1 पतरस 4 - सिरमौरी नौवाँ नियम

जीवन दा बौदलाव

¹ इथकारिए, जोबै कै मसीहे आपणै शोरीरो दा हौयौ दुख सौऊआ, इथकारिए तुऔं बै तियौं सोंच कै साथै दुख सैहणौ कारिए तैयार रौणौ चैंई जू तैसदै थी। जिथुकै जै तुऐं मसीह कारिए दुख सैहणौ कारिए तैयार हौंव, तौ तुऐं पाप ना कौरणौ का फोयसला कौरे पाए,

² ऐलौ दै ऊबै, औटेयौ, तुऐं आपणै बाकी दुनिया कै जिन्दगी कै आपणी शोरीरो की बुरी इछावं कै पूरा कौरणौ कारिए नी; पौरौ पौरमेशवर कै इछा पूरै कौरणौ कारिए जियौ।

³ बीतै सौमय दा तुऐं दुनिया कै लोगौ कै जैशणा बुराई कौरणा दा बैजाए सौमय बोरबाद कौरे दिया औरौ तोंवारा जीवन गौलत सौमबंध, गौंदै काम, दावतो औरौ शराबीपन दा बीता औरौ पौरमेशवर मूर्तियों कै पूजा शै नफरत कौरौ औरौ तुऐं सैजौई कौरौ।

⁴ इथलैई तोंवारै पुराणै दोस्त हैरान हौए जांव जोबै तुऐं तिनकै साथै तिनु बुरी चीज़ौ दै शामिल ना हौंव जू सै कौरौए। इथकारिए सै तोंवारै बैज्जती कौरौ।

⁵ पौरौ ऐक दूसै सै निशोंक हौयौ पौरमेशवर कै सामणै न्याय कारिए खौड़ै हौंदै, औरौ पौरमेशवर तिनुमुंजी दौ सौबीआदो तिनकै दवारा धोरती पांदी कौरेयौंदे कामौ कै बारै मुंजी पूछदा। पौरमेशवर जियुंदी औरौ मौरेयौंदे लोगौ का न्याय कौरदा।

⁶ ऐजी बौजैह औसौ कै मौरेयौंदे लोगै बै मसीह कै बारै मुंजी सुसमाचार शुणा। तिनकै शोरीरो कै सौबी लोगौ कै जैशणौ मौरणौ पौड़ौ, पौरौ ऐबै सै आत्मा दै हमैशा पौरमेशवर कै साथै रौंदै।

पौरमेशवर कै महिमा कारिए सेवा

⁷ सौबी बातौ का अन्त तावल़ा हौणौवाल़ा औसौ; इथकारिए आछै शै सुंचौ औरौ आपी खै काबू दै राखैयौ प्रार्थना कौरणौ कारिए चौकश रौंव।

⁸ सौबदै खास बात ऐजै औसौ, कै ऐकी दुजैआरी जादा शै जादा प्यार कौरौ जिथुकै जै तुऐं लोगौआरी प्यार कौरलै तौ तुऐं हमैशा कोसी बै गौलत काम खै माफ कौरणौ कारिए तैयार रौंदै जू तिनुऐ कौरे राए।

⁹ लोगौ कै आपणै घोरे इज्जत कौरौ औरौ ऐशै बिना शिकायत कै कौरौ।

¹⁰ हरेक आदमी खै पौरमेशवर कै ढौबौशा वरदान भैटी रौआ, औरौ तिनु तैसी वरदान का इस्तैमाल ओकी कै मौदद कौरणौ कारिए कौरणा चैंई। तिनु पौरमेशवर कै आछै सेवको कै रुप दै हौयौ आपणै वरदानो का इस्तैमाल आछै शै कौरणा चैंई।

¹¹ जै तुंवागै प्रचार कौरणौ का वरदान औसौ, तौ तुऔं पौरमेशवर कै सौंदेश का प्रचार कौरणा चैंई। जै तुंवागै ओकी लोगौ कै मौदद कौरणौ का वरदान औसौ, तौ ऐजौ तियौं शौकतै कै साथै कौरौ जू पौरमेशवर दैंव। तौ तोबै जू किछै बै तुऐं कौरलै सैजौ यीशु मसीह कै दवारा पौरमेश्‍वर कै महिमा दियांव। सारै महिमा औरौ शौकतै हमैशा-हमैशा कारिए तैसकै औसौ। आमीन।

पौरमेशवर कै महिमा कारिए दुख सैहणा

¹² ओए रै मैरै बिशवाशी भाईयों, तिनु दुख दैणौ वाल़ी चीज़ौ कै बारै मुंजी हैरान ना हौंव जिथकै बौजैह शै तुऐं दुख सैय लौवै जिथुकै तुऐं मसीह कै औसौ। पौरौ ऐजी चीज़ौ ऐजौ दिखाणौ कारिए हौंदी लागै रैई कै का तुऐं सौथीखै पौरमेशवर पांदी बिशवाश कौरौ। इथकारिए, ऐजौ ना सुंचौ कै तोंवारै साथै किछै अनौखौ हौंदौ लागै रो।

¹³ बस इथकै बारै मुंजी खुशी रौव, जिथुकै तुऔं तिनु दुखो दा ऐक हिस्सा भैटी रौआ जू मसीह खै भैटी रौवै थिए। इयौं बौजैह शै, जोबै मसीह सौब लोगौ खै आपणै महिमा प्रगट कौरणौ कारिए औटेयौ पाछु आन्दा तौ तोंवारा आनन्द सौथीखै बौड़ा हौंदा।

¹⁴ पौरौ जै मसीह कै नांव कारिए तोंवारै नेंदैया हौंव, तौ तुऐं धन्‍य औसौ; जिथुकै पौरमेशवर कै महिमा कै आत्मा तोंवारै भीतरै रौंव।

¹⁵ तुऔं मुंजीदै कुणिए आदमी खूनी या चोर, या कुकर्मी हौणौ पांदी, या पराए काम दै हाथ पाणौ कै बौजैह शै दुख ना पांव।

¹⁶ पौरौ जै कोसी खै मसीही हौणौ कै नातै दुख सैहन कौरणा पौड़ौ, तौ तुऐं इयौं शर्म कै बात नी सौमझैया, पौरौ पौरमेशवर कै महिमा कौरौ कै तुऐं इथकारिए दुख सैहन कौरे लौआ जिथुकै तुऐं मसीह कै लोग औसौ।

¹⁷ जिथुकै न्याय कौरणौ का सौमय आए गौआ, कै आगै पौरमेशवर कै लोगौ का न्याय हौंदा, औरौ जोबै कै सै आगै आमु बिशवाशियौं का न्याय कौरदा, इथकारिए तिनु खतरनाक चीज़ौ कै बारै मुंजी सुंचौ जू तिनु लोगौ कै साथै हौंदी जू पौरमेशवर कै सुसमाचार खै ना मानौ।

¹⁸ जैशैखै पवित्र शास्त्र बौल़ौ, “जै ऐक आछै आदमी कौ बौचाए जाणौ ऐतरो मुशकिल औसौ, तौ दुष्ट आदमी औरौ पापी निशोंक हौयौ नाश हौए जांदै।”

¹⁹ इथकारिए, जू लोग तैशैखैई दुख सैहलै जैशै पौरमेशवर कै इछा हौंव, तिनु आपणी आत्मा पौरमेशवर कै दैणौ कारिए तैसी पांदी भोरोशा राखणा चैंई, जैणै तिनुखै बाणै राए। पौरमेशवर हमैशा सैजौ कौरौ जिथु कौरणौ का वादा तैणै कौरे राए थिया औरौ इथकारिए तुऐं सैजौ कौरणौ जारी राखौ जू आछौ औसौ।