1 थिस्सलुनीकियों 3 - सिरमौरी नौवाँ नियमबिशवाश कारिए फिकर 1 आखरी दै जोबै आमै तुऔं दैखै बिना रौए ना सौकी, तौ मोऐं पौलुसे औरौ सीलासे ऐजौ ठैहरोऊं कै एथेंस शहर दै इकली रौए जोऊं। 2 औरौ आमुए तीमुथियुस खै तोंवारै धोरे भैजा जू मसीह कै सुसमाचार दा अमारा भाई औसौ, औरौ पौरमेशवर का सेवक औसौ, तैसी तोंवारै धोरे भैजा कै सै तुऔं मोजबूत राखौ; औरौ तोंवारै बिशवाश दै मोजबूत हौणौ कारिए तोंवारै मौदद कौरौ। 3 कै कुणिए इनु कौल़ेशौ कै बौजैह शै डगमगाऐ ना जांव; जिथुकै तुऐं आपी ही जाणौ थिए कै आमु कोष्ट सैहन कौरणै पौड़दै। 4 जिथुकै आगै बै, जोबै आमै तोंवारै इथै थिए, तौ तुऔं खै बौलेया कौरु थिए, कै आमु पांदी सताव आन्दै, औरौ ऐशैखैई हौ, औरौ तुऐं जाणौ बै औसौ। 5 ऐसी बौजैह शै जोबै मैरै शै हौजौ ना रोई, तौ तोंवारै बिशवाश का हाल जाणणौ कारिए मोऐं तीमुथियुस कै भैजा, कै मुखै डौर थिया कै कौथी परीक्षा कौरणौवाल़ै शैतानै तोंवारै परीक्षा कौरो, औरौ अमारै मैहनत बैकार हौए जांव। तीमुथियुस दवारा हौंसला बौड़ाणा 6 पौरौ इबी तीमुथियुसे जू तोंवारै धोरे पौरैशा अमारै इथै आयौ, तोंवारै बिशवाश औरौ प्यार का सुसमाचार शुणौऊवा। इयौं बातौ खै बै शुणाए, कै तुऐं सौदा प्यार कै साथै आमुखै याद कौरौ, औरौ आमुखै दैखणौ कै लालसा बै राखौए, जैशैखै आमै बै तुऔं दैखणौ कै राखुए। 7 इथकारिए ओए रै बिशवाशी भाईयों, आमुए आपणै सौबै दुख औरौ कौल़ेशौ मुंजी तोंवारै बारै मुंजी (तीमुथियुस शै) शोणेयो बैजाए खुश हुवे कै तुऐं ऐबै बै मसीह यीशु पांदी बिशवाश कौरे लौआ। 8 जिथुकै ऐबै ऐजौ जाणणौ कि तुऐं प्रभु दा मोजबूती शै बिशवाश कौरे लौआ, तौ ऐजौ आमु कारिए नौवें जीवन कै जैशणौ औसौ। 9 औरौ जैशणै खुशी आमु तोंवारै बौजैह शै आपणै पौरमेशवर कै सामणै औसौ, तिथकै बौदलै आमु तोंवारै बारै मुंजी दिल शै पौरमेशवर का धन्यवाद कौरु। 10 आमै लगातार बैजाए प्रार्थना कौरेया कौरु, कै तुऔं औटेयौ दैखै सौकु, औरौ जू जौरुरी औसौ सैजौ आमै तुऔं शिखोऊं ताकि पूरै तरह शै प्रभु यीशु मसीह पांदी बिशवाश कौरे सौकौ। कलीसिया कारिए प्रार्थना 11 आमै प्रार्थना कौरु कै अमारै पौरमेशवर पिता औरौ अमारै प्रभु यीशु मसीह तुऔं शै भैटिणौ कारिए बाट तैयार कौरौ। 12 आमै ऐजै प्रार्थना कौरु कै प्रभु ऐशै कौरौ कै, जैशैखै आमै तुऔंआरी प्यार कौरु, तैशैखैई तुऐं बै ऐकी दुजैआरी प्यार कौरौ, औरौ सौबी लोगौ कै साथै तोंवारा प्यार हौजौ बै बौढ़ौ, औरौ हमैशा बौढ़दा जांव। 13 आमै प्रार्थना कौरु कै अमारा प्रभु यीशु मसीह तोंवारै मन खै ऐशै मोजबूत कौरौ, कै जोबै अमारा प्रभु यीशु मसीह आपणै सौबै पवित्र लोगौ कै साथै औटेयौ पाछु आला, तौ सै अमारै पौरमेशवर पिता कै सामणै पवित्रता दै निर्दोष ठौहरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation