1 पतरस 5 - सिरमौरी नौवाँ नियम

बुध्दिमान बुड़ेईको औरौ नोजौवानो कै सौंदेश

¹ किछै ऐशणी बातौ जू हांव तिथै कै अगुवे शै बौलणा चोऊं जिथुकै हांव बै तोंवारै जैशणा ऐक अगुवा औसौ। मोऐं आपी तिनु दुखो कै दैख राए जू बैजाए सौमय आगै मसीहे सैय राए। जोबै सै औटेयौ पाछु आन्दा, तौ हांव बै तैसकै महिमा दा शामिल हौंदा। ऐबै हांव तुऔं कैईंदै बिन्ती कौरु:

² जैशैखै चौराईया आपणै भैड़ौ कै रोखवाल़ी कौरौ, तैशैखैई तुऔं सौबी कै रोखवाल़ी कौरणै चैंई जिनु पौरमेशवरे तोंवारै दैखभाल दै सौंपै राए। ऐजौ आपणी मर्जी शै कौरौ, जिथुकै पौरमेशवर ऐजौई चांव कै तुऐं ऐशै कौरौ। ऐशै सिरफ इथकारिए नी कौरौ जिथुकै तुऔं ऐशै कौरणौ कारिए मजबूर कौरे राए। ऐजा काम इथकारिए ना कौरौ जिथुकै तुऐं पौयसै कमाणै चांव पौरौ पौरमेशवर औरौ लोगौ कै सेवा कौरणौ कै इछा कै साथै कौरौ।

³ औरौ तिनु लोगौ पांदी ऐक शासक जैशणै ना बौणौ जिनु कारिए तुऐं जुमैवार औसौ, पौरौ तिनु कारिए ऐक आछा उदारण बौणौ।

⁴ जोबै यीशु मसीह, जू कै अमारा प्रधान चौराईया औसौ, औटेयौ पाछु आन्दा, तोबै तुऔं ऐक सुन्दर मुकुट दैंदा जू कौलोंई बै आपणी चौमक ना खौंदा।

पौरमेशवर खै आपणा जीवन दैणा औरौ शैतान का विरोध कौरणा

⁵ ऐशैखैई तुऔं जोवान लोगौ कै, अगुवो कै बात मानणै चैंई। तुऔं सौबी खै नम्रता कै साथै ऐकी दूजै कै सेवा कौरणै चैंई। जिथुकै पवित्र शास्त्र दौ लैखै राए कै, “पौरमेशवर घमण्डी लोगौ का विरोध कौरौ, पौरौ नम्र पांदी अनुग्रह कौरौ।”

⁶ इथकारिए, आपी खै पौरमेशवर कै खातिर नम्र कौरौ जू सौबिदा शौकतीशाली औसौ ताकि सै तैसी दूसै तुऔं ऐक आछै ठाँव पांदी लोए जाला जू तैणै चोणे राए।

⁷ पौरमेशवर खै आपणी सारै पौरैशानै औरौ चिन्‍ता बौतांव जिथुकै सै तोंवारै परवाह कौरौ।

⁸ चौकश रौव, औरौ जागदै रौव, जिथुकै शैतान, तोंवारा दुशमन तुऔं पांदी वार कौरणा चांव ताकि तुऐं पौरमेशवर कै आज्ञा ना मानौ। सै हुंगरौणौवाल़ै शेरो कै जैशणा औसौ, जू आगै-पाछैदा दैखौए कै सै कोसी कै खाए सौकौ।

⁹ तुऔं आपणै मोजबूत बिशवाश कै साथै तैसका विरोध कौरणा चैंई। याद राखौ कै तोंवारै मसीह भाईटु जू पूरै दुनिया दै रौए रौवै, ऐशैखैई दुखो खै सौयन कौरे लौवै जैशै तुऐं सौय लौवै।

¹⁰ पौरमेशवर जू पूरी तरह शै अनुग्रह लैई भौरेयौंदा औसौ, तैणै आमु मसीह कै साथै अमारै रिशतै कै बौजैह शै स्वर्ग दै तैसकै सौदा कै महिमा दै शामिल हौणौ कारिए बौएदै राए। औरौ तोंवारै दैणिक सौमय तौड़ी दुख सैहणौ कै बाद, पौरमेशवर तुऔं आछा बाणै दैंदा ताकि तुऔं मुंजी हौजौ कुणजाई दोष नी रौंव औरौ सै तोंवारै दिलो खै मोजबूत कौरदा औरौ तैसी पांदी तोंवारै भोरोशे खै सौथीखै मोजबूत बाणै दैंदा।

¹¹ सै हमैशा कारिए शौकतीशाली रुप दा शासन कौरदा। आमीन।

आखरी स्वागत

¹² मोऐं ऐजै ठिकड़ी चिट्ठी सीलास कै मौदद लैई लिखै औरौ तुऔं भैजै राए। हांव तैसी मसीह दा ऐक ईमानदार बिशवाशी भाई मानु। मैरा चिट्ठी कै लिखणौ का मकसद तुऔं हिम्मत दैणा औरौ तुऔं बैचींत कौरणा औसौ कै जू बै तुऐं महसूस कौरे लौ सै सौथीखै तोंवारै ढौबौ पौरमेशवर कै अनुग्रह का हिस्सा औसौ। ऐसी अनुग्रह दै मजबूत रौंव।

¹³ बाबेल शहर जू रोम देश दु औसौ तिथै कै बिशवाशी तोंवारा स्वागत कौरौ, जिनु पौरमेशवरे चोणे राए जैशै तैणै तुऔं चोणे राए। मरकुस, जू मैरा ऐक बैटै जैशणा औसौ, सै बै तोंवारा स्वागत कौरौ।

¹⁴ ऐकी दुजैआरी साची प्यार शै स्वागत कौरौ। हांव प्रार्थना कौरु कै पौरमेशवर तैसी हर आदमी कै शान्तै दैंव जू मसीह का औसौ।