1 तीमुथियुस 1 - सिरमौरी नौवाँ नियमजाणकारी 1 मोऐं पौलुसे ऐजी चिट्ठी लैखै लोए। हांव अमारै उध्दारकर्ता पौरमेशवर औरौ अमारै प्रभु यीशु मसीह, जैसीदै आमै आशा राखु, तैसकै औधिकार शै यीशु मसीह का ऐक चोणेयौंदा चैला औसौ। 2 मोऐं ऐजै चिट्ठी तीमुथियुस कै लैखै लोए। तू मैरै आपणै बैटै कै जैशणा औसौ जिथुकै तू बै मसीह दा बिशवाश कौरे: हांव प्रार्थना कौरु कै पिता पौरमेशवर औरौ अमारै प्रभु यीशु मसीह दै ताखै अनुग्रह औरौ दया, औरौ शान्तै भैटदै रौंव। झूठी शिक्षाओं कै खिलाफ चैतावणी 3-4 ओए रै तीमुथियुस जैशैखै तू जाणैए कै इफिसुस शहर दै किछै ऐशणै लोग औसौ जू गौलत शिक्षा दैंव। सै लगातार झूठी कहाणी औरौ पुराणिया कै बारै मुंजी शिखांव। जोबै हांव इफिसुस शहर शै मकिदुनिया प्रदेश दा जाणौ कारिए तैयार थिया, तौ मोऐं ताखै इफिसुस शहर दौ रौणौ कारिए बौल़ौ कै सै ऐशणै शिक्षा नी दैंव। जोबै सै ऐशणी बातौ शिखांव, तौ लोग तिनकै बारै मुंजी चौर्चा कौरौ। इथका नतीजा ऐजा औसौ कै तिनु शिखाणौ वाल़ै तिनु कामौ कै ना कौरे लैई जू पौरमेशवरे तिनु दैय राए थिए, जिनु सै सिरफ पौरमेशवर पांदी भोरोशा कौरेयौ कौरे सौकौ। 5 तुऔं आज्ञा दैणौ का मैरा मकसद ऐजा औसौ कै तुऐं ऐकी दुजैआरी साची मन शै औरौ आछै विवेक औरौ निष्कपट बिशवाश कै साथै प्यार कौरौ। 6 गौलत शिक्षा दैणैवाल़ै इनु सौबी चीज़ौ कै कौरणी बन्द कौरे दी, औरौ सिरफ बेतुकी बातौ कै बारै मुंजी बातौ कौरी। 7 ऐजै गौलत शिक्षा दैणौवाल़ै, तिनु मूसा कै कानून औरौ नियमौ कै शिखाणौ वाल़ै हौणा चांव, पौरौ असल दौ किछै बै ना जाणौए कै का शिखाणौ कै कौचिश कौरे लोए औरौ मोजबूत भरोशै कै साथै औड़ेयौंदे रौंव। 8 आमै जाणुए कै मूसा कै कानून कै शिखाणौ वाल़ै आछै औसौ पौरौ तोबै ही जोबै लोग इनु सोही तरीकै शै शिखांव। 9 आमै जाणुए कै मूसा कै कानून धरमी लोगौ कारिए नी पौरौ तिनु कारिए औसौ जू पौरमेशवर कै कानून कै अणदैखा कौरौ औरौ ना आज्ञा का पालन कौरौ। औरौ सैजै औकै लोग बै जू पौरमेशवर कै आराधना ना कौरौ बल्कि लगातार पाप कौरौ। औरौ सैजै बै जू भोक्ती ना कौरौ औरौ पौरमेशवर का आदर ना कौरौ औरौ अपवित्र औरौ अशुध्द जीवन जियौं, औरौ माँ-बापू औरौ ओकी कै हथयारै, 10 गौलत सौमबंध राखणौवाल़ै, मर्द का मर्द कै साथै औरौ बैटमाणिश का बैटमाणिश कै साथै, औरौ आदमी कै गुलामी दै बिकणौवाल़ै औरौ झूठु बौलणौ वाल़ै, औरौ झूठी शौं खाणौवाल़ै, औरौ सैजै लोग जू सैजौ सौब ठुँ कौरौ, जिथु कौरणौ कारिए आमु कै सोही शिक्षा मौना कौरौ। 11 ऐजी साची शिक्षा तैसी सुसमाचार कै हिसाब शै औसौ जू तैसी महिमा कै बारै मुंजी औसौ जू धन्य पौरमेशवर शै सौमबंधित औसौ। पौरमेशवरे मुखै सैजा सुसमाचार ओकी कै बौताणौ कारिए सौंपै राए। पौरमेशवर कै अनुग्रह कारिए धन्यवाद 12 अमारै प्रभु यीशु मसीह का हांव धन्यवाद कौरु, जैणै मुखै शौकतै दैय राए। तैणै मुखै वफादार सौमझेयौ आपणै सेवा कारिए राखै राए। 13 हांव तौ बिशवाशी बाणणौ दा आगै मसीह कै बारै मुंजी बुरी बातौ कौरणौवाल़ा, औरौ बिशवाशी कै सौताणौवाल़ा, औरौ तिनुकै नुकसान पोऊंचाणौ वाल़ा थिया, जिथुकै हांव इबी तौड़ी मसीह पांदी बिशवाश ना कौरु थिया औरौ इयौं बौजैह शै हांव सौमझै ना सौकी कै जू मोऐं कौरे लो थियु सै गौलत थियु। इथकारिए पौरमेशवरे मुं पांदी दया कौरे, जिथुकै हांव ना सौमझी कै मोऐं का कौरे लो थियु औरौ मुखै इबी तौड़ी मसीह पांदी बिशवाश ना थी। 14 अमारै प्रभुए मुं पांदी लगातार आपणा अनुग्रह दिखोऊवा। तैणै मुखै बिशवाश औरौ प्यार दैय राए जिथुखै हांव प्रभु यीशु कै साथै एकजुट थिया। 15 ऐजै कहावत साची औसौ, जियौं पूरी तरह शै मानणी औरौ बिशवाश कौरणी चैंई कै यीशु मसीह आमु पापी लोगौ कै बौचाणौ कारिए दुनिया दा ओऊवा, जिनुमुंजी सौबिदा जादा पापी हांव औसौ। 16 पौरौ मसीह यीशुए मुंआरी दया दिखाए। मुखै माफ कौरा, मोऐं जैणै सौबी दै जादा पाप कौरे राए, इयौं बातौ लैई प्रभु ऐजौ दिखाणौ चांव कै सै कैतरा सहनशील औसौ। ऐजौ तिनु लोगौ कारिए ऐक उदारण हौंदा जू तैसी पांदी बिशवाश बाद मै कौरदै औरौ सौदा कै जिन्दगी पांदै। 17 ऐबै हमैशा का राजा जू सौदा कारिए जियुंदी औसौ जैसी कुणिए ना दैख सौकौ, तैसी एकमात्र साची पौरमेशवर का आदर औरौ महिमा जुग-जुग हौन्दै रौंव। आमीन। तीमुथियुस का फर्ज 18 ओए रै बैटा तीमुथियुस ऐजै सैजै नियम औसौ जू मोऐं ताखै दैय लौवै हांव ताखै तिनु बातौ खै याद कौरणौ कारिए बुलू जू पाछलै सौमय दै पौरमेशवर कै बातौ बौताणौवाल़ै बौल़ै रैई थी कै तैरै साथै हौंदी। ताखै सुसमाचार कै सौचाई कारिए ठीक ढंग शै लौड़णौ कारिए तिनु शब्दो का इस्तैमाल ऐक हथियार कै जैशणा कौरणा चैंई। 19 औरौ ताखै यीशु मसीह पांदी बिशवाश दो बौणैयौंदो रौणौ चैंई औरौ तू सैजौई कौर जू तू जाणैए कै सै ठीक औसौ, किछै लोगै इथपांदी ध्यान ना दी, जिथका नतीजा ऐजा हौआ कै तिनुऐ मसीह पांदी बिशवाश कौरणौ कै आपणै योग्यता खै नाश कौरे दै, ठीक तैशैखैई जैशै ऐक समुन्द्री जहाज चट्टान शै टौकराएयौ नाश हौए जांव। 20 तिनुमुंजी दै हुमिनयुस औरौ सिकन्दर औसौ, मोऐं तिनु कलीसिया शै निकाल़ै दिए औरौ तिनु शैतान कै शौकतै कै हवाले कौरे दिए ताकि सै शिखौ कै पौरमेशवर कै बैज्जती नी कौरणी चैंई। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation