1 थिस्सलुनीकियों 5 - सिरमौरी नौवाँ नियमऔटेयौ जियुंदी हौणौ कारिए तैयार रौणौ 1 ओए रै मैरै बिशवाशी भाईयों, तुऔं ऐजौ बौताणौ कै जौरुरत ना आथी कै प्रभु यीशु मसीह कोलो पाछु आन्दा। 2 जिथुकै तुऐं आपी ही ठीक शै जाणौए कै जैशै राती कै चोर एकदम आंव, तैशैखैई सैजौ दूस आन्दौ जौल़ौ प्रभु यीशु मसीह औटेयौ पाछु आन्दा। 3 जोबै लोग बौलदै हौलै, “ठीक ठाक औसौ, औरौ किछै बै डौर ना आथी,” तैसी सौमय, एकदम ही लोग बौड़ै कौल़ेश खै महसूस कौरलै। तिनु पांदी ऐक-ऐक कौरेयौ मुसीबत आन्दै, जैशैखै होल़किणु वाल़ी बैटमाणिशौ कै पीड़ो लागौ; औरौ सै तैसी बौड़ै कौल़ेश शै बौचै ना सौकौ। 4 पौरौ ओए रै मैरै बिशवाशी भाईयों, तुऐं इनारै दै ना आथी, कै प्रभु यीशु कै औटेयौ आणौ को दूस तुऔं पांदी चोर कै जैशणा एकदम आए जांव। 5 जिथुकै तुऐं सौबै पेयाशै कै संतान औसौ, औरौ दूसौ कै संतान औसौ, औरौ आमै राती या इनारै शै सौमबंध ना राखु। 6 इथकारिए आमु अबिशवाशियौं कै जैशणौ सौतेयौंदै नी रौणौ चैंई, पौरौ जागदै औरौ चौकश रौणौ चैंई। 7 जिथुकै जू सोतै जांव सै राती ही खै सुतौ, औरौ जू लापरवाह हौंव सै राती ही कै लापरवाह हौंव। 8 पौरौ आमु तौ दूसौ कै संतान औसौ इथकारिए आमु आपी पांदी काबू राखणा चैंई। अमारा बिशवाश औरौ प्यार अमारै रक्षा कौरौ जैशैकै कवच सैनिकौ कै रक्षा कौरौ। औरौ ऐजै आशा जू आमु सौदा कै सौजा शै बौचांव, तैसी टोप कै जैशणै औसौ जू ऐक सैनिक कै रक्षा कौरौ। 9 जिथुकै पौरमेशवरे आमु इथकारिए ना चोणे रैई कै आपणै गुस्से शै आमुखै सौजा दैंव पौरौ आमु प्रभु यीशु मसीह कै दवारा मोक्ति पाणौ कारिए ठोहराए राए। 10 यीशु मसीह आमु कारिए मौरा, कै आमु चाहै जियुं या मौरे जोऊं, जोबै प्रभु यीशु पाछु आला तोबै आमै सौदा तैसकै साथै रौए सौकु। 11 इयौं बौजैह शै ऐकी दूजै खै हिम्मत दैव, औरौ पौरमेशवर पांदी हौजौ मोजबूती शै बिशवाश कौरणौ कारिए ऐकी दूजै कै मौदद कौरौ जैशैखै तुऐं कौरौ बै औसौए। कलीसिया कै उपदैश 12 ओए रै बिशवाशी भाईयों, आमु तुऔं कैईंदी बिन्ती कौरु, कै प्रभु दै जू तोंवारै अगुवे औसौ औरौ तुऔं कारिए कड़ी मैहनत कौरौ, औरौ तुऔं कै शिक्षा दैंव तिनकी मानौ। 13 जू किछै सै तोंवारै खातिर कौरौ, तिथ बौजैह शै तिनका बैजाए आदर कौरौ औरौ तिनु बैजाए प्यार कौरौ, औरौ आपी मुंजी मिलै जोलैयौ रौव। 14 ओए रै बिशवाशी भाईयों, आमै तुऔं कैईंदै बिन्ती कौरु कै तिनु लोगौ खै चैतावणी दैव जू आलसी औसौ, औरौ तिनु लोगौ खै हिम्मत दैव जू डरपोक औसौ, औरौ जू बिशवाश दै कमजोर औसौ तिनकै मौदद कौरौ, सौबी कै ढौबौ सहनशीलता दिखाव। 15 ऐजौ ध्यान राखौ कै कोसी कै बुराई कै बौदलै बुराई नी कौरेया; बल्कि तुऔं ऐकी दूजै कारिए औरौ सौबी कारिए भले काम कौरणौ कै कौचिश कौरणै चैंई। 16 सौदा खुशी रौव। 17 सौदा प्रार्थना कौरदै रौव। 18 हर हाल दै धन्यवाद कौरौ: जिथुकै तुऔं कारिए मसीह यीशु दै पौरमेशवर कै ऐजी इछा औसौ। 19 पवित्र आत्मा कै कामौ कै लोगौ कै जिन्दगी दै हौणौ शै नी रौकौ। 20 ऐजौ ना सुंचौ कै पौरमेशवरे आपणै लोगौ खै जू हौणौवाल़ी बातौ प्रकट कौरे रैई सैजी बैकार औसौ। 21 पौरौ हरेक सौंदेश कै जांच पड़ताल कौरौ कै सै पौरमेशवर कै ढौबौशौ औसौए कै आथी ना, जू आछै सौंदेश खै स्वीकार कौरौ औरौ तिनका पालन कौरौ। 22 सौब भान्त कै बुराई शै दूर रौव। आर्शीवाद 23 पौरमेशवर जू शान्तै दैंव आपी ही तुऔं पूरी तरह शै पवित्र कौरौ; तोंवारै पोरे आत्मा, प्राण औरौ शोरीर अमारै प्रभु यीशु मसीह कै औटेयौ पाछु आणौ तौड़ी निर्दोष रौंव। 24 तोंवारा बौईदणो वाल़ा बिशवाश कै लायक औसौ, इथकारिए सै तुऔं पवित्र हौणौ कारिए बौईदो, औरौ सै तुऔं पवित्र बौणणौ दै मौदद कौरदा। 25 ओए रै बिशवाशी भाईयों, आमु कारिए प्रार्थना कौरौ। 26 शान्तै शै सौबी बिशवाशी भाईयों कै हाथ जौड़ेयौ ऐकी दूजै कै नमशकार कौरौ। 27 हांव तुऔं प्रभु का आदैश दियु कै ऐजै चिट्ठी सौबी बिशवाशी भाईयों खै पौढ़ेयौ शुणाए जांव। 28 हांव प्रार्थना कौरु, कै अमारै प्रभु यीशु मसीह का अनुग्रह तुऔं पांदी हौंदा रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation