2 कुरिन्थियों 10 - सिरमौरी नौवाँ नियमआत्मिक युद्ध 1 हांव सैजाई पौलुस जू तोंवारै सामणै डरपोक जैशणा औसौ, पौरौ पीठ पीछै तोंवारै ढौबौशै हिम्मत कौरु; तुऔं शै मसीह कै नम्रता, औरौ कोमलता कै साथै बिन्ती कौरु। 2 हांव ऐजी बिन्ती कौरु, कै किछै लोगै बौल़ौ कै आमु इयौं दुनिया कै लोगौ कै जैशणै काम कौरु। इथकारिए जोबै हांव आन्दा तौ मुखै उम्मीद औसौ कै मुखै तिनकै साथै सख्त हौणौ पौड़दौ। हांव मोजबूती शै हौयौ बिन्ती कौरु कै जोबै हांव आन्दा तौ मुखै तोंवारै साथै ऐसी दुनिया कै लोगौ कै जैशणा बर्ताव ना कौरणा पौड़ौ। 3 जिथुकै जै आमै इयौं दुनिया दै रोऊं, तौ बै आमु आपणै दुशमनोआरी तैशै ना लौडु़ जैशै इयौं दुनिया कै लोग लौड़ौ। 4 जिथुकै जिनु हथियारों लैई आमु लौडु़, सैजै आदमी कै हथियार ना आथी, पौरौ मोजबूत बन्धन कै गिराणो कारिए पौरमेशवर कै शौकतीशाली हथियार औसौ। 5 आमै मन बातौ खै, औरौ हरेक ऊंची बातौ खै, जू पौरमेशवर कै पौछेयाण कै खिलाफ उठौ, इन्कार कौरु, औरौ हरेक ख्याल काबू दै लायौ मसीह कै आज्ञाकारी बाणै दियु। 6 औरौ तैयार रौंव कै जोबै तुऐं पूरी तरह शै मसीह कै आज्ञाकारी हौए जांव, तौ हर भान्त कै आज्ञा ना मानणौ वाल़ै तैसी आदमी कै सौजा दैंव। पौलुस कै औधिकार 7 तुऐं बायरी दिखावट कै दैखौ, जै कोसी कै आपी पांदी ऐजा भोरोशा हौं, कै हांव मसीह का औसौ, तौ सै ऐजौ बै जाणै पाव, कै जैशै सै मसीह का औसौ, तैशैखैई आमै बै मसीह कै औसौ। 8 जिथुकै जै हांव तैसी औधिकार कै बारै मुंजी हौजौ बै घमण्ड दिखोऊ, जू प्रभुए तोंवारै बिशवाश खै नाश कौरणौ कारिए नी पौरौ तोंवारै बिशवाश खै बौढ़ाणौ दै मौदद कौरणौ कारिए आमु दैय राखा, तौ शर्मिंदा ना हौंदा। 9 ऐजौ हांव इथकारिए बुलू, कै चिट्ठियों कै दवारा तुऔं डोरणोवाल़ा ना बौणु। 10 जिथुकै तुऔं मुंजी किछै लोग बौल़ौ, “तैसकी चिट्ठियां तौ सुंचणौ वाल़ी औरौ असरदार औसौ; पौरौ जोबै दैखुए, तौ बौल़ौए सै कमजोर आदमी औरौ तैसकी बातौ बैजान औसौ।” 11 इथकारिए जू ऐशै बौल़ौ, सै ऐजै सौमझ राखौ, कै जैशै पीठ पीछै चिट्ठियों दै अमारै वचन औसौ, तैशैखैई तोंवारै सामणै अमारै काम बै हौंदै। पौलुस कै औधिकार कै हदें 12 जिथुकै आमुखै ऐजी हिम्मत ना आथी कै आमै आपी खै तिनकै साथै गिणु, या तिनुमुंजी आपी खै मिलोऊं, जू आपणी तारीफ कौरौ, औरौ आपी खै आपस मुंजी नाप तौलैयौ ऐकी दुजैआरी तुलना कौरेयौ मूर्ख ठौहरौ। 13 आमै तौ तैसी कामौ दै बायरै जू पौरमेशवरे आमु दैय राए कोदी बै घमण्ड ना कोरदै, पौरौ ऐक हद तौड़ी जू पौरमेशवरे तय कौरी राए औरौ तिथमुंजी तुऐं बै आए गौवै, औरौ तिथकै हिसाब शै घमण्ड बै कौरु। 14 जिथुकै आमै आपणै हद शै बायरै आपी खै बौढ़ाणा ना चोऊं, जैशैकै तुऔं तौड़ी ना पोऊंचणौ कै दशा दो हौंव, यानी तुऔं मसीह कै सुसमाचार शुणाणौ कारिए कुरिन्थुस शहर तौड़ी यात्रा कौरणौवाल़ै आमु आगलै आदमी थिए। 15 औरौ आमै हद शै बायरै ओकी कै मैहनत पांदी घमण्ड ना कौरु; पौरौ आमुखै आशा औसौ कै जियुं-जियुं तोंवारा बिशवाश बौढ़दा जाला तियुं-तियुं आमै आपणी हद कै हिसाब शै तोंवारै बौजैह शै हौजौ बै जादा तोंवारै बीच काम कौरणौ दै मोजबूत हौंदै। 16 कै आमै तोंवारै हद शै दूर-दूर जौगैह दै बै सुसमाचार शुणौऊं, औरौ ऐजौ नी, कै आमै ओकी कै हद कै भीतरै बौण बाणैयौंदे कामौ पांदी घमण्ड कौरु। 17 पौरौ जैशैकै पवित्र शास्त्र दो लैख राए, जू घमण्ड कौरौ, सै प्रभु पांदी घमण्ड कौरौ। 18 जिथुकै जू आपणै बौढ़ाए कौरौ, सैजौ नी, पौरौ जैसकै बौढ़ाए प्रभु कौरौ, सैजाई प्रभु कै नज़र दा आछा औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation