2 कुरिन्थियों 11 - सिरमौरी नौवाँ नियमतिनकै बिशवाश योग्यता कारिए फिकर 1 तुऐं तिनुकै अपनांव जू आपणी तारीफ आपी कौरौ, औरौ इथकारिए मुखै उम्मीद औसौ कै तुऐं मुखै बरदाश कौरे पांदै जै हांव दैणी मुर्खवाल़ा बर्ताव कौरु। 2 जिथुकै हांव तुऔंआरी तैशैखैई प्यार कौरु औरौ तोंवारै परवाह कौरु जैशै पौरमेशवर कौरौ, इथकारिए मोऐं तुऔं पवित्र कुंवारी कै जैशणा मसीह खै दैणौ औरौ सिरफ तैसीखै ही सौंपै दैणौ का वादा कौरे राए। जैशै ऐक बापू आपणै बैटी खै बैयाव कै सौमय आपणै घोरवाल़ै खै ऐक पवित्र कुंवारी कै रुप दा सौंपौ। 3 पौरौ हांव डौरुए कै जैशैखै शैतानै शोंगोऊं साए आपणी चतुराई लैई आगली बैटमाणिश हावा खै बैहकाए, तैशैखैई तोंवारै मन साफ सुथरै औरौ पवित्रता लैई मसीह कै सेवा कै साथै हौणै चैंई, कोदी तुऐं धौखा ना खांव। 4 जै कुणिए तोंवारै धोरे आऐबा ओकी यीशु कै बारै दौ बौतांव तौ तुऐं तैसी नौवें आदमी कै अपनाणौ कारिए बैजाए बैताब रौंव सै तौ सैजा यीशु ना आथी जैसकै बारै दौ आमुए बौतौऊ थियु। जोबै तुऔं कै ऐशणा आत्मा औरौ सौंदेश भैटौ जू तैसी आत्मा औरौ सौंदेश साए ना हौं जू आमुए बौताए राय थिया। तौ तुऐं तिनु शिक्षा कै मानणौ दै गौलत औसौ। पौलुस औरौ झूठै चोणेयौंदे चैलै 5 मैरै जाणियौ कै हांव तिनुदा आछा औसौ जिशैक सैजै लोग जू ऐशैकै दिखावा कौरौ कै सै सौबी चोणेयौंदे चैलै मुंजीदै बौड़ै औसौ। 6 जै हांव बौल़ाणौ कै अनाड़ी औसौ पौरौ मुखै मसीह औरौ सुसमाचार का ज्ञान औसौ, यानी आमै आपणा ज्ञान तिनु सारी बातौ दा प्रगट कौरा जू मोऐं शिखैई। 7 मोऐं तोंवारै बीच पौरमेशवर का सुसमाचार मुफ्त दा प्रचार कौरेयौ कै आपी कै नम्र कौरा ताकि तोंवारै इज्जत हौं। का मोऐं ऐशै कौरेयौ किछै पाप कौरे राखा? 8 तोंवारै सेवा कौरणौ कारिए मुखै ओकी कलीसियाओं शै मौदद भैटी ताकि हांव बिना कोसी कीमत कै तोंवारै सेवा कौरे सौकु। इथुकै लूट ना बौल़ौ। 9 औरौ जोबै हांव तोंवारै साथै थिया, औरौ मुखै पौयसै कै कोमै पौड़ै, तौ मोऐं कोसी पांदी भार ना पाड़ी, जिथुकै बिशवाशी भाईए, मकिदुनिया प्रदेश शै आयौ मैरी कमी खै पूरी कौरी: औरौ मोऐं हर बातौ दा आपी खै तुऔं कारिए हर भान्त कै पौरैशानी बाणणौ शै बौचाए, औरौ हांव आणौवाल़ै दूसौ दा बै तुऔं पांदी बौझ ना बौणदा। 10 तैशैखैई पाकै तरीकै शै मसीह कै सौचाई मुं दै औसौ, तौ अखाया प्रदेश दै कुणिए मुखै घमण्ड कौरणौ शै ना रौकै सौकौ। 11 मोऐं तोंवारै पौयसै किथु ना कौरी? का मोऐं ऐजौ इथकारिए कौरौ जिथुकै हांव तुऔंआरी प्यार ना कौरु? पौरमेशवर जाणौए कै हांव तुऔंआरी प्यार कौरु। 12 पौरौ जू हांव कौरुए, सैजौई कौरदा बै रौंदा; हांव तुंआदै मौदद ना लोन्दा ताकि हांव तिनु लोगौ कै रौकै सौकु जू इयौं बातौ पांदी घमण्ड कौरणौ कारिए ऐक मौका चांव, कै पौरमेशवर कारिए तिनका काम अमारै काम कै बराबर औसौ। 13 जिथुकै ऐशणै लोग झूठै चोणेयौंदे चैलै, औरौ छल लैई काम कौरणौवाल़ै, औरौ सै मसीह कै चोणेयौंदे चैलै हौणौ का दावा कौरौ। 14 औरौ ऐजी किछै हैरान कै बात ना आथी जिथुकै शैतान आपी बै पौरमेशवर कै महिमा का ऐक स्वर्गदूत का दिखावा कौरौ। 15 इथकारिए जै तैसकै सेवक बै धार्मिकता कै सेवको जैशणा रुप का दिखावा कौरौ, तौ कुणजै बौड़ै बात ना आथी, पौरौ तिनका अन्त तिनकै कामौ कै हिसाब शै हौंदा। मसीह कारिए दुख उठाणा 16 हांव हौजौ बुलू, कुणिए मुखै मूर्ख ना सौमझौ; नही तौ मूर्ख ही सौमझैबा मुखै सोहै लौ, ताकि ठिका शा हांव बै घमण्ड कौरे सौकु। 17 ऐसी बेधड़क घमण्ड दो जू किछै हांव बुलूए, ऐशणा घमण्ड प्रभु कै औरौ शा ना आथी पौरौ मानौ मूर्खता शै ही बुलू। 18 जोबै कै बौहितै लोग इयौं दुनिया कै लोगौ साए घमण्ड कौरौ, तौ हांव बै घमण्ड कौरदा। 19 तुऐं तौ सौमझदार हौयौ खुशी शै मूर्खो की सैय दैंव। 20 जिथुकै जोबै तुऔं कुणिए दास बाणै दैंव, या सैजौ सौबै आगु कौरौ जू तुंवागै औसौए, या तुऔं धौखा दैंव, या आपी खै तुऔं दा ऊबा राखौ, या तोंवारै मुँह पांदी पौटाका लांव, तौ तुऐं सैय सौकौ। 21 हांव तोंवारै साथै तिनु बुरै कामौ खै कौरणौ कारिए ऐतरा हिम्मत वाल़ा ना थिया; पौरौ जियौं कोसी बातौ दै कुणिए घमण्ड कौरौ, हांव मूर्ख हौयौ बुलू तौ हांव बै घमण्डी कौरु। 22 का सैजै ही इब्रानी देश कै औसौ? हांव बै औसौए। का सैजै ही इस्राएल देश कै औसौ? हांव बै औसौए; का सैजै ही अब्राहम कै वंश औसौ? हांव बै औसौए। 23 का सैजै ही मसीह कै सेवक औसौ? (हांव पागलो कै जैशै बुलू) हांव तिनुदा बौड़ैयौ औसौ! मोऐं तिनुदै जादा मैहनत कौरे, तिनुदा कैई जादा कोयदै दा रौआ, बार-बार पीटा, बैजाए बैई मैरै जान पौरैशानी दै पौड़ै। 24 पाँच बैई यहूदी अगुवे मुखै उन्तालीस कौड़ै लाए। 25 तीन बैई मोऐं बेतौ कै खाए, एकबेई मुं पांदी पथराव कौरा, तीन बैई जहाज जिथपांदी हांव बौठै रौआ थिया, सैजौई टोटै गौ; ऐक दूस औरौ ऐक रात मोऐं समुन्द्र दै काटै। 26 हांव बार-बार यात्राओं दा; नोंदी कै खतरै दा; डाकुओं कै खतरै दा; बैगानै यहूदी कै खतरै दा; नोगरो कै खतरै दा, जोंगलो कै खतरै दा; समुन्द्र कै खतरै दा, झूठै बिशवाशियौं कै बीच कै खतरै दा रौआ; 27 मोऐं कैईंयौं राती जागैयौ, भूखै-तीशै दै रौयौ, जाड़ै औरौ कम लुस्कै दै रौयौ चैईथै मैहनत कौरे औरौ कैईंयौं पौरैशानी झैली। 28 औरौ इनु बातौ कै अलावा जिथका बखान हांव ना कौरु, सौबै कलीसियाओं कै चिन्ता हर रौज मुखै दबांव। 29 जोबै कुणिए कमजोर हौंव तौ हांव बै कमजोरी महसूस कौरु, जोबै बै कुणिए पाप दै पौड़ै जांव तौ हांव पौरैशान हौए जोऊं। 30 जै घमण्ड कौरणा जौरुरी औसौ, तौ हांव आपणै कमजोरी कै बातौ पांदी घमण्ड कौरदा। 31 पौरमेशवर अमारै प्रभु यीशु कै पिता जू सौदा धन्य औसौ, जाणौए कै हांव झूठु ना बुलू। 32 दमिश्क शहर दा अरितास राजा का राज्यपाल थिया, तैणै मुखै पाकौड़णौ खै दमिशकियौ कै नोगरो दा पैहरा बौठाल़े राखा थिया। 33 पौरौ दोस्ते ऐक बौड़ै शैकड़ै कौरेयौ ऐक लाम्बी पागोई बांनैयौ मुखै तिंदा बौठाल़ा औरौ तैसी दीवार कै ऐक खिड़की बाटी शहर कै बायरै जोमीनो पांदी राखै दिया, औरौ हांव राज्यपाल शै बौचै गौआ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation