2 थिस्सलुनीकियों 2 - सिरमौरी नौवाँ नियम

पाप का मर्द यानी विनाश का बैटा

¹ ओए रै बिशवाशी भाईयों, अमारै आपणै प्रभु यीशु मसीह कै पाछु आणौ कै बारै मुंजी औरौ तैसी सौमय कै बारै मुंजी किछै बौताणौए, जोबै आमै प्रभु आरी ऐकी साथै भैटिंदै।

² जै तुऐं शुणौए कै प्रभु यीशु कै औटेयौ पाछु आणौ कु दूस आगै शै ही आए गौ तौ आपणै विचारो दै काल़ैयौ घबराए नी जाया। जै कुणिए ऐजी हौणौवाल़ी बातौ कै रुप दै या शिक्षा या ऐशणै चिट्ठी जू मानौ कै अमारी तरफ शै तिनु भैटी रोए, तौ तिनका बिशवाश ना कौरेया।

³ इनु बातौ कै बारै मुंजी धौखै दै नी आया, जिथुकै प्रभु यीशु कै पाछु आणौ दा आगै लोग पौरमेशवर का विरोध कौरदै औरौ सैजा दुष्ट आदमी जैसी पौरमेशवर नरक दा नाश कौरदा, सै जौरुर प्रगट हौंदा।

⁴ सै पौरमेशवर औरौ ओकी सौबै चीज़ौ कै जिनकै लोग पूजा कौरौ औरौ पौरमेशवर कै रुप दै सुंचौए, विरोध कौरदा औरौ सै दावा कौरदा कै सै तिनु सौबी शै जादा बौड़ा औसौ इथै तौड़ी कै सै पौरमेशवर कै मन्दिर दा बोठेयो आपी खै सौबिका पौरमेशवर बौतांदा।

⁵ बिसरेया नी कै हांव तुऔं खै ऐजी बातौ बौतौऊं थिया, जोबै हांव तोंवारै साथै थिया।

⁶ सैजा दुष्ट इबी तौड़ी प्रगट नी हौए रैई जिथुकै किछै ऐशणौ औसौ जिथुवे तैसीखै इबी तौड़ी रौकै राए। तुऔं जौरुर याद हौल़ौ सैजौ का औसौ जिथुवे तैसी रौकै राए, जोबै पौरमेशवर कै दवारा ठौहराएयौंदा सोही सौमय आन्दा, तोबै सैजा दुष्ट आदमी प्रगट हौंदा

⁷ तैसी दुष्ट आदमी की शौकतीए ऐबै ऐसी दुनिया दा गुप्‍त तरीकै शै काम कौरे लौआ, पौरौ कुणिए औसौ जू तैसी रौकेयौ राखौ। औरौ सै हमैशा तैसी रौकेयौ राखदा जांव तौड़ी सै तैसी बाटौ पौरैशा नी हटाए दैंव।

⁸ तोबै सैजा दुष्ट प्रगट हौंदा, पौरौ बाद मै जोबै प्रभु यीशु आला, तौ सै ऐक आदैश कै दवारा औरौ आपणै हौणौवाल़ी महिमा शै तैसी दुष्ट कै मारै दैंदा।

⁹ दुष्ट शैतान आपी तैसी दुष्ट आदमी कै आपणै शौकतै दैंदा। औरौ सै सौब भान्त कै झूठै चौमत्कार, निशान औरौ अनौखै काम कौरदा जिथलैई लोग ऐजौ सुंचदै लागदै कै ऐजै काम पौरमेशवरे कौरे लौवै।

¹⁰ औरौ सै हर तरह कै बुरै काम औरौ तिनु लोगौ खै धौखा दैंदा जू पौरमेशवर कै दवारा नाश हौंदै जिथुकै सै तैसी सौचाई पांदी बिशवाश कौरणौ शै इन्कार कौरौ जू तिनु बौचाए सौकौ।

¹¹ औरौ इथकारिए पौरमेशवर तिनुदा ऐक महाभ्रम कै भैजदा ताकि सै दुष्ट कै बातौ पांदी बिशवाश कौरौ।

¹² औरौ पौरमेशवर तिनु सौबी लोगौ का न्यांव कौरदा, जू यीशु मसीह कै बारै मुंजी साची सौंदेश पांदी बिशवाश ना कौरौ, औरौ दुष्ट तरीकै शै प्यार कौरौ।

मोजबूत बौणैयौंदे रौव

¹³ ओए रै बिशवाशी भाईयों, आमुखै सौदा पौरमेशवर का धन्यवाद कौरणा चैंई जिथुकै प्रभु तुऔंआरी प्यार कौरौ। पौरमेशवरे दुनिया कै रौचणौ दै आगै ही तुऔं चोणे राए ताकि तुऔं बौचाए सौकौ। तुऐं यीशु मसीह कै बारै मुंजी साची सौंदेश पांदी भोरोशा कौरणौ शै औरौ तैसकै पवित्र आत्मा कै दवारा पवित्र बौणणौ शै तुऔं मोक्ति पाणौ कारिए चोणे राए।

¹⁴ जैसी सुसमाचार का आमुए तुऔं प्रचार कौरे राए तिथकै दवारा पौरमेशवरे तुऔं बौचाणौ कारिए बौएदै राए ताकि तुऐं अमारै प्रभु यीशु मसीह कै महिमा दै शामिल हौए सौकौ।

¹⁵ इथकारिए ओए रै बिशवाशी भाईयों, तिनु बातौ पांदी बिशवाश कौरदै रौव जू आमुए तुऔं शिखाए रैई थी, जोबै आमै तोंवारै साथै थिए या जू चिट्ठी आमुए भैजै।

¹⁶ आमै आपी प्रभु यीशु मसीह शै, औरौ अमारै पिता पौरमेशवर शै प्रार्थना कौरु जू आमुआरी प्यार कौरौ औरौ जैणै आपणै अनुग्रह शै आमु सौदा हौंसला औरौ मोजबूत आश दैय राए।

¹⁷ हांव ऐजै बै प्रार्थना कौरु कै सै तुऔं हौंसला दैंव औरौ मोजबूत कौरौ ताकि तुऐं सैजौ सौबै जू आछौ औसौ तिथु कौरणौ औरौ बौताणौ जारी राखौ औरौ तुऔं सौबै आछै काम, औरौ वचन दै मोजबूत कौरौ।