1 पतरस 2 - सिरमौरी नौवाँ नियम

चोणेयौंदा पाथर औरौ तैसकै चोणेयौंदे लोग

¹ इथकारिए, सौबै भान्त कै बुरै बर्ताव शै छुटकारा पाव। ओकी खै धौखा ना दैव, कपटी नी बौणैया। ओकीआरी ज़लन नी राखैया। कोसी कै बदनामी नी कौरेया।

² हांव तोंवारै तुलना नानड़ै नानड़िया आरी कौरु। ऐक नानड़ो नानड़िया हमैशा माँ कौ दूध चांव ताकि मोजबूत बौणौ। तैशैखैई तुऔं पौरमेशवर कै वचन शिखणौ कै इछा राखणै चैंई ताकि तुऐं मोजबूत बौणै सौकौ। तोबै आखिर दा, पौरमेशवर इयौं दुनिया कै बुरै चीज़ौ शै पूरी तरह शै बौचाए पांदा।

³ जिथुकै जैशैकै पवित्र शास्त्र बौल़ौ, “तुऔं कैई आछै शै पौता औसौ कै प्रभु भला औसौ।”

^4-5 प्रभु यीशु कै तुलना ऐक जियुंदी पाथर आरी कौरे राए। तैसी पाथर खै आदमीए बैगाए दिया थिया जिथुकै तिनुऐ बौल़ौ कै सै बैकार थिया। पौरौ पौरमेशवर कै नज़र दा, सै बैजाए कीमती औसौ, औरौ पौरमेशवरे तियौं नीयुं खै खास पाथर कै रुप दा चोणे राए। औरौ ओए रै साथी बिशवाशी भाईयों तुऐं बै प्रभु यीशु कै धोरे आव, ताकि तुऐं बै तैसकै दवारा तिनु जियुंदी पाथरो कै जैशणै बाणै जांव जू पौरमेशवर कै आराधना का घोर बाणणौ कारिए इस्तैमाल हौंव। तैणै तुऔं बै पवित्र यहूदी पुरोहित बाणै राए। जिथुकै जैशै यहूदी पुरोहित पौरमेशवर खै भैंट चौढ़ांव, तैशैखैई तुऐं बै भैंट कै रुप दै आपणै दिल पौरमेशवर खै चौढ़ाव। औरौ सैजी भैंट पौरमेशवर खै खुश कौरौ जिथुकै तुऐं यीशु मसीह कै औसौ।

⁶ ऐजौ तैशैखैई औसौ जैशै पौरमेशवर पवित्र शास्त्र दौ आपणै बैटै कै बारै मुंजी बौल़ौ, “दैखौ! मोऐं ऐक बैजाए कीमती पाथर चोणे राए, जैसी यरूशलेम शहर कै बाणणौ कारिए नीयुं कै पाथरो जैशणा राखै राए। औरौ जू कुणिए बै तैसी पांदी बिशवाश कौरला, सै कौलोंई बै शर्मिंदा ना हौंदा।”

⁷ ऐजा पाथर तोंवारै खातिर बैजाए कीमती औसौ तुऔं कारिए जू यीशु मसीह पांदी बिशवाश कौरौ। पौरौ जू लोग तैसी पांदी बिशवाश ना कौरौ तिनकै बारै मुंजी पवित्र शास्त्र बौल़ौ, “राजमिस्‍त्रीए जैसी पाथर कै इस्तैमाल कौरणौ शै मौना कौरे दिया, सैजा इमारत कै नीयुं दा सौबिदा खास पाथर बौणै गौआ।”

⁸ औरौ तोबै पवित्र शास्त्र ऐजौ बै बौल़ौए, “ऐजा पाथर लोगौ कै ठोकर खाणौ कै बौजैह हौंदा। ऐजी ऐक चट्टान औसौ जू तिनकै रिड़णो कै बौजैह औसौ,” सै वचन पांदी बिशवाश ना कौरणा चांव, इथकारिए सै ठोकर खायौ रिड़ै जांव। पौरमेशवरे तिनकै साथै ऐजौई हौणौ कै योजना बाणै राए।

⁹ पौरौ तुऐं ऐशणै ना आथी जिथुकै तुऐं पौरमेशवर कै चोणेयौंदे लोग औसौ, औरौ पौरमेशवर कै राजवंशी यहूदी पुरोहित औसौ, तैसकै पवित्र लोग औसौ औरौ तैसकै आपणै जायदात औसौ। तैणै तुऔं इनारै शै बायरै आपणै अनौखै पेयाशै दै बौएदै राए, ताकि तुऐं पौरमेशवर कै अनौखै कामौ कै बारै मुंजी बौताए सौकौ।

¹⁰ पौरमेशवर कै बातौ बौताणौवाल़ै होशे जू लैखै राए सैजौ तोंवारै बारै मुंजी साचौ औसौ। आगै तुऐं पौरमेशवर कै लोग ना थी, पौरौ ऐबै तुऐं पौरमेशवर कै लोग औसौ। आगै तुऐं पौरमेशवर कै दया खै ना जाणौ थिए पौरौ ऐबै तुऐं इयौं जाणौए जिथुकै तैणै शुरु शै ही तुऔं पांदी दया दिखाए राए।

पौरमेशवर कारिए जिणा

¹¹ ओए रै बिशवाशी भाईयों तुऐं आपी खै इयौं दुनिया दै प्रदेशी औरौ यात्री कै जैशणै सौमझौ। हांव तुऔं खै चैतावणी दियु कै शोरीर की सौबी बुरी इछा शै बौचौ जिथुकै सै तोंवारै आपणै आत्माओं कै खिलाफ हमैशा विरोध कौरौ।

¹² बैगानै यहूदी लोगौ मुंजी तोंवारा बर्ताव आछा हौणा चैंई। जू लोग ऐबै तुऔं पांदी ऐशणै दोष लांव कै तुऐं बुरै काम कौरौ, सैजैई लोग जैसी दूसै पौरमेशवर आला तैसी दूसै तोंवारै आछै कामौ कै दैखियौ पौरमेशवर कै महिमा कौरदै।

औधिकारियो कै दैख रैख दौ रौणौ

¹³ आमु तिनु सौबै राज कौरणौवाल़ै कै अधीन रौणौ चैंई जिनु आदमी कै दवारा चुणै जांव, जिथुकै ऐजै प्रभु कै इछा औसौ। राजा कै अधीन रौव, जू सौबी पांदी राज कौरौ।

¹⁴ राज्यपाल कै बै अधीन रौव जिथुकै सैजाई औसौ जैसका इस्तैमाल राजा तिनु लोगौ खै सौजा दैणौ कारिए कौरौ जिनकै काम बुरै औसौ औरौ तिनु लोगौ कै तारीफ कौरणौ कारिए जिनकै काम आछै औसौ।

¹⁵ पौरमेशवर चांव कै तुऐं आपणै भले कामौ कै दवारा तोंवारै खिलाफ गौलत आरोप लाणौ वाल़ै मूर्ख लोगौ का मुँह बौन्द कौरे सौकौ जू पौरमेशवर कै ना जाणौ।

¹⁶ ऐबै तुऐं पाप कै गुलाम ना आथी जिथुकै तुऐं अमारै प्रभु यीशु मसीह कै दवारा आज़ाद हौए रौवै। पौरौ तुऐं आपणी आज़ादी का इस्तैमाल बुरै काम कौरणौ कारिए भाना नी बाणौ। पौरौ पौरमेशवर कै सेवको कै जैशणा बर्ताव कौरौ।

¹⁷ सौबी का आदर कौरौ, आपणै सौबी बिशवाशी साथी आरी प्यार राखौ। पौरमेशवर दै डौरौ, राजा कै इज्जत कौरौ।

मसीह कै दुख का उदारण

¹⁸ ओए रै सेवको तुऐं जू घौरौ पुंडा काम कौरौ, जू बिशवाशी औसौ, तुऔं आपणै मालिक कै आज्ञा का पालन कौरणा चैंई औरौ हमैशा तिनकै इज्जत कौरणै चैंई। भलैई सै दयालु औरौ सोही हौंव या खडुस हौंव।

¹⁹ जै आमै बिना किछै गौलती कौरेयौ दुख सैहलै, तौ पौरमेशवर आमुदा खुश हौं। जिथुकै आमुए ऐजौ जाणैयौ कै दुख झैलू कै पौरमेशवर सौबै ठुँ जाणौए।

²⁰ पौरौ जै तुऔं गौलत कौरणौ कारिए पीटौ, तौ सौजा भैटणौ पांदी सब्र राखैयौ तोंवारै तारीफ कौरणौ कै कुणजै बौजैह ना आथी। पौरौ जै भोलाए कौरणौ कै बौजैह शै तुऔं दुख सैहणा पौड़ौ औरौ सब्र राखौ, तौ पौरमेशवर खुश हौंव।

²¹ पौरमेशवर कै दवारा तुऔं चोणे जाणौ कै बौजैह मुंजीदै ऐक बौजैह ऐजी औसौ कै तुऔं तैसी कारिए भले काम कौरदै बैई दुख सैहन कौरे पांदै। मसीह, जैणै तोंवारै खातिर दुख सौऊवै, सै आपी तुऔं कारिए ऐक उदारण दैय गौआ, ताकि तुऐं तैसीकै जैशणै चालै सौकौ।

²² पवित्र शास्त्र बौल़ौए, “मसीहे कौलोंई पाप ना कौरी। तैणै कौलोंई झूठु ना बुली, ऐकबेई बै नी।”

²³ जोबै लोगै यीशु कै बैज्जती कौरे, तौ तैणै पाछु मोड़ेयो तिनकै बैज्जती ना कौरी। जोबै लोगै तैसी दुख दिया, तौ तैणै तिनुवांदा बौदला लोणो कै कौचिश ना कौरी। पौरौ, तैणै आपणै मौदद कारिए पौरमेशवर पांदी भोरोशा कौरा। सै जाणौ थिया कै पौरमेशवर हमैशा न्याय कै तरीकै शै लोगौ का न्याय कौरदा।

²⁴ जोबै मसीह मौरा, तौ अमारै पापौ कै बौजैह शै क्रूस पांदी तैसकै शोरीर खै सौजा दै। तैणै ऐशै इथकारिए कौरौ ताकि आमु पाप कौरणा बंद कौरे दियु औरौ धरमी जीवन जिणा शुरु कौरे दियु औरौ तिनु जख्मौ कै बौजैह शै जू मसीहे झैलै, आमै आत्मा, प्राण औरौ शोरीर दै ठीक हौए गौवै।

²⁵ ऐक सौमय दै तुऐं तिनु भेड़ो कै जैशणै थिए जिनुऐ आपणै बाट बिसरै राए थै। पौरौ ऐबै तुऐं मसीह कै धोरे पाछु आए रौवै जू तोंवारै रोखवाल़ी कौरौ औरौ तुऔं पांदी नज़र राखौ।