1 पतरस 3 - सिरमौरी नौवाँ नियमघोरवाल़ै औरौ घोरवाल़ी 1 ओए रै घोरवाल़ियो, आपणै घोरवाल़ै कै ऐशै अधीन रौव जैशै तुऐं प्रभु कै अधीन रौंव। इथकारिए कै जै इनु मुंजीदै कुणिए ऐशणै हौलै जू वचन खै ना मानौ, 2 तौ बै सै तोंवारै डौर सहित पवित्र चाल-चलन खै दैखैयो यीशु मसीह पांदी बिशवाश कौरदै। तुऔं किछै बौलणौ कै जौरुरत ही ना पौड़दै। 3 तोंवारै सुन्दरता सिरफ बायरी दिखावा नी हौंव, जैशैकै बाल बांनणै, सूनै कै गौणै लैई सौज़णौ या मौंगै लुस्कै बामणै, 4 पौरौ तुऔं भीतरो शै आणौवाल़ै नम्र औरौ शान्त बर्ताव कै सुन्दरता लैई आपी कै सुन्दर बौणणौ चैंई। ऐजी सुन्दरता कौलोंई ना मिटौ, औरौ पौरमेशवर कै नज़र दै बैजाए कीमती औसौ। 5 पुराणै सौमय कै बैटमाणिशौ जू पौरमेशवर पांदी आशा राखौ थी, सै आपणै घोरवाल़ै कै आज्ञा मानैयौ आपी खै ऐशैखैई सुन्दर बाणौ थी। 6 जैशै सारा अब्राहम कै आज्ञा मानौ थै औरौ तैसी आपणा मालिक बौल़ौ थी। ऐबै तुऐं सारा कै जैशणी हौए सौकौ, जै तुऐं ओकी कै साथै भोलाए कौरौ औरौ तुऔं दा कैशणाई बै चिन्ता का डौर नी हौं। आपणी घोरवाल़ी कारिए मसीह घोरवाल़ै का फर्ज औरौ इज्जत 7 ऐशैखैई ओए रै घोरवाल़ै, तुऐं आपणी घोरवाल़ी कै साथै मैल-मिलाप शै रौंव, औरौ तिनकै मौदद कौरणौ कै बारै मुंजी सोंचैया कौरौ औरौ तुऔं ऐजौ याद राखणौ चैंई कै सै कमजोर औसौ, इथकारिए तुऔं तिनकै इज्जत कौरणै चैंई। जिथुकै तुऐं दुईनै ही तैसी वरदान खै साझा कौरौ जू पौरमेशवरे अनुग्रह शै तुऔं दैय राए, यानी सौदा कै जिन्दगी का वरदान। जै तुऐं ऐशै कौरलै, तौ पौरमेशवर तोंवारै प्रार्थनांव कै शुणदाए। आशीष कै हकदार हौणौ कै बुलाहट 8 आखरी दौ हांव तुऔं सौबी खै बुलू, कै तुऔं सौबी का ऐक मन हौणा चैंई औरौ ऐकी दूजै कै फिकर कौरौ औरौ ऐकी दुजैआरी भाई-बौईणी कै जैशणा प्यार कौरौ औरौ ओकी पांदी दया कौरौ औरौ ऐकी दूजै कै साथै नम्र बौणौ। 9 बुराई कै बौदलै बुराए ना कौरौ औरौ ना गाल़ी खै बौदलै गाल़ी दैव; पौरौ इथकै बौदलै आशीष ही दैंव: पौरमेशवरे तुऔं बौएदै राए ताकि तुऐं ओकी खै आशीष दैय सौकौ। जै तुऐं ऐशै कौरलै तौ पौरमेशवर बै तुऔं आशीष दैंदा। 10 जैशैकै पवित्र शास्त्र बौल़ौए, “जै कुणिए आदमी आपणै जीवन कै खुशी लोणी चांव औरौ आछै दूस चांव तौ तैसी चौकश रौणौ चैंई कै सै बुरी बातौ ना बौल़ौ। औरौ तैसी ऐशणी बातौ बंद कौरे दैणी चैंई जू साची ना आथी। 11 तैसी निशोंक हौयौ सैजौ बंद कौरे दैणौ चैंई जू बुरु औसौ। इथकै बजाय, तैसी सैजौई कौरणौ चैंई जू आछौ औसौ। ओकी कै साथै शान्तै शै रौणौ कारिए कड़ी मैहनत कौरौ। 12 जिथुकै प्रभु कै नज़र तिनु लोगौ पांदी रौंव जू सैजौई कौरौ जू सोही औसौ औरौ सै हमैशा तिनकै प्रार्थनाए शुणणौ कारिए तैयार औसौ। पौरौ पौरमेशवर तिनु लोगौ कै खिलाफ काम कौरौ जू बुराए कौरौ।” भोलाए कौरणौ कै बौजैह शै सताव 13 जै तुऐं हमैशा भले काम कौरणौ कै कौचिश कौरौ, तौ कुणिए बै सौथीखै तुऔं चोट ना दैय सौकौ। 14 पौरौ जै तुऐं सोही औसौ औरौ ऐजौ कौरणौ कै बौजैह शै तुऐं दुख सैहलै तौ पौरमेशवर तुऔं आशीष दैंदा। तैशैखै कौरौ जैशै याशायाहै लैखै राए थियु: “तिनु लोगौ दै नी डौरेया, जू तुऔं डौरांव औरौ इयौं बातौ कै फिकर नी कौरेया कै लोग का कौरे सौकौ।” 15-16 पौरौ आपणै मनो दा मसीह कारिए डौर राखौ, औरौ प्रभु कै रुप दै तैसी इज्जत दैव औरौ जै कुणिए तियौं आशा कै बारै मुंजी पूछौ जू बिशवाशी हौणौ कै नातै आमै सौबै साझा कौरु, तौ हमैशा तैसी सौमझाणौ कारिए तैयार रौव। पौरौ नम्र औरौ आदर कै साथै कौरौ। हमैशा सैजौई कौरौ जू सोही औसौ। तोबै बै जै लोग तोंवारै खिलाफ बुरु बौल़ौ, तौ सैजै ही शर्मिंदा हौंदै जोबै सै मसीह कै साथै तोंवारै आछै सौमबंध कै बौजैह शै तोंवारै आछै बर्ताव खै दैखलै। 17 कौलोंई-कौलोंई पौरमेशवर तुऔं पांदी पौरैशानी औरौ पीड़ो आणौ दैय सौकौ जोबै कै तुऐं आछै काम कौरे राए। पौरौ ऐजौ तियौं पौरैशानी औरौ पीड़ो शै ठीक औसौ जू इथकारिए आंव जिथुकै तुऐं बुरै काम कौरे राए। मसीह का दुख 18 हांव ऐजौ बुलू जिथुकै मसीहे बै अमारै पापौ की बौजैह शै दुख झैला औरौ मौर गौआ। सै सिरफ ऐकैई बैई मौरा औरौ इयौं बातौ कै बार-बार बौलणौ कै जौरुरत ना आथी। सै ऐक धरमी आदमी थिया जू पापी लोगौ कारिए मौरे गौआ ताकि सै आमु कै पौरमेशवर कै धोरे लाए सौकौ। तिनुऐ तैसकै शोरीर कै मार दिया पौरौ पौरमेशवरे तैसी पवित्र आत्मा कै शौकतै लैई औटेयौ जियुंदी कौरे दिया। 19 तोबै तैसकै आत्माए जायौ तिनु आत्माओं खै सुसमाचार प्रचार कौरा जू तैसी ठाँव पांदी पौरमेशवर कै दवारा कोयद कौरे रैई थी, जिथै मौरेयौंदे लोगौ की आत्माए औसौ। 20 ऐजी तिनु लोगौ की आत्माए थी जिनुवै बैजाए सौमय औगौड़ियौ पौरमेशवर कै आज्ञा ना मानी। जोबै नूहे आपणै जहाजो खै बाणै लौ थियु, तौ पौरमेशवर सब्र राखियो ठोल़नाए कौरे लौए थी कै दैखौ का सैजै लोग पाप कौरणा छोड़े दैंदै। पौरौ जोबै पाणीए दुनिया का नाश कौर दिया, तौ जहाजो दै रौणौवाल़ै सिरफ आठ लोग बौचाए गौवै थिए। 21 औरौ पुराणै सौमय दा तिनका उध्दार ऐबै अमारै उध्दार का ऐक उदारण औसौ जोबै आमै बपतिस्मा लोऊँ। तौ जिथु पाणी मुंजी आमै बपतिस्मा लोऊँ, सै अमारै शोरीर शै मौल़ दूर ना कौरौ, पौरौ ऐजा ऐक निशान औसौ कै आमै पौरमेशवर शै माफी मांगै राए ताकि आगै खै अमारा मन पौरैशान नी रौंव। आमु माफी भैटी सौकौ जिथुकै यीशु मसीह औटेयौ मौरेयौंदे मुंजीदा जियुंदी हौए रौआ। 22 औरौ सै स्वर्ग खै हौटै गौआ। ऐबै सै तिथै पौरमेशवर कै सोऐं ढौबौ सौबी दै खास ठाँव पांदी औसौ, औरौ सै सौबी स्वर्गदूतौ औरौ सौबी औधिकारी औरौ शौकतै पांदी राज कौरौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation