1 थिस्सलुनीकियों 1 - सिरमौरी नौवाँ नियम

जाणकारी

¹ ऐजी चिट्ठी पौलुस, सीलास औरौ तीमुथियुस खै ढौबौशी औसौ। ऐजी थिस्‍सलुनीका शहर कै कलीसिया कै आमुए लैखै लोए, जू पिता पौरमेशवर औरौ प्रभु यीशु मसीह कै बारै मुंजी औसौ। हांव प्रार्थना कौरु कै पौरमेशवर तुऔं पांदी अनुग्रह कौरौ औरौ तुऔं शान्तै दैंव।

थिस्सलुनीका शहर कै लोगौ का जीवन औरौ बिशवाश

² आमै आपणी प्रार्थनाओं दै तुऔं याद कौरु औरौ सौदा तुऔं सौबी कै बारै मुंजी पौरमेशवर का धन्यवाद कौरु,

³ औरौ जोबै आमु पिता पौरमेशवर शै प्रार्थना कौरु, तौ सैजै काम जू तुऐं बिशवाश कै बौजैह शै कौरौ, औरौ बिशवाशियौं कै मौदद कौरणौ कारिए जू कड़ी मैहनत कौरौ जिथुकै तुऐं तिनुआरी प्यार कौरौ, औरौ तुऐं सैहन कौरौ जिथुकै तुऐं प्रभु यीशु मसीह कै पाछु आणौ कै उमीद कौरे लोए।

⁴ ओए रै बिशवाशी भाईयों, पौरमेशवर कै प्यारे लोगौ आमु जाणुए, कै पौरमेशवरे तुऔं आपणै लोग हौणौ कारिए चोणे राए।

⁵ जिथुकै अमारा यीशु मसीह कै बारै मुंजी सुसमाचार तुऔं कैई बौताणा सिरफ बातौ मुंजी ही ना आथी, पौरौ पवित्र आत्मा कै अनौखी शौकतै लैई, पूरै आशवासन कै साथै ऐजा सुसमाचार साचा औसौ। जैशैखै तुऐं जाणौए कै तोंवारै कल्याण कारिए तोंवारै बीच दा अमारा चाल चलन कैशणा थिया।

⁶ तुऔं पांदी भारी कौल़ेश थिया, पौरौ तुऐं पवित्र आत्मा लैई खुशी कै साथै सुसमाचार का स्वागत कौरा। तुऐं अमारै उदारण औरौ प्रभु कै उदारण का पालन कौरा।

⁷ जिथका नतीजा ऐजा हौआ कै मकिदुनिया औरौ अखाया प्रदेश कै सौबै बिशवाशी लोगौ कारिए तुऐं नमूना बौणै गौवै।

⁸ जिथुकै तोंवारै इथै दै ना सिरफ मकिदुनिया औरौ अखाया प्रदेश मुंजी प्रभु का वचन शुणौऊवा, पौरौ तोंवारै बिशवाश जू पौरमेशवर पांदी औसौ, हर जौगैह जिथै आमु जोऊंए, लोगौ कै तोंवारै बिशवाश कै बारै मुंजी बौतांदै बैई शुणुए। इथकारिए, आमु ओकी खै तोंवारै बारै मुंजी किछै बै बौताणौ कै जौरुरत ना आथी।

⁹ जिथुकै सैजै लोग ओकी कै बौतांव कै जोबै आमु तोंवारै धोरे ओऊं तौ तुऐं कैशैकै अमारा स्वागत कौरौ। औरौ तुऐं किथु मूर्ति शै दूर हौयौ पौरमेशवर कै ढौबौ फिरो ताकि जियुंदै औरौ साची पौरमेशवर कै सेवा कौरौ।

¹⁰ औरौ सै बौल़ौए कै तुऐं कैशै पौरमेशवर कै बैटै कै औटेयौ पाछु आणौ कै ठोल़नाए कौरे लोए, जैसीखै पौरमेशवरे मौरेयौंदे मुंजीदा जियुंदी कौरा, यानी यीशु कै जू आमु कै पौरमेशवर कै आणौवाल़ै क्रोध शै बौचांव।