2 कुरिन्थियों 3 - सिरमौरी नौवाँ नियम

मसीही लोग जियुंदी चिट्ठी

¹ का आमै औटेयौ आपणै बौड़ाए कौरदै लागै? या अमारै कैतरै लोगौ कै जैशणै सिफारिश कै चिट्ठियां तोंवारै धोरे लाणी या तुऔं कैईंदी लोणीए? ना बिल्कुल नी?

² तुऐं खुद ही चिट्ठी कै जैशणै औसौ जू सौबी कै सामणै पौरमेशवर कै खातिर मैरै काम कै सिफारिश कौरौ। जू अमारै दिल दै लिखैयौंदी औसौ, औरौ तोंवारा बौदलैयौंदा जीवन तोंवारै बीच मुंजी अमारै कामौ कै बौजैह औसौ, जू ऐक चिट्ठी कै जैशणै औसौ जिथु हर कुणिए पौढ़ै औरौ पौयछाणै सौकौ।

³ ऐजौ प्रगट औसौ, कै तोंवारा बौदलैयौंदा जीवन ऐक चिट्ठी कै जैशणा औसौ जू मसीहे लैख राए, तैणै ऐजै चिट्ठी अमारै सेवकाई कै दवारा लैख राए; औरौ जू सियाई लैई या पाथरो कै पाटड़ी पांदी नी, पौरौ जियुंदै पौरमेशवर कै आत्मा लैई आदमी कै दिल कै पाटड़ी पांदी लैख राए।

पौलुस कै क्षमता

⁴ आमै ऐशै इथकारिए बुलू जिथुकै आमु मसीह कै दवारा पौरमेशवर पांदी बिशवाश औसौ।

⁵ आमु ऐजौ ना बुलू कै आमुकैंई आपी दी किछै बै कौरणौ कै ताकत औसौ। पौरौ पौरमेशवर आमु ऐजै ताकत दैंव। औरौ अमारै ताकत पौरमेशवर कै ढौबौशै औसौ।

⁶ जैणै आमु नोऐं कौरार कै सेवक हौणौ कै ताकत बै दैय राए, मूसा कै लैखैयौंदे कानून सेवक ना आथी पौरौ पवित्र आत्मा कै; जिथुकै मूसा कै लैखैयौंदे कानून कै ना मानणौ का नतीजा मौत औसौ पौरौ पवित्र आत्मा सौदा कै जिन्दगी दैंव।

नोऐं कौरार कै महिमा

^7-8 जोबै मूसा कै कानून जू पाथरो कै पाटड़ियों पांदी लिखयो, दैय राए थिए, तैसी सौमय पौरमेशवर कै महिमा प्रकट हौए। इस्राएल देश कै लोग लाम्बै सौमय तौड़ी मूसा कै चैहरै कै ढौबौ ना दैख सौकी जिथुकै सै चौमकै रौआ थिया, भलैई ऐजौ लाम्बै सौमय तौड़ी ना रौई। इथकारिए जै मूसा कै दैययौंदे कानून कै हिसाब शै सेवकाई मौत कै ढौबौ लोए जांव, जैसकै ऐशणी महिमा थी, तौ पौरमेशवर कै आत्मा कै सेवकाई कै महिमा हौजौ जादा हौंदी तौ पवित्र आत्मा कै अगुवाई दै नोऐं कौरार तौड़ी सेवा का काम हौजौ बै पेयाशै लैई भौरेयौंदा हौंदा।

⁹ जिथुकै जोबै दोषी ठौहराणौवाल़ी कौरार झमाकैदार थै, तौ नोऐं कौरार जू आमु पौरमेशवर कै सामणै धरमी बाणौ हौजौ बै झमाकैदार किथु ना हौंदै?

¹⁰ सैजै महिमा जू मूसा कै कानून कै दवारा थै, तिथकै ऐबै कुणजै महिमा ना आथी, जिथुकै नोऐं कौरार कै हिसाब शै पुराणै कौरार बैजाए महिमा कै बौजैह ना आथी।

¹¹ जिथुकै मूसा कै कानून ऐशणै महिमा कै साथै दैय राए थिए जू लाम्बै सौमय तौड़ी ना रौई। पौरौ नोऐं कौरार कै महिमा बैजाए जादा औसौ जिथुकै ऐजै हमैशा बौणैयौंदे रौंव।

¹² इथकारिए ऐशणै आशा राखैयौ आमै हिम्मत कै साथै बुलू,

¹³ आमै मूसा कै जैशणै ना आथी, जैणै मुँह पांदी पोरदा पाए राए थिया ताकि इस्राएल देश कै लोग तैसकै चैहरै पांदी पौरमेशवर कै चौमक खै कम हौंदै बैई औरौ आखिर दै गायब हौंदै बैई ना दैखौ।

¹⁴ पौरौ सै नासमझ हौए गौवै, जिथुकै ऐलो तौड़ी पुराणै कौरार पोढ़दै बैई तिनकै दिलो पांदी सैजाई पोरदा पौड़ेयौंदा रौआ; पौरौ सिरफ मसीह पांदी बिशवाश कौरणौ कै दवारा ही पोरदा हौटाया जांव।

¹⁵ ऐलो तौड़ी जौल़ौ कौलोंई मूसा कै किताब पौढ़ै जांव, तौ तैसकै दिलो दा पोरदा पौढ़ेयौंदा रौंव औरौ इथकारिए सै पूरी तरह शै ना सौमझौ।

¹⁶ पौरौ जौल़ौ कौलोंई तिनका दिल प्रभु यीशु दा बिशवाश कौरौ, तौ प्रभु तैसकै मन पौरैशा पोरदै खै हटाए दैंव।

¹⁷ प्रभु तौ आत्मा औसौ: औरौ जिथै कौथी प्रभु का आत्मा औसौ तिथै पुराणै कौरार शै आज़ादी औसौ।

¹⁸ आमै सौबै ऐक शीशै कै जैशणै औसौ, जू पौरमेशवर कै पेयाशै खै ऐशणै चैहरै शै दैखु जिनुपांदी पोरदा ना पौड़ौ, तौ पौरमेशवर आमु लगातार बौढ़ेयौंदे पेयाशै दै जादा शै जादा आपणै जैशणै बाणौ। ऐजौ पेयाशो प्रभु शै ही भैटौ, जू पवित्र आत्मा औसौ।