2 कुरिन्थियों 9 - सिरमौरी नौवाँ नियम

साथी मसीहियों कारिए मौदद

¹ ऐबै यरूशलेम शहर दै बिशवाशियौं कै धन दैणौ कै सेवकाई दै जू पवित्र लोगौ कारिए कौरे जांव, मुखै तुऔं खै लिखणौ जौरुरी ना आथी।

² जिथुकै हांव तोंवारै दैणौ कै इछा कै जाणुए, जिथकै बौजैह शै, हांव तोंवारै बारै मुंजी मकिदुनिया प्रदेश कै बिशवाशियौं कै सामणै घमण्‍ड दिखोऊ, कै अखाया प्रदेश कै तुऐं लोग ऐकी सालो शै तैयार हौए रौवै, औरौ तुंआरी खुशीए हौजौ बौहितै खै उभारे राए।

³ पौरौ मोऐं तीतुस औरौ तैसकै साथै दो बिशवाशी भाईयों खै तोंवारै धोरे भैजै लौवै, कै आमुए जू घमण्‍ड तोंवारै बारै मुंजी दिखोऊवा, सै इयौं बातौ दा बैकार ना ठोहरी, पौरौ जैशैखै मोऐं बौल़ौ, यरूशलेम शहर दै धन दैणौ कारिए तैयार रौव तैशैखैई तैयार रौव।

⁴ ऐशैखै ना हौंव कै जै कुणिए मकिदुनिया शहर शै किछै बिशवाशी मैरै साथै आंव औरौ तोंवारा धन तैयार ना हौं, तौ का जाणौ, कै आमै तुऔं पांदी आपणै भोरोशे कै बौजैह शै शर्मिंदा हौंदै पौरौ तुऐं हौजौ बै जादा शर्मिंदा हौंदै।

⁵ इथकारिए मोऐं बिशवाशी भाईयों शै ऐजै बिन्ती कौरणै जौरुरी सौमझै कै सै आगै तोंवारै धोरे जांव, औरौ ऐशणा इतंजाम कौरौ जू भैंट दैणौ का वादा तुऐं कौरे राए, तियौं भैंट मैरै आणौ दै औगौड़ियौ तैयार राखौ, जू तुऐं दया कै भाव शै दैय राए, ना कि कंजूसी कै भाव शै।

आछै दान दाता

⁶ पौरौ बात तौ ऐजै औसौ जू ठिकु बौंव, सै ठिकु ही काटदा; औरौ जू जादा बौंव, सै जादा काटदा।

⁷ हरेक आदमी जैशै मन दा ठाणौ तैशैखैई दान कौरौ, ना कुढ़कुढ़ाएयौ कै, औरौ ना दबाव लैई, जिथुकै पौरमेशवर खुशी लैई दैणैवाल़ै शै प्यार कौरौ।

⁸ पौरमेशवर सौब भान्त का अनुग्रह तुऔं तोंवारै जौरुरत शै जादा दैणौ दा शौकतीशाली औसौ जिथलैई हर बात दै औरौ हर सौमय, सौब किछै, जू तुऔं जौरुरी हौंव, तुऔं कैई रौंव ताकि तुऔं कैई भौलै काम कौरणौ कारिए जौरुरत सै जादा हौं।

⁹ जैशै पवित्र शास्त्र दौ लैखै राखौ, “कै पौरमेशवर जौरुरतमंद कै आछै इछा शै दैंव, सै जू काम कौरौ सैजै सोही औसौ औरौ हमैशा जारी रौंदै।”

¹⁰ जिथुकै पौरमेशवर ही औसौ जू किसानो खै बौणौ कारिए बीज़ दैंव, औरौ तिनु खाणौ कारिए भोजन बै दैंव। तौ, ऐशैखैई पौरमेशवर ऐजौ साबित कौरदा कै तुऔं कैई हमैशा पूरु धन हौंव ताकि तुऐं हौजौ जादा दयालुता शै जौरुरतमंद लोगौ कै मौदद कौरे सौकौ।

¹¹ तुऐं हर तरह शै आशीषित हौंदै, औरौ इथकारिए तुऐं सौदा दया शै दैणौ कै लायक हौंदै औरौ जोबै आमु तोंवारै दया शै दैयौंदै दान कै जौरुरतमंद लोगौ कै दैंदै तौ सैजै लोग पौरमेशवर का धन्यवाद दैंदै।

¹² जिथुकै इयौं सेवा कै पूरा कौरणै शै, ना सिरफ पवित्र लोगौ की जौरुरते पूरी हौंव, पौरौ लोगौ कै औरौ शा पौरमेशवर का बै बौहुता धन्यवाद हौं।

¹³ जिथुकै ओकी कै मौदद कौरणौ कारिए धन दैणौ कै ऐजी सेवकाई दिखांव कै तुऐं आपणा वादा पूरा कौरे राए। बौहितै लोग पौरमेशवर कै महिमा प्रगट कौरदै जोबै तुऐं मसीह का साचा सुसमाचार कै सोचाई कै साथै मानलै औरौ बौतालै। औरौ तुऐं गरीब बिशवाशी औरौ ओकी बिशवाशियौं कै मौदद कौरणौ दै दया प्रगट कौरदै रौव।

¹⁴ औरौ सै तोंवारै खातिर पौरमेशवर शै प्रार्थना कौरदै। सै तुऔंआरी प्यार कौरौ, जिथुकै सै जाणौए, कै पौरमेशवरे तुऔं लोगौ पांदी बौड़ा ही अनुग्रह कौरा।

¹⁵ आखिर दै, आमु सौबी खै पौरमेशवर का धन्यवाद कौरणा चैंई जिथुकै तैणै आमुखै सौबिदा बौड़ा तौफा यानी आपणै बैटै खै दिया, जैसका शब्दो लैई ब्यान ना कौरे सौकु।