1 तीमुथियुस 4 - सिरमौरी नौवाँ नियम

झूठै उपदैशको कैईंदै चौकश

¹ पवित्र आत्मा साफ-साफ बौल़ौ, कै इनु आखरी सौमय दै कैतरै लोग मसीही शिक्षाओं पांदी बिशवाश कौरणा बन्द कौरे दैंदै। सै तिनु अशुध्द आत्माओं कै मानदै जू तिनु भोटकांवए औरौ तिनु झूठी शिक्षाओं पांदी जू दुष्टआत्माओं कै ढौबौशी औसौ।

² गौलत शिक्षा दैणौवाल़ै झूठै औसौ। सै तिनु बातौ कै ना जाणै सौकौ कै तिनुऐ सोही लो कौरे कै गौलत, जैशै तिथु मांस कै किछै बै महसूस ना हौंव, जिथु ताते लोहे लैई फोकै दैंव।

³ गौलत शिक्षा दैणौवाल़ै शिखांव कै बैयाव कौरणा औरौ किछै भांत को खाणौं खाणौ गौलत औसौ। पौरौ पौरमेशवरे ऐजौ सौबै बिशवाशी कारिए बाणै राए, जू साची शिक्षाओं खै जाणौए, कै सै तिथु धन्यवाद कै प्रार्थना कै बाद खाणौ खाए सौकौ।

⁴ जिथुकै पौरमेशवर कै बाणैयौंदे हरेक चीज़ आछै औसौ, औरौ हर भान्त कौ खाणौं खाणौ कै लायक औसौ। पौरौ ऐजौ पौरमेशवर खै धन्यवाद दैयौ खाणौ चैंई;

⁵ जिथुकै पौरमेशवर कै वचन औरौ प्रार्थना खै दवारा ऐजौ पौरमेशवर कै मानणौ लायक हौए जांव।

मसीह कै आछै सेवक

⁶ जै तू बिशवाशियौं कै लगातार याद दियांदा रौए कै जू मोऐं इबी-इबी आदैश दैय राए, औरौ ताखै बिशवाश कै सौंदेश औरौ आछी शिक्षा कै दवारा मोजबूत कौरे राए, जिथका तोऐं पालन कौरे राए, तौ तू यीशु मसीह का ऐक आछा सेवक औसौ, तू बिशवाश कै सौंदेश औरौ आछी शिक्षा कै दवारा मोजबूत हौए रौआ।

⁷ पौरौ तिनु झूठी कहाणी औरौ जू बातौ पौरमेशवर कै आदर ना दैंव तिनुदै दूर रौया। औरौ तुऔं पौरमेशवर कै आदर दैणा वाल़ा जीवन जिणौ कारिए आपी कै लगातार शिखांदै रौणौ चैंई।

⁸ जिथुकै शोरीर कै कामौ शै सिरफ तोंवारै शोरीर कै ही फायदा भैटदा, पौरौ भोक्‍ती सौब बातौ कारिए भले औसौ, जिथुकै ऐजौ ऐक आदमी खै इनाम दैणौ का वादा कौरौ जोबै सै इयौं धोरती पांदी जियुंदी रौंव औरौ मोरणो कै बाद बै।

⁹ ऐजी बात साची औसौ, औरौ हर भान्त शै मानणौ कै लायक औसौ।

¹⁰ आमु ऐसी जीवन कै पाणौ कारिए संघर्ष औरौ कड़ी मैहनत कौरु जिथुकै आमै जियुंदै पौरमेशवर पांदी आशा कौरु, जू सौबी लोगौ का उध्दारकर्ता औसौ, औरौ खास तौर शै तिनका जू तैसी पांदी बिशवाश कौरौ।

¹¹ औरौ बिशवाशियौं कै इनु बातौ कै शिक्षा दैंव कै सै तिनका पालन कौरौ।

सेवकाई पांदी ध्यान राखणा

¹² ऐशैखै बर्ताव कौरौ कै कुणिए बै तैरा अनादर नी कौरौ, जिथुकै तू जोवान औसौ, पौरौ ताखै आपणै बौल चाल दो आछै बर्ताव कै साथै, प्यार कै साथै, मसीह कै बिशवाश कै साथै औरौ पवित्र जीवन जिणौ कै साथै बिशवाशी लोगौ कारिए नमूना बोणणौ चैंई।

¹³ मैरै तिथै पोऊंचणौ तौड़ी, बिशवाशियौं कारिए पवित्र शास्त्र कै जोर शै पोढ़णो, हौंसला बौढ़ाणौ औरौ शिखाणौ औरौ मतलब सौमझाणौ कारिए सौमय निकाल़ौ।

¹⁴ तैसी वरदान शै जू हौणौवाल़ी बातौ कै दवारा तांव पांदी कलीसिया कै अगुवे कै हाथ राखदै सौमय ताखै भैटी रौआ थिया, तैसी लगातार ताखै इस्तैमाल कौरणा चैंई।

¹⁵ इनु बातौ कै चौकशाई शै भ्यास कौर औरौ आपी कै पूरी तरह शै तिनु बातौ कै प्रति न्योछार कौरे दै, ताकि हरेक आदमी ऐजौ दैखै सौकौ कै तू आपणै बिशवाश दा बौढ़दा लागै रौआ।

¹⁶ इथ बारै मुंजी चौकश रौया कै तू कैशै रौए औरौ का शिखै। इनु बातौ पांदी मोजबूत रो, जै ऐशणौ कौरला, तौ इथका नतीजा ऐजा हौला कै पौरमेशवर तैरै दवारा ताखै औरौ तैरै शुणणौवाल़ै कै बै न्याय शै बौचांदा।