2 पतरस 2 - सिरमौरी नौवाँ नियमझूठै शिक्षक 1 जैशैखै बैजाए सौमय औगौड़ियौ इस्राएली लोगौ मुंजी झूठै पौरमेशवर कै बातौ बौताणौवाल़ै दैखियौं थिए, तैशैखैई तुऔं मुंजी झूठै शिक्षक दैखिंदे। सै झूठी शिक्षाओं खै चुपी शै फोयला दैंदै, जू लोगौ खै मसीह पांदी बिशवाश कौरणौ शै रौकै दैंव। ऐजै झूठै शिक्षक मसीह खै आपणा प्रभु मानणौ शै बै मोना कौरे दैंदै, जैणै तिनु पाप कै शौकतै शै आज़ाद कौरे राए। ऐशैखैई सै आपी खै एकदम नाश कौरवाए दैंदै। 2 पौरमेशवर कै बौहितै लोग इनु शिक्षको कै बुरै कामौ कै नकल कौरदै, औरौ जू किछै बै सै कौरौए तिथकै बौजैह शै लोग सौचाई कै बाटौ कै बारै मुंजी बुरी-बुरी बातौ कौरदै। 3 ऐजै शिक्षक लालची हौंदै, औरौ सै बौणी बाणैयौंदी कहाणी शुणायौ तुऔं धौखा दैंदै ताकि तुऔं कैईंदै पौयसै कमाए सौकौ। पौरमेशवरे बैजाए सौमय औगौड़ियौ ही फोयसला कौरे राए थिया कै सै तिनु सौजा दैंदा औरौ सै ऐशै कौरणौ कारिए तैयार औसौ। सै निशोंक हौयौ तिनु नाश कौरदा। झूठै शिक्षको का न्याय 4 तुऐं जाणौए कै बैजाए सौमय औगौड़ियौ जोबै किछै स्वर्गदूतै पौरमेशवर कै आज्ञा ना मानी, तौ तैणै तिनु तिनकै कौरेयौंदे कै सौजा दै। तैणै तिनु नरक दै फेरकाए दियै, औरौ तिनुखै इनारै वाल़ै कोयदी दै तैसी दूस तौड़ी राखै राए जोबै सै तिनका न्याय कौरदा औरौ तिनु सौजा दैंदा। 5 तुऐं ऐजौ बै जाणौए कै जोबै बैजाए सौमय औगौड़ियौ इयौं दुनिया दै रौणौवाल़ै लोगै पौरमेशवर का डौर ना मानी तौ तैणै तिनकै बुरै कामौ खै अनदैखा ना कौरी जू तिनुऐ कौरे लौवै थिए। पौरौ तैणै पूरी दुनिया पांदी पाणी भैजैयो तिनु ऐशै सौजा दै कै सै सौबै डोबै गौवै। पौरौ नूह समैंत तिनु आठी लोगौ खै बौचाए, जिनुवै पौरमेशवर कै साथै सोही हौणौ कै बारै मुंजी प्रचार कौरे राए थिया। 6 तुऐं ऐजौ बै जाणौए कै बैजाए सौमय औगौड़ियौ पौरमेशवरे सदोम औरौ अमोरा कै शहरो दै रौणौवाल़ै लोगौ खै सौजा दै जिथुकै तिनुऐ बुरै काम कौरे राए थिए। इथकारिए तैणै तिनु पूरी तरह शै भस्म कौरे दियै जांव तौड़ी कै सिरफ राख ना रौए गौई। ऐशै कौरेयौ तैणै दिखोऊ कै तिनु लोगौ कौ का हौंदौ जू तैसका डौर ना मानौ। 7 पौरौ इदा आगै तैणै सदोम का नाश कौरा, तैणै लूत खै जू ऐक धरमी आदमी थिया, शहर शै निकाल़ै दिया औरौ ऐशैखैई तैसी बौचौऊंवा। लूत बैजाए दुखी थिया जिथुकै सदोम कै लोग कोसी बै नियम खै ना मानौ थिए औरौ शर्मनाक काम कौरौ थिए। 8 लूत तिनु बुरै लोगौ मुंजी रौंव थिया, औरौ सै हर दूस तिनु बुरै कामौ खै दैखौ थिया जू सै कौरौ थिए औरौ तिनु बुरी बातौ खै शुणौ थिया जू सै बौल़ौ थिए, औरौ ऐजौ सौबै तैसी बैजाए पौरैशान कौरौ थियु, जिथुकै सै ऐक धरमी आदमी थिया। 9 जोबै कै प्रभुए इनु सारी चीज़ौ खै कौरे राए, तौ इथलैई पौता चालौ कै सै जाणौए कै तैसकै लोगौ खै तिनकै दुखो लैई कैशै छुड़ाणे, औरौ कैशै बुरै लोगौ खै न्याय कै दूस तौड़ी लगातार सौजा दैणी। 10 पौरमेशवर सौबै दुष्ट लोगौ खै सौजा दैंदा जू आपणै बुरी, औरौ गौंदी इछाओं कै हिसाब शै काम कौरौ औरौ जू आपी पांदी पौरमेशवर कै औधिकार खै ना मानौ। सैजै घमण्डी लोग औसौ। सैजै महिमामय स्वर्गीय प्राणीयों कै बारै मुंजी बैज्जती कौरेयौ बुरु बौलणौ शै ना डौरौ। 11 जौबेकै स्वर्गदूत झूठै शिक्षको शै कौथी बलवान औरौ शौकतीशाली औसौ, पौरौ तोबै बै जोबै सै पौरमेशवर कै सामणै तिनु पांदी दोष लांव, तौ सै तिनकै बैज्जती ना कौरौ। झूठै शिक्षको का भ्रष्ट हौणा 12 पौरौ ऐजै झूठै शिक्षक जोंगली जानवर कै जैशणै औसौ। इनु जानवरो कैई पौता ना आथी कै कैशै सुंचणौ चैंई औरौ इनका मकसद सिरफ पाकड़ा जाणा औरौ मारै जाणा औसौ। ऐजै लोग किछै बै कौरौए जू इनकै मन दो आंव, औरौ इथै तौड़ी कै ऐजै तिनु चीज़ौ कै बुराए कौरौ जू इनु सौमझ बै ना आंव। ऐजै निशोंक हौयौ नाश हौए जांदै। 13 जिथुकै सै आपणै कपटै तरीकै कै खुशी लोंव, सै दूसौ दुफारियौ बुरै सुख-चैन शै खाए पियौ खुशी मौनांव, सै तिनु दागौ औरौ धाबै साए औसौ जू हर बार तोंवारै खातिर बुरी तरह शै मुँह छिपाणो कै बौजैह बौणौ जोबै सै तोंवारै साथै खाणौ खांव। 14 सैजै सौबी बैटमाणिश कै साथै गौलत सौमबंध बाणणा चांव, जिनु सै दैखौए। सैजै पाप कौरणौ कै मौकै तलाशणौ शै कौलोंई ना चुकौ। सै तिनु लोगौ खै धौखा दैंव जू मन शै मसीह पांदी मोजबूती शै भोरोशा ना कौरौ, औरौ सै तिनु पाप कै ढौबौ लौए जांव। तिनकै मन जादा शै जादा चीज़ौ खै पाणौ कै इछा कै बौजैह शै पौरमेशवर तिनु सौजा दैंदा। 15 तिनुऐ सैजौ कौरणौ बंद कौरे दियु जू सोही औसौ, औरौ तिनुऐ तैशणैई बुरै काम कौरणै शुरु कौरे दियै, जू कै बओर कै बैटै बिलामै बैजाए सौमय आगै कौरे राए थिया। तैणै गौलत काम कौरेयौ पौयसा कमाणा पसंद कौरा। 16 पौरौ पौरमेशवरे बिलाम खै तैसकै बुरै कामौ कारिए तैसकी गदही लैई फौटकार लौआए। भलैई गदहीयाँ बौलांव ना पौरौ तियौं गदहीए बिलामवारी ऐकी आदमी साए बात कौरे, जोबै सै बिलाम खै राजा शै भैटिणौ कारिए लादैयौ जांदै लागै रौए थै, औरौ तियैं तैसी सौमय बिलाम खै बैवकूफी भरा काम कौरणौ शै रौकै पौऊवा। 17 ऐजै झूठै शिक्षक तिनु पाणी कै झौरनै कै जैशणै बैकार औसौ, जू शुकै गौवै। सै तिनु बादल़ौ कै जैशणै बैकार औसौ, जिनु तैज हावा उड़ाएयो लौए जांव, इदै आगै कै बौरखा हौए सौकौ, पौरमेशवरे तिनु कारिए ऐक ऐशणा ठाँव तैयार कौरे राए जू पूरी तरह शै इनारौ औसौ। झूठै शिक्षको कै धौखै 18 जोबै सै लोगौ खै शिक्षा दैंव, तौ सै बैकार कै औरौ घमण्ड शै भौरेयौंदे शब्दो का इस्तैमाल कौरौए। सै लोगौ कै बौतांवे कै सै तिनु बैईजज्त कामौ खै कौरे सौकौ जू तिनकै शोरीर कौरणा चांव औरौ सै तिनु लोगौ कै औटेयौ पाप कौरणौ कारिए भौरमाए दैंव जू इबी-इबी ऐशणै दुष्टता कै जिन्दगी शै बौचेयौ निकल़ै रौवै। 19 झूठै शिक्षक लोगौ खै बौतांवे कै जू किछै बै सै कौरणौ चांव तिथु कौरणौ कारिए आज़ाद औसौ, जिथुकै तिनका कुणजाई मालिक ना आथी। पौरौ सौचाई ऐजै औसौ कै सै आपी बै आपणै बुरै आदत कै गुलाम औसौ। जिथुकै जू कुणिए बै कोसी पाकी चीज़ौ का आदी हौंव, सै जू किछै कौरौए तिथी लैई गुलाम बाणै जांव। 20 लोग दुनिया कै दुष्टता शै बौचै गौवै जोबै तिनुऐ यीशु मसीह कै आपणै प्रभु औरौ मोक्तिकर्ता खै रुप दा जाणै पाए। पौरौ ऐबै काम कौरणौ दै ब्यस्त हौए गौवै औरौ सैजै बुरै काम ऐबै तिनु काबू दै कौरौ, इथकारिए ऐबै मसीह कै ना अपनाणौ कै बाद तिनकै ऐबै कै हालत तिनकै बिशवाशी बौणणौ शै आगै कै हालत शै बै बुरै हौए गौए। 21 मैरा मतलब ऐजा औसौ, जिथुकै पौरमेशवर तिनु लोगौ खै जादा सौजा दैन्दा जू मसीह खै छोड़े दैंव बजाय तिनकै जिनुवै तैसी कौलोंई ना औपनेई। तिनु कारिए बड़िया हौन्दौ जै सै कौलोंई ऐजौ जाणदै ही नी कै आपणै जीवन कै धरमी तरीकै शै चलाणौ का, का मतलब हौंव। ऐबै सै जाणौए कै सोही का औसौ पौरौ तिनुऐ पौरमेशवर की आज्ञाओं खै ना औपनेई जू आमुए तिनु दैय रैई थी। 22 तिनकै साथै जू हौं सै ऐजौ दिखांव कै ऐजा किस्सा साचा औसौ: सै कुते कै जैशणै औसौ जू आपणी डाकै पाछु चाटै पांव, औरौ सै सुंगरों कै जैशणै औसौ जिथु धोए दी औरौ सै औटेयौ पाछु गारै मुंजी जांव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation