ बोईणी आरी मिली-जोलैयौ नी रौया, जू सुस्त रौंव, औरौ तिनु नियमौ खै ना मानौ जू आमुए तुऔं शिखाए राए। 7 जिथुकै तुऐं आपी बै आछै शै जाणौए कै तुऔं तैशैखैई जीणु चैंई जैशै आमु जियुं थिए। जौल़ौ आमै तोंवारै बीच रोऊं थिए, तौ आमै आलसी नी थी, पौरौ काम कौरु थिए। 8 औरौ कोसी की रोटी बैली ना खैई; पौरौ मैहनत औरौ कोष्ट शै रात दूस काम धन्धा कौरु थिए, ताकि आमै आपणी जौरुरतौ कारिए तुऔं मुंजीदै कोसी कै भोरोशे दै नै रोऊं। 9 आमुवा औधिकार थिया कै तुऔं शै आपी कारिए खाणौ खियाणौ कै बौल़ै सौकु थिए पौरौ तोबै बै आमुए कड़ी मैहनत कौरे। ताकि आपी खै तुऔं कारिए नमूना बौणु। 10 औरौ जोबै आमै तोंवारै इथै रौए रौवै थिए, तोबै बै आमै सौदा तुऔं खै बुलू थिए, कै जै कुणिए काम ना कौरणा चांव, तौ खाणौ बै ना खांव। 11 आमै शुणौए, कै किछै लोग तुऔं मुंजी आलसी औसौ; औरौ किछै काम ना कौरौ, पौरौ सै लगातार ओकी लोगौ कै कामौ दै दखलबाजी कौरौ। 12 ऐशणै कै आमै तैसी औधिकार शै जू प्रभु यीशु मसीहे आमु दैय राए आज्ञा दियु औरौ सौमझौऊवे, कै आपणै कामौ पांदी ध्यान दैया कौरौ औरौ आपणै रोजी कारिए पौयसै कमाया कौरेया। 13 औरौ तुऐं, ओए रै बिशवाशी भाईयों, भलैई निराश हौए गौवै तोबै बै भोलाए कौरणै नी छोड़ेया। 14 जै कुणिए अमारी इयौं चिट्ठी कै सौंदेश खै ना मानौ तौ सौबी कै बौतांव कै सै कुण औसौ ताकि सौब लोग जाणौ। औरौ तैसीआरी संगति नी राखैया, ताकि सै शर्म महसूस कौरौ। 15 तौ बै तैसकै साथै ऐशणा बर्ताव नी कौरेया जैशैकै सै तोंवारा बौयरै औसौ पौरौ तैसी ऐशैखै सुधारौ जैशै तुऐं आपणै भाई खै सुधारौ। आखरी शुभकामनाएँ 16 हांव प्रार्थना कौरु कै प्रभु, जू शान्तै का स्रोत औसौ सै हर तरह शै तुऔं हमैशा शान्तै दैंदा रौंव: औरौ प्रभु तुऔं सौबी कै साथै सौदा रौंव। 17 मोऐं पौलुसे तुऔं नमशकार कौरणौ कारिए ऐजै चिट्ठी आपणी लिखाए दै लैखै लोए। मोऐं आपणी सौबी चिट्ठी का अंत ऐशैखैई कौरे राए, ताकि सौबी खै पौता चालौ कै ऐजै चिट्ठी मैरै ढौबौशै औसौ। 18 हांव प्रार्थना कौरु कै अमारै प्रभु यीशु मसीह का अनुग्रह तुऔं सौबी पांदी लगातार बौणेयौंदा रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation