2 पतरस 1 - सिरमौरी नौवाँ नियम

शुभकामनाएँ

¹ मोऐं शमौन पतरसे ऐजै चिट्ठी लिख लोए जू यीशु मसीह का सेवक औरौ चोणेयौंदा चैला औसौ। मोऐं तुऔं सौबी कारिए लैख लोए जू तैसी कीमती बिशवाश कै साझा कौरौ जू आमुदा औसौ, सैजा बिशवाश जू अमारै पौरमेशवरे मोक्ति दैणौवाल़ै यीशु मसीह कै दवारा आमु दैय राए, जू आमु पौरमेशवर कै साथै सोही बाणौ।

² हांव प्रार्थना कौरु कै पौरमेशवर तुऔं कै जादा शै जादा अनुग्रह औरौ शान्तै दैंव जैशै-जैशै तुऐं पौरमेशवर औरौ अमारै प्रभु यीशु कै ज्ञान दै बौढ़दै जांव।

बिशवाश दै बढ़ौतरै

³ पौरमेशवरे आपणै अनौखी शौकतै लैई आमु सैजौ सौब दैय राए जू आमु ऐशणा जीवन जिणौ कारिए चैंई। ऐजौ आसान औसौ जिथुकै आमै पौरमेशवर खै जाणुए औरौ सै सैजाई औसौ जैणै आमु आपणै महिमा औरौ सिध्द अच्छाई लैई आपणै लोग हौणौ कारिए चोणे राए।

⁴ इनु सौबी ठुँ लैई पौरमेशवरे आमु बैजाए महान औरौ अनौखै वरदान दैय राए जिथका तैणै वादा कौरे राए थिया। ताकि इनु वरदानो का इस्तैमाल कौरेयौ आमु दुनिया कै तिनु बुरी इछाओं शै बौचै सौकु जू लोगौ खै नाश कौरौ, औरौ पौरमेशवर कै स्‍वभाव दै ऐक हिस्सा हौए सौकु।

⁵ जिथुकै तुऐं पौरमेशवर कै स्‍वभाव दै शामिल औसौ औरौ तुऔं सिरफ मसीह पांदी बिशवाश ही नी कौरणा चैंई, पौरौ तुऔं हमैशा सैजौई कौरणौ कै कौचिश कौरणै चैंई जू ओकी कारिए आछौ औसौ। बल्कि तुऔं ना सिरफ सैजौई कौरणौ चैंई जू आछौ औसौ पौरौ तुऔं ऐशणै लोग हौणौ चैंई जू जाणौए कै कैशै सौमझदारी शै बर्ताव कौरणा चैंई।

⁶ औरौ तुऔं ना सिरफ ऐजौ जाणणौ चैंई कै सौमझदारी शै कैशै बर्ताव कौरणा, पौरौ तुऔं आपी खै बै तिनु बुरै कामौ खै ना कौरौ जू तुऐं कौरणा चांव औरौ तुऔं ना सिरफ आपी खै काबू दै राखणै चैंई, पौरौ तुऔं मुसीबत दै बै सब्र राखणा चैंई औरौ तुऔं ना सिरफ सब्र राखणा चैंई, पौरौ तुऔं ऐशणै तरीकै शै बै जीणु चैंई जू पौरमेशवर खै खुश कौरौ।

⁷ औरौ तुऔं ना सिरफ ऐशणै तरीकै शै जीणु चैंई जू पौरमेशवर खै खुश कौरौ पौरौ तुऔं ऐकी-दुजैआरी आपणै खुद कै परिवार कै जैशणा प्यार शै बर्ताव कौरणा चैंई। औरौ तुऔं ना सिरफ ऐकी-दूजै कै साथै आपणै खुद कै परिवार कै जैशणा प्यार कौरणा चैंई, पौरौ तुऔं सौबी लोगौआरी प्यार कौरणा चैंई।

⁸ जै तुऐं जादा शै जादा ऐशैखै जियौंए तौ तुऐं अमारै प्रभु यीशु मसीह खै ऐशैखैई जाणै पांदै जू तुऔं खै फायदैमंद औरौ फलदायक बाणदा।

⁹ पौरौ जैसी आदमी दै ऐजै गुण ना आथी सै ऐशणा आदमी औसौ जैसकै नज़र ऐतरै कमजोर औसौ कै सै दैखी ना सौकौ औरौ सै बैसरै गौआ कै पौरमेशवरे तैसी तैसकै पुराणै पापौ शै शुध्द कौरे राए।

¹⁰ इयौं बौजैह शै ओए रै बिशवाशी भाईयों, आपी खै औरौ ओकी लोगौ खै ऐजौ दिखाणौ कारिए हौजौ बै आछा बर्ताव कौरणौ कै कौचिश कौरौ कै पौरमेशवरे तुऔं सौथीखै चोणे राए औरौ तुऔं आपणै लोग हौणौ कारिए बौएदै राए। जै तुऐं ऐशै कौरलै तौ तुऐं निशोंक हौयौ पौरमेशवर शै जौई ना हौंदै;

¹¹ औरौ ऐजौ कै पौरमेशवर तोंवारा तैसी राज्य दा खौलेयौ स्वागत कौरदा जिथै यीशु मसीह औसौ, जू अमारा प्रभु औरौ अमारा मोक्ति दैणौवाल़ा औसौ, जू हमैशा कारिए राजा कै रुप दा राज कौरदा।

पतरस का आखरी सौमय

¹² भलैई तुऐं आगै शै ही इनु बातौ खै जाणौए औरौ मसीह कै बारै मुंजी साची शिक्षाओं खै मोजबूती शै पाकड़ैयौंदे औसौ, हांव तिनकै बारै मुंजी याद दियाणौ हमैशा जारी राखदा।

^13-14 अमारै प्रभु यीशु मसीहे मुखै स्पष्ट हौयौ बौताए दियु कै हांव तावल़ा ही मौरे जांदा। इथकारिए मैरै जाणियौए कै मैरै खातिर ऐजौ सोही औसौ जोबै कै हांव इबी जियुंदी औसौ तौ हांव तुऔं इनु चीज़ौ कै याद दियांदा रोऊं।

¹⁵ इथकारिए मोऐं इनु बातौ खै तुऔं ऐजौ बौताणौ कै कड़ी मैहनत कौरे लौए, ताकि मैरै मौत कै बाद तुऐं हर सौमय इनु बातौ कै याद राखै सौकौ।

मसीह कै महिमा का दर्शन

¹⁶ जिथुकै जोबै आमै चोणेयौंदे चैलै तुऔं अमारै प्रभु यीशु मसीह कै अनौखी शौकतै औरौ पाछु आणौ कै बारै मुंजी बौतौऊं, तौ आमै तुऔं चलाकी शै किछै बाणैयौंदी कहाणी ना बौताए रैई। पौरौ, आमुए मसीह कै महिमा आपणै आखी लैई दैख राए थै।

^17-18 आमै तैसी पवित्र पाहाड़ पांदी तैसकै साथै थिए जोबै पौरमेशवर पिताए तैसी आदर दिया औरौ पौरमेशवर कै महान महिमाए तैसी घैरा। जोबै आमै तिथै थिए तौ आमुए अनौखै महिमा यानी पौरमेशवर कै आवाज़ तैसीखै ऐजौ बौलदै बैई शौणै, “ऐजा मैरा लाड़कु बैटा औसौ; जैसी आरी हांव प्यार कौरु। हांव ऐसदा बैजाए खुश औसौ।”

¹⁹ आमै जाणुए कै मसीह कै बारै मुंजी पौरमेशवर कै बातौ बौताणौवाल़ै जू वचन लैख राए थिए, सै बिल्कुल साची औसौ। औरौ तैसकै पाछु आणौ कै बारै मुंजी तिनु वचन पांदी आमु पूरा भरोसा औसौ जू आमुए तुऔं शिखाए राए थिए। तुऔं तिनु वचनो खै आछी तरह शै शुण्णै चैंई, जिथुकै जैशैखै इनारै दा दिवा लोगौ खै सोही बाट दिखाणौ दै मौदद कौरौ, तैशैखैई ऐजै वचन तुऔं ऐजौ जाणणौ दै मौदद कौरौ कै साचौ का औसौ। अमारै प्रभु यीशु मसीह कै पाछु आणौ तौड़ी तुऔं तिनु वचनो खै आछै शै शुण्णै चैंई। तैसकौ आणौ ऐक नौवें दूस कै झीशो कै जैशणौ पेयाशो लांदौ, औरौ सै झीशो कै तारै कै जैशणौ हौन्दौ। तैसी सौमय तैसकौ पेयाशो तोंवारै दिलो दो चौमकदौ, औरौ पौरमेशवर कै साफ रुप शै तुऔं प्रगट कौरदौ।

²⁰ पौरौ ऐजौ बैजाए जौरुरी औसौ कै तुऐं इयौं बातौ खै सौमझौ कै पवित्र शास्त्र दै तुऐं पौरमेशवर कै बातौ बौताणौ वाल़ौ कै जू वचन पौढ़ौए सै सिरफ तिनकी आपणै सोंच ना आथी।

²¹ जिथुकै कुणजै बै भविष्यवाणी आदमीए आपी ना लैख रैई। पौरौ पवित्र आत्माए तिनु सैजै वचन लिखणौ दै मौदद कौरे जू पौरमेशवर चांव थिया कै सै लिखौ।