1 तीमुथियुस 5 - सिरमौरी नौवाँ नियमकलीसिया कै लोगौआरी बर्ताव 1 आपी दै बौड़ै कोसी आदमी कै बुरै तरीकै शै ना डांट, तैसीकै आदर कै साथै सलाह दै जैशैकै सै तैरा पिता औसौ सैजै आदमी जू तांव दै नानड़ै औसौ तिनुआरी आपणै भाई कै जैशणा बर्ताव कौरेया। 2 आपी दी बौड़ी बैटमाणिशौ कै आपणी माँ कै जैशणा बर्ताव कौरेया, औरौ आपी दी नानड़ी बैटमाणिशौ कै साथै आपणी बोईण कै जैशणा शुध्द मन कै साथै बर्ताव कौरेया। विधवाओं की मौदद 3 औरौ तिनु विधवाओं कै प्रति आदर दिखा, जिनु कैई तिनकै जौरुरत पूरै कौरणौ कारिए औरौ तिनकै दैखभाल कौरणौ कारिए कुणिए ना आथी। 4 औरौ जै कोसी विधवा कै नानड़िया या नाती पोते हौंव। तौ तिनु आपणै खुद कै परिवार कारिए सैजै काम कौरणै चैंई जू मसीही बिशवाश तिनु कैईंदै उमीद कौरौए कै सै कौरौ। औरौ आपणै माँ बापू या दादा दादी कै दैखभाल कौरेयौ तिनु कारिए किछै कौरौ। जिथुकै पौरमेशवर कै ऐजौ ही भांव। 5 सैजै विधवा, जियौंकै दैखभाल कौरणौवाल़ा कुणिए ना आथी, सै पौरमेशवर पांदी ही आशा राखौ, औरौ रात दूस बिन्ती औरौ प्रार्थना मुंजी पौरमेशवर शै आपी कारिए मौदद मांगो। 6 सैजी विधवाएं जू आपणा सारा सौमय सुख-विलास दै बितांव, सै शोरीर शै तौ जियुंदी औसौ पौरौ आत्मिक रुप शै मौरेयौंदी औसौ। 7 बिशवाशियौं कै ऐजै नियम दै ताकि कुणिए बै तिनु पांदी दोष नी लांव। 8 पौरौ जै कुणिए आपणै रिशतेदारौ कै, खास कौरेयौ आपणै परिवार कै मौदद ना कौरौ, तौ सै बिशवाश शै मुकरे गौआ, औरौ अबिशवाशी शै बै बुरा बौणै गौआ 9 तू तिनु विधवाओं कौ नांव दर्ज कौर जिनकै उमर शाठ सालो दै जादा औसौ, औरौ सै आपणै घोरवाल़ै कै साथै वफादार रौए रौली। 10 औरौ ओकी लोगौ कै इयौं बातौ कै पौछेयाण कौरणी चैंई कै तियैं सौदा आछै काम कौरे राए हौलै; जैशैखै, तियैं आपणै नानड़िया का पालन पोषण आछै तरह शै कौरे राए हौला, तियैं यात्रा कौरणौवाल़ै बिशवाशियौं का आपणै घोरे स्वागत कौरे राय हौला, तियैं ओकी बिशवाशियौं कै सेवा ऐक नौकराणी कै जैशणै कौरे राए हौलै औरौ तियैं तिनु लोगौ कै मौदद कौरे राए हौलै जू पौरैशानी दै थिए। तियैं हर तरह कै भले काम कौरणौ कारिए खुद कै पूरी तरह शै दैय राए हौला। 11 पौरौ जोवान विधवाओं खै नांव इयौं सूची दै ना लैखैया, जिथुकै जोबै तिनकै शोरीर कै इछाएं मसीह कि सेवा का वायदा कौरणौ शै ज्यादा मजबूत हौए जांव तौ सै औटेयौ बैयाव कौरणा चांव। 12 औटेयौ बैयाव कौरेयौ सै आपी कै दोषी ठोरांव जिथुकै तिनुऐ औटेयौ बैयाव ना कौरणौ का वादा आपणै आगलै वादै आरी ना राखै रैई। 13 औरौ इथकै साथ ही साथ सै घोरे-घोरे फिरैयौ सुस्त बौणै जांव, औरौ सिरफ सुस्त नै पौरौ ओकी लोगौ कै बारै दी बै चुगली कौरौ औरौ ओकी लोगौ कै कामौ दै बै टाँग अढ़ांव औरौ ऐशणी बातौ कौरौ जू तिनु ना कौरणी चैंई। 14 इथकारिए हांव ऐजी सलाह दैणी चोऊं, कै जोवान विधवाएं बैयाव कौरौ औरौ बोच्चे पौयदा कौरौ औरौ घोरबार संभाल़ो औरौ कोसी विरोधी कै बदनाम कौरणौ का मौका नै दैंव। 15 मोऐं ऐशै इथकारिए बौल़ै लो जिथुकै किछै विधवाएं आगैई पौरमेशवर कै आज्ञा कै मानणी बंद कौरे राए औरौ तिनुऐ सैजौ कौरे लो जू शैतान तिनुलैई कौरांव। 16 जै कोसी बिशवाशनी कै परिवार दी विधवाएं हौंव, तियौं कारिए ऐजौ सोही ना आथी कै सै कलीसिया खै तिनकी दैखभाल कौरणौ कै बौल़ौ। तोबै बिशवाशी तिनु विधवाओं की जौरुरते पूरी कौरे सौकौ जिनु कैई तिनकै मौदद कौरणौवाल़ा ओका कुणिए ना आथी। वचन कै शिखाणौवाल़ै अगुवो कै इज्जत 17 कुणिए बै अगुवे जू आपणै काम कै आछै शै कौरौ, तैसी सोही आदर औरौ सोही मजदूरी दैणौ कै लायक सौमझा जाणा चैंई, खास तौर शै सैजै लोग जू पौरमेशवर कै सौंदेश कै शिखाणौ औरौ प्रचार कौरणौ कारिए कड़ी मैहनत कौरौ। 18 जिथुकै पवित्र शास्त्र औटेयौ बौल़ौ, “की बौल़दौ कौ मुँह नी बानिया जिथुकै बौल़ोद ही तिथुकै घाँव,” इथकारिए “मजदूर कै आपणै मालिक शै मजदूरी लोणो का हक औसौ।” 19 ऐकी अगुवे कै खिलाफ पाप कौरणौ का दोष तांव तौड़ी नी मानैया जांव तौड़ी दो या तीन लोग ऐकैई बात कारिए तैसी पांदी दोष ना लांव। 20 जू लोग पाप कौरौ, ताखै तिनु लोगौ कै सौबी बिशवाशियौं कै सामणै डांटणै चैंई, ताकि औकै बिशवाशी बै पाप कौरणौ शै डौरौ। 21 पौरमेशवर, औरौ मसीह यीशु, औरौ चोणेयौंदे स्वर्गदूतौ कै उपस्थित जाणैयौ हांव ताखै आदैश दियु कै जू किछै बै तू कौरे, तिथमुंजी कोसी आदमी कै प्रति बिना भैदभाव कै काम कौर। 22 जांव तौड़ी सै आपी कै मसीह कै प्रति बिशवाश लायक साबित ना कौरे दैंव तांव तौड़ी तैसीकै अगुवा नी बाण औरौ जै तू ऐशै कौरे, तौ तू तैसकै पापौ कारिए बै जुमैवार औसौ, ठाणै पा कै तू आपी पाप ना कौरे। 23 तू ऐबै सिरफ पाणी ना पी, पौरौ आपणै पेट कै औरौ आपणै बार-बार बीमार हौणौ की बौजैह शै दैणिक-दैणिक दवा कै रुप दा अंगूर का रस पिया कौर। 24 हांव ताखै बुलू कै अगुवे कै चुणणो दै जल्दबाजी ना कौर जिथुकै किछै लोग खुलैआम पाप कौरौ। इथै तौड़ी कै न्याय हौणौ दै आगैई सै बिशवाशियौं कै सामणै दोषी औसौ। ओकी लोगौ कै पाप इशैक ना दैखियौं, पौरौ सिरफ बाद दा पौता चालौ। 25 तैशैखैई, जोबै लोग आछै काम कौरौ, तौ ऐजौ ओकी बिशवाशियौं कै दवारा साफ-साफ दैखियौं। औरौ जै सै तिनु ऐक बार बै साफ-साफ ना दैख सौकौ, तौ बाद दै सै तिनु जाणै ही पांदै। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation