2 कुरिन्थियों 8 - सिरमौरी नौवाँ नियमउदारता शै दान दैणा 1 ऐबै ओए रै बिशवाशी भाईयों, हांव तुऔं लोगौ खै तैसी अनुग्रह कै बारै मुंजी बौताणा चोऊं, जू पौरमेशवरे मकिदुनिया प्रदेश कै कलीसिया दै बिशवाशियौं कै मंडली खै दैय राए। 2 कै जोबै बैजाए पौरैशानी लैई तिनकै परीक्षा कौरे गौए, तौ सै बौहितै खुशी हुवे औरौ जोबै कै सै बौहितै गरीब थिए तोबै बै तिनुऐ ओकी बिशवाशियौं कै मौदद कौरणौ कारिए दया शै धन दियु। 3 औरौ तिनकै बारै मुंजी मैरी ऐजी गवाही औसौ, कै तिनुकैईं जू किछै बै थियु, तिनुऐ तिथैशै बै जादा दान आपणै साची दिल शै दैय राए। 4 तिनुऐ तौ आमु कैईंदै बैजाए बिन्ती कौरेयौ मुं कैईंदै रजामंदी मांगै कै तिनु बै यरूशलेम शहर कै बिशवाशियौं कै मौदद कारिए सेवा-कै काम दा हिस्सा लोणो का मौका भैटौ। 5 औरौ आमुए ऐशै सोंचै बै ना रैई थी, कै सै ऐशैखै दैय सौकौ, यानी सौबी दो आगै तिनुऐ आपी खै प्रभु कै सेवा कारिए चौढ़ाए दियै। इथकै बाद तिनुऐ पौरमेशवर कै इछा शै अमारै जैशणौ हौणौ कारिए आपी खै चौढ़ाए दियै। 6 इथकारिए आमुए तीतुस खै सौमझौऊवा, कै जैशै तैणै आगै शुरु कौरे राए थियु, तैशैखैई तोंवारै बीच मुंजी ऐजा दान कै काम खै पूरा बै कौरौ। 7 पौरौ जैशैखै हर बातौ दै यानी बिशवाश, प्रचार कौरणा या शिक्षा दैणौ कै लायक, ज्ञान औरौ सौब भान्त कै कामौ दै, औरौ तैसी प्यार दै, जू आमुआरी राखौ, बौढ़दै जांव, तैशैखैई ऐसी गरीब बिशवाशी कारिए बै बौढ़दै जाव। मसीह अमारा नमूना 8 हांव आज्ञा कै रीति पांदी तौ नी, पौरौ ओकी कै खुशी शै तोंवारै प्यार कै सौचाई खै पोरखणौ कारिए बुलू। 9 तुऐं अमारै प्रभु यीशु मसीह का अनुग्रह जाणौए, कै सै सैठ हौयौ बै तोंवारै खातिर कंगाल बौणै गौआ, ताकि तैसकै कंगाल हौए जाणौ लैई तुऐं सैठ हौए जांव। 10-11 पाछलै साल तुऐं ना सिरफ दैणौ मुंजी पौरौ ऐशै कौरणौ कै इछा राखणौ दै बै आगै थिए। इथकै बारै मुंजी तुऔं कारिए सौबीदु आछौ का औसौ, इथकै बारै मुंजी मैरी सलाह ऐजी औसौ: ऐबै जू तुऐं शुरु कौरे राए तिथु पूरु कौरौ। शायद तुऐं बै ऐजौ खत्म कौरणौ कारिए ऐतरै ही बैचैन औसौ जैतरै कै तुऐं ऐजौ शुरु कौरणौ दै थिए। 12 जिथुकै जै तोंवारै मन दा ओकी खै दान दैणौ कै विचार औसौ तौ दान तिथकै हिसाब शै स्वीकार बै हौंव जू तैसीकैईं औसौ ना कै तिथकै हिसाब शै जू तैसीकैईं ना आथी। 13 हांव ना चोऊं कै जीवन आसान बाणणौ कारिए तोंवारा जीवन चैईथा हौए जांव। पौरौ सौबी कैई ऐक जैशणौ हौणौ चैंई। 14 पौरौ बराबरी कै विचार शै ऐसी सौमय तुंआरी बौढ़ती तिनकै कमी दै काम आंव, आणौवाल़ै सौमय दै बौढ़दै तिनकी बौढ़ती बै तोंवारै कमी दै काम आंव, ताकि तुऐं सौब बराबर हौए जांव 15 पवित्र शास्त्र दौ लैखै राव, “जैणै बौहितु कौठौ कियु तैसीकै किछै जादा ना भैटी औरौ जैणै कम कौठौ कौरौ तैसकौ किछै कम ना निकल़ी।” तीतुस का कुरिन्थुस शहर खै भैजा जाणा 16 पौरमेशवर का धन्यवाद हौं, जू फिकर मुखै तोंवारै खातिर औसौ सैजी खुशी तीतुस कै मन दै पाए राए। 17 कै जोबै आमुए तैसी तोंवारै धोरे जाणौ कारिए बौल़ौ तौ तैणै अमारै बिन्ती का आदर कौरा यानी खुशी हौयौ सै आपणी इछा शै तोंवारै धोरे ओऊवा। 18 औरौ आमुए तैसकै साथै औकै बिशवाशी भाई खै बै छाड़ै राए जैसकौ नांव सुसमाचार कै बौताणौ कारिए सौबै कलीसिया कै बिशवाशी मुंजी आछो औसौ, 19 औरौ ऐतरो ही नी, पौरौ कलीसिया कै लोगौ दवारा बै तैसी दान कै साथै यरूशलेम कै बिशवाशी कारिए भैजी राए जू प्रभु कै महिमा औरौ ऐजौ दिखाणौ कारिए औसौ कि आमु यरूशलेम शहर दै बिशवाशी कै मौदद कौरणौ कारिए खुशी औसौ। 20 तीतुस कै साथै तैसी मसीह बिशवाशी भाई खै भैजणौ कै दवारा आमै इयौं बातौ का ध्यान राखु, कै ऐसी दान दैणौ कै मौदद कै बारै मुंजी जैसकै सेवा कौरु, कुणिए आमु पांदी दोष ना लाए सौकौ। 21 जिथुकै जू बातौ सिरफ प्रभु ही कै नेड़िक नी, पौरौ आदमी कै नेड़िक बै भली औसौ आमै कामौ कै सोही तरीकै शै कौरणौ पांदी आपणा ध्यान दियु। 22 इनु दु कै साथै आमै ऐक ओका बिशवाशी भाई खै बै छाड़ै लौआ, जैसीखै आमुए बार-बार पोरखैयोखै बौहितै बातौ दा खुशी दैखा; पौरौ ऐबै तुऔं पांदी तैसका बौड़ा भोरोशा औसौ, इयौं बौजैह शै सै हौजौ बै जादा खुशी औसौ। 23 जै कुणिए तीतुस कै बारै मुंजी पूछौ, तौ सै मैरा साथै औरौ तुऔं कारिए मैरा मौददगार औसौ, औरौ बिशवाश कौरणौवाल़ै भाईयों कै बारै मुंजी पूछौ, तौ सै कलीसियाओं कै भैजैयौंदे औरौ सै मसीह कै आदर दैंव। 24 इथकारिए आपणा प्यार औरौ अमारा सैजा घमण्ड जू तोंवारै बारै मुंजी औसौ कलीसियाओं कै सामणै तिनु सोही कौरेयौ दिखांव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation