2 कुरिन्थियों 6 - सिरमौरी नौवाँ नियम

सेवकाई कै अनुभव

¹ पौरमेशवर कै सहयोगी हौणौ कै नातै आमै तुऐं लोगौ शै ऐजी बिन्ती कौरु कै पौरमेशवर का जू अनुग्रह तुऔं पांदी हौआ, तैसी बैकार ना हौणौ दैव।

² जिथुकै पवित्र शास्त्र दो पौरमेशवर बौल़ौ, “आपणै सोही सौमय पांदी मोऐं तैरी शौणै, औरौ मोक्ति कै दूसै मोऐं तैरै, मौदद कौरे।” शुणौ; ऐबै सोही सौमय औसौ, दैखौ, ऐबै मोक्ति कौ दूस औसौ।

पौलुस कै पौरैशानै

³ पौरमेशवर दै शामिल हौयौ, आमै कियौंई बातौ दै ठोकर खाणौ का कुणजाई बै मौका ना दियु, कै अमारै सेवा पांदी कुणजाई दोष ना आंव।

⁴ पौरौ हर बात मुंजी आमै ऐजौ साबित कौरु कै आमै पौरमेशवर कै साची सेवक औसौ। आमु आपणै आछै गुण खै दिखायौ, दुखो, कौल़ेशौ, गरीबी औरौ पौरैशानी खै बौड़ै हिम्मत कै साथै सैहन कौरु।

⁵ आमु कौड़ै लैई मारै गौवै, कोयदखाने दै पाए, आमु भीड़ै भौंगराए। आमुए बैजाए मैहनत कौरे, आमु रात-रात भोरै बिजी रौवै, औरौ भूखै रौवै।

⁶ पौरौ आमुए आपी खै पवित्र राखै औरौ ज्ञानी, सौब्री औरौ दयालु रौवै। पवित्र आत्मा कै मौजूदगी अमारै साथै रौए।

⁷ साची प्यार शै, सौचाई कै वचन शै, पौरमेशवर कै अनौखी शौकतै लैई आमुए काम कौरे राए। आमु धार्मिकता कै हथियार खै सोऐं हाथौ दै हमलै कारिए इस्तैमाल कौरु औरौ डैरै हाथौ दै रक्षा कौरणौ कारिए इस्तैमाल कौरु।

⁸ चाहै लोग अमारा आदर कौरौ या निरादर कौरौ; तारीफ कौरौ या शराप दैंव, आमुए हमैशा आपणै बारै मुंजी साचौ बौल़ौ। पौरौ किछै लोगै बौल़ौ कै आमु झूठै औसौ।

⁹ किछै लोग आमु मशहूर सौमझौ, पौरौ किछै लोग आमु अणजाण सौमझौ; मौरेयौंदे कै जैशणै औसौ औरौ तोबै बै जियुंदी औसौ, आमै मार खाणौ वाल़ौ कै जैशणै औसौ पौरौ जान शै मारै ना जोऊं।

¹⁰ आमु बैजाए कोष्ट थिया, पौरौ सौदा खुशी मौनौऊं, आमु कंगाल औसौ, पौरौ बौहितै कै आत्मिक रुप शै धनवान बाणै दियै; ऐशै जैशै आमुकैंई किछै नी तोबै बै सौब ठुँ औसौ।

¹¹ ओए रै कुरिन्थुस शहर कै बिशवाशियौं, आमै खौलेयौ तुऔंआरी बातौ कौरे रैई, आमै तुऔं आपणै पूरै दिल शै प्यार कौरु।

¹² आमै तुऔं कारिए आपणै प्यार कै कम ना कौरे रैई, पौरौ तुऐं आमु कारिए आपणै प्यार कै कम कौरे राए।

¹³ पौरौ आपणै नानड़िया जाणैयौ तुऔं खै बुलू, कै तिथकै बौदलै तुऐं बै आपणै पूरै दिल शै प्यार कौरदै रौव।

आमै पौरमेशवर कै मन्दिर औसौ

¹⁴ अबिशवाशी कै साथै शामिल ना हौंव जिथुकै धार्मिकता औरौ अधरम का, का मैल औसौ? या पेयाशो औरौ इनारै कै का संगति?

¹⁵ औरौ मसीह का शैतान कै साथै का लगाव औसौ? या बिशवाशी कै साथै अबिशवाशी का, का नाता?

¹⁶ औरौ मूर्तो का पौरमेशवर कै मन्दिरो दा कुणजाई ठाँव ना आथी। जिथुकै आमु तौ जियुंदै पौरमेशवर कै मन्दिर औसौ; जैशैखै पौरमेशवरे पवित्र शास्त्र दो बौल़ै राए, “हांव इनु लोगौ कै साथै रौंदा औरौ तिनुमुंजी हांडेया कौरदा; औरौ हांव तिनका पौरमेशवर हौंदा, औरौ ऐजै मैरै लोग हौंदै।”

¹⁷ इथकारिए प्रभु आमुआरी पवित्र शास्त्र कै दवारा बौल़ौ, “तिनु लोगौ मुंजीदै बायरै आए जाव जू पौरमेशवर कै पौछौड़ियौ ना चालौ; औरौ सैजी अशुध्द चीज़ौ जू मोऐं मौना कौरे रैई औरौ तिनु अपवित्र चीज़ौ शै दूर रौव, तोबैई हांव तुऔं अपनांदा;

¹⁸ औरौ तोंवारा पिता हौंदा, औरौ तुऐं मैरै बैटै औरौ बेटियाँ हौंदी; ऐजा सौबिदा बौड़ा शौकतीशाली प्रभु पौरमेशवर का वचन औसौ।”