2 पतरस 3 - सिरमौरी नौवाँ नियम

प्रभु कै आणौ का दूस

¹ ओए रै बिशवाशी भाईटु, ऐबै हांव तुऔं ऐजी दूजै चिट्ठी लिखु, मोऐं तुऔं ऐजी दुईनै चिट्ठी इथकारिए लिखी ताकि जू बातौ तुऐं आगै शै ही जाणौए, तिनकै बारै मुंजी तुऔं याद दियाणौ कै दवारा हांव तोंवारै मन दै साफ विचारो खै पौयदा कौरे सौकु।

² मोऐं ऐशै इथकारिए कौरे लौ जिथुकै हांव चोऊं कै तुऐं तिनु वचनो खै याद राखौ, जू पौरमेशवर कै बातौ बौताणौवाल़ै बैजाए औगौड़ियौ दी बौल़ै राए थिए औरौ अमारै मोक्ति दैणौवाल़ै, प्रभु यीशु मसीह की शिक्षाओं खै याद राखौ जू तुऔं तिनु चोणेयौंदे चैलै शिखाए राए थी जू तोंवारै धोरे आए रौवै थिए।

³ सौबी दै खास बात, तुऔं पौता हौणा चैंई कै मसीह पाछु आणौ दै आगै आखरी दूसौ दै ऐशणै लोग हौन्दै जू तोंवारा मजाक उड़ांदै जिथुकै तुऐं बिशवाश कौरौ कै मसीह औटेयौ पाछु आन्‍दा। सै आदत शै मजबूर हौयौ बुरै काम कौरदै जू तिनु खुश कौरौ।

⁴ औरौ सै बौलदै, “तैसका आणौ का वादा साचा ना आथी! सै कौलोंई ना आन्‍दा, जिथुकै जू शुरुआत दै अमारै अगुवे थिए, सै सौबै जोणे मौरे गौवै, पौरौ तोबै बै किछै ना बौदल़ी। चीज़ौ तैशैखैई हौन्दी लागी रौई जैशै सै तौलौ हौंव थी जौल़ौ पौरमेशवरे दुनिया कै बाणै थै।”

⁵ सै जाणै बौझेयौ इयौं बातौ खै नज़र अंदाज कौरौ कै दुनिया कै शुरुआत दु, पौरमेशवरे बौल़ौ औरौ गौयणै बौण गौए। आपणै वचन लैई तैणै धोरती पौरैशौ पाणी खै जौई कौरौ औरौ पाणी मुंजीदै शुकै जोमीन बायरै निकाल़ी।

⁶ इथु पाणी लैई तैणै इयौं दुनिया खै नाश कौरे दै जू तैसी सौमय बजूद दै थी। तैणै ऐक जौराल़ी बौरखा भैजी औरौ तिथुवै धोरती पांदी बाढ़ लाए दी औरौ सौबी जियुंदी प्राणियों खै नाश कौरे दियै।

⁷ जैशैकै पौरमेशवरे धोरती कै बाणणौ कै आज्ञा दैय राए थी, तैशैखैई तैणै आज्ञा दी कै इबी दुनिया तांव तौड़ी बौणैयौंदे रौंव जांव तौड़ी सै तिनु आगै लैई जोल़ाए ना दैंव तैणै तिनु तैसी दूसौ तौड़ी राखै राए जौल़ौ सै सौबी लोगौ का न्याय कौरला औरौ तिनु लोगौ का नाश कौरे दैन्दा जू तैसकै इज्जत ना कौरौ।

⁸ ओए रै बिशवाशी भाईटु, इयौं ऐकी बातौ खै कौलोंई नी बिसरेया कै पौरमेशवर कारिए ऐक दूस ऐक हजार सालो कै जैशणौ औसौ औरौ ऐक हजार साल ऐकी दूसौ कै जैशणौ औसौ। प्रभु कारिए ऐक दूस औरौ ऐक हजार सालो सौबै ऐक बोराबर औसौ।

⁹ किछै लोग सुंचौए कै प्रभु आपणै पाछु आणौ कै वादै खै पूरा कौरणौ खै बैरियाए लौ, पौरौ प्रभुए तैशैखै ना बैरियाए लैई। पौरौ, तैणै तोंवारै साथै सब्र राखै राए। जिथुकै सै कोसी कै बै नाश ना कौरणै चांव। पौरौ चांव औसौ कै सौबै जोणे पाप कौरणै छोड़े दैंव औरौ गौलत काम कौरणै बंद कौरे दैंव औरौ तैसकै धोरे आए जांव।

¹⁰ पौरौ मसीह पाका पाछु आन्‍दा। सै एकदम ही पाछु आए जांदा, जैशैकै कुणिए चोर एकदम ही आए जांव। तैसी सौमय गौयणै दा गुड़कौ का शाद हौंदा, औरौ गौयण छिपै जांदै। गौयणै दौ सौबै ठुँ, यानी सुरज, चांद औरौ तारै पूरी तरह शै जौल़ै जांदै। तैसी दूसै पौरमेशवर तिनु सौबी कामौ खै प्रगट कौरे दैन्दा जू लोगै कौरे राए ताकि तिनका न्याय कौरे सौकौ।

¹¹ ऐजौ तय औसौ कै पौरमेशवर सौबी चीज़ौ कै ऐशैकै नाश कौरे दैन्दा, तौ तुऐं पाकौ जाणौए कै तुऔं कैशैकै बर्ताव कौरणा चैंई। तोंवारा बर्ताव साचा हौणा चैंई औरौ जू किछै बै तुऐं कौरौए तिथलैई पौरमेशवर कै खुश कौरौ।

¹² जैशैकै तुऐं तैसी दूसौ कै ठोल़नाए कौरौ जौल़ौ पौरमेशवर दुनिया का न्याय कौरणौ कारिए पाछु आन्‍दा, तौ तैसी दूसौ कै तावल़ै आणौ कारिए आपणी औरौ शै पूरै कौचिश कौरौ। तैसी दूसै, आग भौबकी जांदै औरौ गौयणै का नाश कौरे दैंदै, औरौ तिथकी गर्मी गौयणै दौ सौबै ठुँ पिघलाए दैन्दौ।

¹³ पौरौ आमै बिशवाशीए ऐजै उमीद कौरे लौए कै पौरमेशवर ऐक नोऐं गौयण औरौ नोऐं धोरती बाणदा जैशै तैणै वादा कौरे राए। तिथै सिरफ धरमी लोग ही रौन्दै।

जागदै औरौ तैयार रौंव

¹⁴ इथकारिए ओए रै बिशवाशी भाईटु, जोबै कै तुऐं तैसी दूसौ का इंतजार कौरे लौआ जौल़ौ पौरमेशवर दुनिया का न्याय कौरला तौ तुऔं जादा कौचिश कौरणै चैंई ताकि सै तुऔं शुद्ध औरौ निर्दोष औरौ आपणै साथै शान्तै शै पांव।

¹⁵ औरौ अमारै प्रभु कै सब्र खै ऐक मौकै कै रुप दा दैखौ जू तैणै तुऔं कै आणौवाल़ै न्याय शै बौचणौ कारिए दैय लौआ। ऐजौ पौलुसे बै, जू अमारा प्यारा साथी बिशवाशी औसौ, तुऔं ऐकी चिट्ठी दा तैसी ज्ञान का इस्तैमाल कौरदै बैई लिख राव थियु, जू पौरमेशवर तैसी दैंव।

¹⁶ ऐशैखैई आपणी सौबी चिट्ठी दौ जू पौलुसे बिशवाशी खै लैखै रैई, तैणै तैशैखैई इयों चिट्ठी दी ऐशणी बातौ लैखै रैई जू सौमझणी चैईथी औसौ। जिनु लोगै आछी शिक्षा ना पाई, औरौ जिनु का बिशवाश पाका या मजबूत ना आथी सैजै लोग इनु चैईथी बातौ का गौलत तरीकै शै बखान कौरौ, औरौ पवित्र शास्त्र का बै गौलत बखान कौरौ। ऐशै कौरेयौ सैजै लोग पौरमेशवर कै दवारा आपणै नाश हौणौ कै बौजैह बौणौ।

¹⁷ इथकारिए ओए रै प्यारो तुऐं आगैई जाणौए कै ऐजी बातौ हौन्दीए। इथकारिए, चौकश रौव ताकि जू लोग नियमौ कै ना मानौ सै तुऔं कैई झूठु बौलेयौ तुऔं भौटकाए नी दैंव। तौ तुऐं साची बातौ पांदी बिशवाश कौरणा बंद कौरे दैंदै, जिथपांदी तुऐं ऐक सौमय मोजबूती शै बिशवाशी कौरे राए थिया।

¹⁸ पौरौ तुऔं अमारै प्रभु औरौ मोक्तिदाता यीशु मसीह कै अनुग्रह खै औरौ जादा सै जादा महसूस कौरणा चैंई, औरौ तैसकै प्रति आपणै सौमझ दौ बौढ़णौ चैंई। तैसकै महिमा ऐबै औरौ हमैशा कारिए हौन्दै रौंव। आमीन।