2 कुरिन्थियों 1 - सिरमौरी नौवाँ नियमस्वागत 1 मोऐं पौलुसे, तुऔं ऐजी चिट्ठी लैखै लौए। हांव पौरमेशवर कै इछा शै मसीह यीशु का चोणेयौंदा चैला औसौ, औरौ अमारा साथी बिशवाशी भाई तीमुथियुस कै ढौबौशै कुरिन्थुस शहर कै कलीसिया कै औरौ अखाया प्रदेश कै सौबै पवित्र लोगौ कारिए ऐजै चिट्ठी लैखै लौए। 2 अमारै पिता पौरमेशवर औरौ प्रभु यीशु मसीह कै ढौबौशै तुऔं अनुग्रह औरौ शान्तै भैटदै रौंव। शान्तै का पौरमेशवर 3 अमारै प्रभु यीशु मसीह कै पिता औरौ पौरमेशवर कै बौड़ाए हौंव, जू दया का पिता औसौ औरौ आमु हमैशा तसल्ली दैंव जू सौब तरह कै शान्तै का पौरमेशवर औसौ। 4 जोबै बै पौरैशानी आमु पांदी आंव, सै हर बार आमु तसल्ली दैंव, इथकै अलावा आमु ओकी कै तैशैखैई तसल्ली दैणै चैंई जैशणै पौरमेशवर आमु तसल्ली दैंव। 5 जिथुकै जैशैखै आमु मसीह दी पीड़ो सैहन कौरी तैशैखैई मसीहे बै पीड़ो सैई। तैशैखैई आमु बै मसीह कै दवारा जादा शान्तै भैटदी। 6 जै आमै कौल़ेश पोऊँ, तौ ऐजौ तोंवारै शान्तै औरौ मोक्ति कारिए औसौ, औरौ जै आमु शान्तै पोऊँ, तौ ऐजौ तोंवारै शान्तै कारिए औसौ, जिथकी बौजैह शै तुऐं धीरज कै साथै तिनु कौल़ेशौ खै सैय पांव जिनुखै आमु बै सौऊवै। 7 औरौ अमारै आशा तोंवारै बारै मुंजी मोजबूत औसौ, जिथुकै आमु जाणुए कै जैशैखै तुऐं अमारै दुखो दै शामिल औसौ, तैशैखैई अमारै तसल्ली दै बै शामिल हौंदै। दुख शै बौचाव 8 ओए रै बिशवाशी भाईयों, हांव जाणुए कै तुऐं तिनु पौरैशानी कै बारै मुंजी जाणौ जू आमु पांदी थी, जू एशिया प्रदेश दी आमु पांदी पौड़ौ, कै ऐशणै भारी बौझ लैई दौबे गौवै थिए, इथका भार टिपणा आमु कारिए बरदाश शै बायरै थिया। इथै तौड़ी कै आमुए जिणौ कै पूरै उमीद छोड़े दै थै। 9 यानी आमुए आपणै मन दौ सौमझै दियु थियु, कै आमु मौरणौ वाल़ै थिए कै आमै आपणा भोरोशा नी राखु, पौरौ आमै पौरमेशवर पांदी बिशवाश कौरु जू मौरेयौंदे कै जियुंदी कौरौ। 10 तैणै मौत कै ऐतरै बौड़ै खतरै लैई बौचौऊवै औरौ ऐबै बै बौचांदा; औरौ तैसदै आमु ऐजै उमीद औसौ कै सै आगै बै आमु बौचायौ राखदा। 11 जिथुकै तुऐं अमारै प्रार्थनाओं कै दवारा अमारै मौदद कौरौ कै जू आशीषौ तिनकै दवारा भैट रैई तिथकी बौजैह शै बैजाए लोग अमारै ढौबौशा धन्यवाद कौरौ। शुद्ध विवेक 12 जिथुकै आमु गर्व औसौ कै अमारा विवेक साफ औसौ, कै दुनिया दा औरौ खास कौरेयौ तोंवारै बीच अमारा चरित्र जू पौरमेशवर कै ढौबौशा औसौ ऐशणी पवित्रता औरौ सौचाई कै साथै थिया, आमु आदमियों कै ज्ञान पांदी भोरोशा ना राखु। पौरौ पौरमेशवर कै अनुग्रह पांदी राखु। 13-14 आमै तुऔं खै सैजौई लिखु जिथु तुऐं पौढ़ै या सौमझै सौकौ। भलैई ऐबै तुऐं आमु खै पूरी तरह शै ना सौमझौ, मुखै उमीद औसौ कै तुऐं आमु पूरी तरह शै सौमझै जांदै, ताकि अमारै प्रभु यीशु कै औटेयौ आणौ पांदी तुऐं आमु पांदी तैशैखैई गर्व कौरौ जैशैखै आमै तुऔं पांदी गर्व कौरु। यात्रा दा बौदलाव 15 मुखै यकीन थिया कै तुऐं आमु सौमझौए औरौ इथकारिए मोऐं सौबीदै आगै तुऔंआरी भैटिणौ कै तरकीब बाणै राए थै। ऐशैखैई तुऔं खै मैरै दवारा दु यात्राओं कै आशीष भैटौ। 16 मैरै तरकीब थै कै हांव तोंवारै धोरे दा हौयौ मकिदुनिया प्रदेश खै जोऊं, औरौ तोबै मकिदुनिया पौरैशा आयौ तोंवारै धोरे ओऊं, ताकि हांव तुऔं कैईंदै यहूदिया प्रदेश कै यात्रा कारिए मौदद पौऊं। 17 इथकारिए मोऐं जू ऐजै इछा कौरे राए थै तौ का मोऐं तोंवारै बात “ना” मानी या दुनिया कै लोगौ साए जू ऐकी सौमय दै हां औरौ बाद मै ना बौल़ौ। 18 जैशैखै पौरमेशवर भरौशेलायक औसौ, जू आमै तुऔं कै बुलू सैजौ हमैशा साचौ औसौ, कै अमारै तैसी वचन लैई जू तुऔं खै बौल़ै राए हां औरौ ना दुईनै ना पाए जांव। 19 जिथुकै पौरमेशवर का बैटा यीशु मसीह जैसका अमारै दवारा यानी मैरै औरौ सीलास औरौ तीमुथियुस कै दवारा तोंवारै बीच मुंजी प्रचार हौआ; यीशु मसीह दै कौलोंई “हां” औरौ कौलोंई “ना” ऐजी दुईनै बातौ ना हौंव। 20 जिथुकै पौरमेशवर कै जैतरै वादै औसौ, सैजै सौबै मसीह दै पूरै हौंव, इथकारिए आमै आमीन बुलू, कै अमारै दवारा पौरमेशवर कै महिमा हौंव। 21-22 पौरमेशवर ही औसौ, जू तोंवारै साथै आमु मसीह दै मोजबूत कौरौ। पौरमेशवरे आमु पांदी आपणै मोहर लायौ बयाने कै रुप दै आपणै आत्मा अमारै दिल दै राखैयौ अमारा अभिषेक कौरे राए। 23 पौरमेशवर मैरा गवाह औसौ कै मोऐं तुऔं साचौ बौल़ै लो, कै हांव औटेयौ कुरिन्थुस शहर दा इथकारिए ना आई कै हांव तुऔं कोष्ट ना दैणा चोऊं। 24 ऐजौ ना आथी, कै आमै बिशवाश कै बारै मुंजी तुऔं पांदी राज कौरणा चोऊं; पौरौ तोंवारै आनन्द दै शामिल औसौ जिथुकै तुऐं बिशवाश दै बौणीए रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation