1 थिस्सलुनीकियों 2 - सिरमौरी नौवाँ नियमपौलुस का बर्ताव 1 ओए रै बिशवाशी भाईयों, तुऐं आपी ही जाणौए कै अमारौ तोंवारै धोरे आणौ फायदैमंद औसौ। 2 तुऐं आपी बै जाणौए कै, तोंवारै धोरे आणौ शै आगै आमुए फिलिप्पी शहर दै जादा दुख सैहन कौरे राए, तोबै बै पौरमेशवरे आमुखै ऐशणै हिम्मत दैय राखै, कै आमै तोंवारै शहर कै लोगौ कै दवारा अमारा बैजाए विरोध हौणौ कै बावजूद बै तुऔं खै पौरमेशवर का सुसमाचार शुणौऊवा। 3 जिथुकै आमुए तुऔं झूठा सौंदेश ना शुणैई औरौ ना ही सै गौलत इरादै शै, औरौ ना छल कै साथै थिया। 4 पौरमेशवरे आमुखै काबिल सौमझेयौ सुसमाचार सौंपै राए। इथकारिए आमु आदमियों कै नी, पौरौ अमारै दिल खै पौरखणौ वाल़ै पौरमेशवर खै खुश कौरणौ कारिए उपदैश दियु। 5 तुऐं जाणौए कै आमै ना तौ कौलोंई चापलूसी की बातौ कौरेया कौरु थिए, औरौ आमुए ऐशणै मकसद लैई काम ना कौरी जू लालची औसौ, पौरमेशवर गवाही दैंव कै आमु ऐशणै ना थी। 6 जौबेकै आमै मसीह कै चोणेयौंदे चैलै हौणौ कै बौजैह शै तुऔं कैईंदै मौदद पाणौ कै हकदार थिए। तोबै बै आमै आदमियों कैईंदा आदर ना चांव थिए, औरौ ना तुऔं कैईंदु, ना ओकी कैईंदु। 7 पौरौ जैशैखै माँ आपणै नानड़िया का पालन पोषण कौरौ, तैशैखैई आमै बै तोंवारै बीच दै रौयौ कोमलता दिखाए। 8 आमै तुऔंआरी ऐतरा प्यार कौरु कै सिरफ पौरमेशवर का सुसमाचार शुणाणौ कारिए ही नी पौरौ तोंवारै खातिर आपणा प्राण बै दैणौ कारिए तैयार थिए। इथकारिए कै आमै तुऔंआरी बैजाए प्यार कौरु थिए। 9 ओए रै बिशवाशी भाईयों, तुऐं अमारै मैहनत औरौ कोष्ट खै याद राखौए, कै आमुए इथकारिए रात दूस काम धन्धा कौरदै बैई तुऔं मुंजी पौरमेशवर का सुसमाचार प्रचार कौरा, ताकि तुऔं अमारै जौरुरतौ का ख्याल नी राखणा पौड़ौ। 10 तुऐं आपी ही गवाह औसौ, औरौ पौरमेशवर बै गवाह औसौ कै तुऔं सौबी बिशवाशियौं कै साथै अमारा बर्ताव कैतरा साचा, धरमी औरौ निर्दोष थिया। 11 जैशै तुऐं जाणौए, कै जैशैखै पिता आपणै नानड़िया आरी बर्ताव कौरौ, तैशैखैई आमै बै तुऔं मुंजीदै हरेक खै उपदैश दियु, औरौ तसल्ली दियु, औरौ सौमझौऊं थिए। 12 ऐशणा जीवन जियौ जू पौरमेशवर खै खुश कौरौ, जू तुऔं खै आपणै राज्य औरौ महिमा दै शामिल हौणौ कारिए बोईदौए। थिस्सलुनीकी शहर कै लोगौ कौ बौदलै जाणौ 13 आमै बै पौरमेशवर का धन्यवाद सौदा कौरु; कै जोबै अमारै दवारा पौरमेशवर कै सुसमाचार का सैजा सौंदेश शुणा जू आमुए तोंवारै बीच दा प्रचार कौरा, तौ तुऐं तैसी आदमियों का नी, पौरौ पौरमेशवर का सौंदेश सौमझेयौ स्वीकार कौरा औरौ ऐबै पौरमेशवर का ऐजा सौंदेश तुऔं दा काम कौरौ जू मसीह पांदी बिशवाश कौरौ। 14 इथकारिए, ओए रै बिशवाशी भाईयों, तुऐं तैशैखैई सताव झैला जैशै पौरमेशवर कै कलीसियाएं झैला जू यहूदिया प्रदेश दी मसीह यीशु दी औसौ जिथुकै तुऐं बै आपणै लोगौ शै तैशणाई दुख पौऊवा, जैशै तिनुऐ यहूदियों कैईंदा पाए राए थिया। 15 तिनु यहूदी लोगै प्रभु यीशु खै औरौ पौरमेशवर कै बातौ बौताणौवाल़ै कै बै मारै दियै औरौ आमु सोताए, औरौ पौरमेशवर तिनुदा खुश ना आथी; औरौ सै सौबी आदमियों का विरोध कौरौ। 16 औरौ ऐशै कौरेयौ तिनिए आमु बैगानै यहूदी लोगौ खै ऐजौ बौताणौ शै रौकणौ कै कौचिश कौरे लोए थै, कै पौरमेशवर तिनु कैशै बौचाए सौकदा। कलीसिया शै भैटिणौ की इछा 17 ओए रै बिशवाशी भाईयों, जोबै आमै दैणिक देर कारिए मन दै नी पौरौ शारीरिक रुप शै तुऔं दै जौई हौए गौवै थिए, तौ आमुए बौड़ी लालसा कै साथै तुऔं दैखणौ कारिए हौजौ बै जादा कौचिश कोरी। 18 इथकारिए आमै (यानी मोऐं पौलुसे) एकबेई नी, पौरौ बार-बार तोंवारै धोरे आणौ चोऊं, पौरौ शैतानै आमुखै तोंवारै धोरे आणौ शै रौकै राए। 19 अमारै आशा, या खोशे या बौड़ाए का मुकुट कुण औसौ? ऐजै तुऐंई हौंदै जोबै अमारा प्रभु यीशु मसीह औटेयौ पाछु आन्दा। 20 अमारै बौड़ाए औरौ खोशे तुऐंई औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation