1 थिस्सलुनीकियों 4 - सिरमौरी नौवाँ नियम

पवित्रता कारिए बुलाहट

¹ ओए रै मैरै बिशवाशी भाईयों आखरी दी आमै प्रभु यीशु मसीह कै नांव दै मोजबूती शै तुंआदै बिन्ती कौरु कै ऐशणा जीवन जियौ, जू पौरमेशवर कै खुश कौरौ, जैशै आमुए तुऔं शिखाए राए। तुऐं आगै दै ही ऐशैखै जियौंए, औरौ आमु तुऔं ऐशै कौरदै रौणौ कारिए हौजौ बै मौदद कौरदै।

² जिथुकै तुऐं जाणौए, कै प्रभु यीशुए आमु जू औधिकार दैय राए, तिथकै दवारा आमुए तुऔं खै आदैश दैय राए।

³ पौरमेशवर कै इछा ऐजी औसौ, कै तुऐं पवित्र बौणौ औरौ गौलत सौमबंध शै बौचेयौ रौंव।

⁴ औरौ तुऔं मुंजीदै हरेक कै पवित्रता औरौ आदर कै साथै आपणै शोरीर पांदी काबू राखणा शिखणा चैंई।

⁵ औरौ तुऔं ऐजा काम अभिलाषा शै नी कौरणा चैंई, औरौ ना बैगानै यहूदी लोगौ कै जैशणा, जू पौरमेशवर खै ना जाणौ।

⁶ ऐशैखै कौरेयौ कुणिए आपणै बिशवाशी भाई कै खिलाफ पाप नी कौरेया, औरौ ना तैसी पांदी दाव चौलाया, जिथुकै प्रभु यीशु तिनुकै सौजा दैंदा जू ऐशणै सौबै काम कौरौ। जैशैखै आमुए आगै तुऔं खै बौलेयौ चिताए बै राए थिए।

⁷ जिथुकै पौरमेशवरे आमुखै अशुध्द जीवन जिणौ कारिए नी, पौरौ पवित्र जीवन जिणौ कारिए बौएदै राए।

⁸ इथकारिए जू इनु नियमौ खै ना मानौ, सै आदमी कै नी, पौरौ पौरमेशवर कै नियमौ खै ना मानौ, जैणै आपणा पवित्र आत्मा तुऔं खै दैय राए।

प्यार औरौ काम

⁹ पौरौ साथी बिशवाशियौं कै प्रति प्यार कै बारै मुंजी ऐजौ जौरुरी ना आथी, कै हांव तुऔं कारिए किछै लिखु; जिथुकै आपी मुंजी प्यार राखणा तुऐं आपी ही पौरमेशवर शै शैखै राखा;

¹⁰ औरौ तुऐं आगै दैई आपणै साथी बिशवाशियौं कै प्रति आपणा प्यार दिखाए राए जू मकिदुनिया प्रदेश दै रौंव। पौरौ ओए रै बिशवाशी भाईयों, आमै तुऔं शै बिन्ती कौरु, कै हौजौ बै बौढ़दै जाव,

¹¹ औरौ जैशै आमै तुऔं खै सौमझाए राए, कै तुऔं शान्तै कै साथै जीवन जिणा चैंई औरौ ओकी कै मामलै दै दखल ना दैव, औरौ आपणै-आपणै हाथौ लैई कमाणौ कै कौचिश कौरौ।

¹² ताकि सैजै लोग जू अबिशवाशी औसौ दैखौ कै तुऐं रौज कैशणा बर्ताव कौरौ, औरौ सै तोंवारा आदर कौरौ औरौ तुऐं आपणी जौरुरतौ कारिए कोसी कै भोरोशे दै ना रौलै।

यीशु मसीह कौ औटेयौ जियुंदी हौणौ

¹³ ओए रै बिशवाशी भाईयों, आमै चोऊं कै तुऐं ऐजौ जाणै पाव कै तिनु बिशवाशियौं कारिए ऐजौ कैशै हौंदौ जू आगै ही मौरे गौवै। ऐशै नी हौंव, कै तुऐं ओकी कै जैशणा शोक मौनांव जिथुकै तिनु आशा ना आथी कै मौरणौ कै बाद सै औटेयौ जियुंदी हौए जांदै।

¹⁴ जै आमै बिशवाश कौरु, कै यीशु मौरा, औरौ जियुंदी बै हौए गौआ, तौ तैशैखैई पौरमेशवर तिनुखै जू यीशु दै मौरे गौवै, औटेयौ जियुंदी कौरदा, औरौ यीशु मसीह कै साथै स्वर्ग दै पाछु निंदा।

¹⁵ आमै प्रभु यीशु कै वचन कै हिसाब शै तुऔं खै ऐजौ बुलू, कै आमु मुंजीदै जू प्रभु यीशु कै औटेयौ पाछु आणौ तौड़ी जियुंदी रौंदै, औरौ सैजै बिशवाशी जू आगै मौरे गौवै, सै जियुंदी हौंदै औरौ तोबै आमै सौब प्रभु यीशु शै भैटिंदै।

¹⁶ जिथुकै प्रभु यीशु आपी ही स्वर्ग पौरैशा उतरदा; सै जोराल़े धाव कै साथै आदैश दैंदा, औरौ ऐक प्रधान स्‍वर्गदूत ऊंची धाव शै बौलदा औरौ पौरमेशवर कै तुरही बौजांदा, तोबै सौबीदै आगै सै, जू मसीह पांदी बिशवाश कौरदै बैई मौरे गौवै, औगौड़ियौ जियुंदी हौंदै।

¹⁷ तिथकै बाद आमै जू जियुंदी औरौ बौचेयौंदे रौंदै तिनकै साथै बादल़ौ पांदी उठाए जांदै, कै गौयण दै प्रभु यीशु आरी भैटिंयु, औरौ तैसी सौमय शै आमै सौदा प्रभु कै साथै रौंदै।

¹⁸ इथकारिए इनु बातौ शै ऐकी दूजै खै तसल्ली दैया कौरौ।