1 तीमुथियुस 3 - सिरमौरी नौवाँ नियमकलीसिया दै अगुवो कै गुण 1 ऐजै कहावत साची औसौ कै जू कलीसिया का अगुवा हौणा चांव, तौ सै आछै कामौ कै इछा कौरौ। 2 इथकारिए, ऐजै बात खास औसौ कै अगुवे दै ऐजै गुण हौणै चैंई: तैसीदा कुणजैई दोष ना हौंव, औरौ तैसीकै ऐकैई घोरवाल़ी हौणै चैंई, औरौ शान्त बर्ताव कौरणौवाल़ौ हौणौ चैंई, सै जू किछै बै कौरौ तिनु आपी पांदी काबू राखणौवाल़ै हौणौ चैंई, औरौ लोगौ कै दवारा आदर कौरणौवाल़ा हौणौ चैंई, औरौ तैसी आपणै घोरे पोऊंणै कै इज्जत कौरणौवाल़ा हौणौ चैंई औरौ तैसी पौरमेशवर कै वचन कै आछै शै शिखाणौ कै लायक हौणौ चैंई। 3 तैसी सूरवाए औरौ झौगड़वाए नी हौणौ चैंई; पौरौ दयालु औरौ सौब्री औरौ शान्त स्वभाव का आदमी हौणौ चैंई, औरौ तैसी धन का लालच ना हौणा चैंई। 4 तैसी आपणै घोरो का आछा इतंजाम कौरणौवाल़ा हौणौ चैंई, औरौ तैसी आपणै नानड़िया कै शिखाणौ चैंई कै सै हर बात दै आदर कै साथै तैसकी आज्ञा खै मानौ। 5 जै कुणिए आपणै परिवार का दैखभाल औरौ इतंजाम ना कौरे सौकौ, तौ पौरमेशवर कै लोगौ कै रोखवाल़ै कैशैखै कौरदा। 6 तैसीकै बिशवाश दै मोजबूत हौणौ चैंई, नही तौ हौए सौकौ कै सै घमण्डी हौए जांव औरौ तैसी सैजै सौजा भैटलै जू पौरमेशवरे शैतान कै दैय राखै। 7 औरौ कलीसिया शै बायरै कै लोगौ मुंजी बै तैसका आछा नांव हौणा चैंई। ताकि लोग तैसकै बारै मुंजी बुरी बातौ नी कौरौ औरौ शैतान तैसी आपणै जाल दा ना फौशांव। सेवको कै गुण 8 तैशैखैई कलीसिया कै सेवको कै ऐशणै आदमी हौणौ चैंई जिनका लोग आदर कौरौ। तिनु दुगल़ै औरौ सूरवाए नी हौणौ चैंई, बैसब्री औरौ धौखा दैयौ धन कमाणौ वाल़ै नी हौणौ चैंई। 9 तिनुकैईं ऐक स्पष्ट विवेक हौणा चैंई जोबै सै इनु बातौ पांदी बिशवाश राखणा जारी कौरौ कै पौरमेशवरे जू शिक्षाए दैय रैई सै साची औसौ। 10 जोबै कलीसिया कै सेवको का चुनाव हौंव तौ आगै तिनु ऐजौ साबित कौरणौ दैंव कै तिनुकैईं सोही गुण औसौ। औरौ जै तिनुदा किछै बै दोष ना हौव तोबै सै सेवा का काम कौरे सौकौ। 11 ऐशैखैई तिनकी घोरवाल़ी सौबी कै दवारा आदर पाणौ कै लायक हौणी चैंई। निन्दा कौरणौवाल़ी नी हौणी चैंई, शान्त तरीकै शै बर्ताव कौरणौवाल़ी हौणी चैंई औरौ पूरी तरह शै भरोसेमंद हौणी चैंई। 12 कलीसिया कै सेवको कै आपणी घोरवाल़ी कै प्रति वफादार हौणौ चैंई, आपणै नानड़िया कै साथै आपणै कुड़बे कै ओकी सदस्यों का ठोगड़ापा औरौ दैखभाल कौरणौवाल़ौ हौणौ चैंई। 13 जिथु जू सेवको का काम आछै ढंग शै कौरे सौकौ, सै आपी कारिए लोगौ कै दवारा आछा नांव पालै औरौ सै यीशु मसीह दै आपणै बिशवाश कै बारै मुंजी बौड़ै हिम्मत कै साथै बौल़ै सौकौ। महान रहस्य 14 हांव तैरै धोरे तावल़ा आणौ खै आशा राखणौ पांदी बै ऐजी बातौ ताखै इथकारिए लिखु, 15 कै जै मैरै आणौ दै देर हौलै, तौ तू जाणै पाया कै, पौरमेशवर कै परिवार कै सदस्यों कै रुप दै जू कै जियुंदै पौरमेशवर कै कलीसिया औसौ, आमु आपणा जीवन कैशणा जिणा चैंई। ऐजै बिशवाशी तैशैखैई साची शिक्षाओं का साथ दैंदै औरौ तिनु बाणैयौ राखलै जैशै नियुं औरौ खोम्बा घोरो कै सहारा दैयौ कै तिथु मजबूत कौरौ। 16 बिना कोसी शक कै आमै इयौं बातौ कै साबित कौरे सौकु कै पौरमेशवर कै शिक्षाए बिना कोसी वाद विवाद कै पूरी तरह शै साची औसौ। मसीह ऐक आदमी बौणा, तैसी पवित्र आत्मा कै दवारा पौरमेशवरे आपणा बैटा साबित कौरा, स्वर्गदूतै तैसी दैखा, लोगै देश-देश दा तैसकै बारै मुंजी प्रचार कौरा, पूरी दुनिया कै लोगै तैसी पांदी बिशवाश कौरा, औरौ तैसी स्वर्ग कै महिमा दा स्वर्गो कै ऊबा निया। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation