2 कुरिन्थियों 7 - सिरमौरी नौवाँ नियम

¹ ओए रै प्यारो, जोबै पौरमेशवरे आमुआरी नानड़िया जैशणा अपनाणौ का वादा कौरे राए, तौ आव, आमै आपणै शोरीरो औरौ आत्मा कै सौबै गंदगी कै बुरी चीज़ौ कै कौरणी बंद कौरौ, औरौ पौरमेशवर कै डौर मानैयौ औरौ आदर कौरेयौ आमु पूरी तरह शै शुध्द जीवन जिणौ कारिए मैहनत कौरौ।

पौलुस कै खुशी

² तुऐं आमु शा आपणै पूरै दिल शै प्यार कौरणा चैंई: आमुए ना कोसी कै साथै अन्याय कौरा, ना कोसी खै बिगाड़ै, औरौ ना कोसी खै ठोगै।

³ हांव तुऔं दोषी ठोहराणो कारिए ऐजौ ना बुलू, जिथुकै मोऐं आगै ही बौल़ै पोऊ, कै आमु तुऔंआरी पूरै दिल शै प्यार कौरु, आमै जौई ना रौंदै चाहै आमै मौरु या जियुं।

⁴ मोऐं तुऔं कैंई बैजाए भोरोशे कै साथै बौल़ै लौ, मुखै तुऔं पांदी गर्व औसौ: मुखै बैजाए तसल्ली औसौ; औरौ आपणै सौबै कौल़ेशौ दा हांव खुशी शै बैजाए भौरेयौंदा रोऊं।

⁵ जिथुकै त्रोआस शहर छोड़ेयौ मकिदुनिया प्रदेश दा आणौ पांदी आमु बिल्कुल बै शारीरिक रुप शै आराम ना भैटी, पौरौ इथकै बजाय आमु हर तरह शै पौरैशानी झैलू थिए। हर जौगैह दै झोगड़े थिए, औरौ अमारै मन दा डौर थिया।

⁶ तोबै बै उदास लोगौ खै हौंसला दैणौवाल़ै पौरमेशवरे तीतुस कै आणौ शै आमुखै शान्तै दी।

⁷ औरौ ना सिरफ तैसकै आणौ लैई पौरौ तैसकै सैजी शान्तै लैई बै, जू तीतुस खै तोंवारै ढौबौशै भैटी रौए थै; औरौ तैणै तोंवारै इछा, तोंवारै दुख औरौ मैरै खातिर तोंवारै राग का समाचार आमु शुणौऊवा, जिथलैई मुखै हौजौ बै खुशी भैटी।

⁸ मुखै इयौं बातौ का अफसोस ना आथी कै मोऐं तुऔं खै ऐजी गंभीर चिट्ठी भैजी, बल्कि मुखै अफसोस तोबै हौआ, जिथुखै मुखै पौता औसौ कै ऐजौ दैणिक देर तौड़ी तोंवारै खातिर दर्दनाक थियु।

⁹ ऐबै हांव खुशी औसौ पौरौ इथकारिए नी कै तुऔं खै दुख पौऊंचौ, पौरौ इथकारिए कै तुऐं तैसी दुख कै बौजैह शै पाप कौरणै छोड़े दियै, जिथुकै ऐजा तैशणा दुख औसौ जू पौरमेशवर आपणै लोगौ कैईंदा चांव, कै अमारै ढौबौशा तुऔं खै कियौंई बातौ दा नुकसान ना पौऊंचौ।

¹⁰ जिथुकै सैजा दुख जू पौरमेशवर कै ढौबौशा आंव, उध्दार दैणैवाल़ै पश्‍चाताप कै बौजैह बौणै जांव, जिथै दुख कारिए कुणजाई ठाँव ना रौंव। पौरौ सांसारिक दुख मौत पौयदा कौरौ।

¹¹ तोबै बै इयौं बातौ लैई तुऔं खै पौरमेशवर कै खातिर ऐशणा दुख महसूस हौआ; इथकारिए ध्यान दैव कै पौरमेशवर कै तरफ शै आएयौंदे दुखै तुऔं मुंजी का-का बौदलाव कौरे राखै: ऐशणै खोशे शै भोरेयोंदे इछा, आपणै तरफ शै आछौ कौरणौ कै ऐशणी बौड़ै इछा, अन्याय कै ढौबौ ऐशणा गुस्सा, कौल़ेश कै सौमय ऐशणी चौकशाए, मुं आरी भैटिणौ कै ऐशणी बोड़ी इछा, सेवा कै ढौबौ ऐशणी खोशे औरौ बुरै काम कौरणौवाल़ै खै सौजा दैणौ कै ऐशणै तैजी कै दवारा तुऐं ऐजौ साबित कौरे दियु कै सौबै ठुँ ठीक-ठाक कौरणौ दै तुऐं कुणजै बै कमी ना छोड़े रैई।

¹² तोबै बै जू कौड़वी बातौ मोऐं तुऔं लैख रैई थै तौ सैजी तैसी आदमी कै बौजैह शै नी, जैणै अन्याय कौरा राए थिया औरौ ना ही तैसकी बौजैह शै जैसीआरी अन्याय हौआ, पौरौ इथकारिए लैख राए थियु ताकि पौरमेशवर तुऔं दिखांव कै तुऐं अमारा कैतरा ख्याल राखौ।

¹³ इथकारिए आमुखै खुशी हौए औरौ आमुखै तीतुस कै बौजैह शै जादा बै खुशी भैटी जिथुकै तैसका जियुं तुऔं सौबी कै बौजैह शै हौरा-भौरा हौए गौआ।

¹⁴ जिथुकै जै मोऐं तैसकै सामणै तोंवारै बारै मुंजी किछै घमण्‍ड दिखोऊवा, तौ शर्मिंदा ना होई, पौरौ जैशै आमुए तुऔं खै सौबै बातौ साची-साची बौल़ै दी थी, तैशैखैई अमारा घमण्‍ड देखाणा तीतुस कै सामणै बै साचा निकल़ा।

¹⁵ औरौ जोबै-जोबै सै औटेयौ सुंचौए कै कैशै तुऐं तैसकै आज्ञा मानै, जोबै तुऐं डौरेयौ औरौ बौड़ै इज्जत कै साथै तैसका स्वागत कौरा, तौ सै तुऔंआरी हौजौ बै जादा प्यार कौरौ।

¹⁶ हांव आनन्द मौनौऊं, कै तोंवारै ढौबौशा मुखै हर बातौ दा भोरोशा औसौ।