1 पतरस 1 - सिरमौरी नौवाँ नियम

शुभकामनाएँ

¹ हांव पतरस, जू यीशु मसीह का चोणेयौंदा चैला औसौ, मोऐं ऐजी चिट्ठी लैखै लोए, मोऐं ऐजी चिट्ठी पौरमेशवर कै चोणेयौंदे तिनु लोगौ खै लैखै लोए जू कै पुन्‍तुस, गलातिया, कप्‍पदूकिया, एशिया, औरौ बितूनिया प्रदेशो कै कैई शहरो दै प्रदेशी कै जैशणै रौंव।

² अमारै पिता पौरमेशवरे तुऔं आपणै लोग हौणौ कारिए औरौ पवित्र आत्मा कै काम कारिए चोणे राए औरौ पवित्र आत्माए तुऔं जौई कौरे राए ताकि तुऐं यीशु मसीह कै आज्ञा मानैया कौरौ, औरौ इथकारिए यीशु आपणै लोऊ लैई तोंवारै साथै ऐक नोऐं कौरार बानदा जैशैकै मूसाए इस्राएली लोगौ पांदी लोऊ छिड़कै राए थियु जोबै पौरमेशवरे तिनकै साथै आपणी कौरार का सौमबंध बानै राए थिया। हांव प्रार्थना कौरु कै पौरमेशवर तुऔं अनुग्रह औरौ खूब शान्तै दैंव।

हौणौवाल़ी बातौ कै आशा

³ अमारै प्रभु यीशु मसीह कै पिता औरौ पौरमेशवर का धन्यवाद हौं, पौरमेशवरे अमारै खातिर आपणी बौड़ै दया शै आमु ऐक नौवाँ जीवन दैय राए। जिथुकै पौरमेशवरे यीशु मसीह खै मौरेयौंदे मुंजीदा जियुंदी कौरा, तैणै आमु बैजाए भोरोशे कै साथै जिणौ कै लायक बाणै राए; यानी कै तिनु चीज़ौ खै पाणौ कै पूरै उमीद कौरे सौकौ जू तैणै आमु दैणौ का वादा कौरे राए।

⁴ आमै तिनु महान आशीषौ खै पाणौ कारिए आगै कै ढौबौ दैखौ जू पौरमेशवर आपणै लोगौ कारिए राखै राए। तैणै सैजौ तोंवारै खातिर स्वर्ग दौ राखै राए, जिथै सै ना शौड़दौ, ना खराब हौंदौ, ना मिटदौ।

⁵ पौरमेशवर आपणै अनौखी शौकतै लैई तुऔं बौचायौ राखदा जिथुकै तुऐं यीशु मसीह पांदी भोरोशा राखौ। सै आखरी दूसौ तौड़ी जौल़ौ मसीह पाछु आला, तुऔं बौचायौ राखणा जारी राखदा। तोबै तुऐं जाणै पांदै कै पौरमेशवरे तुऔं पाप औरौ मौत शै पूरी तरह शै बौचाए राए।

⁶ तुऔं इनु सौबी चीज़ौ कै बारै मुंजी खुश हौणौ चैंई, चाहै इबी दैणिक सौमय कारिए कैई भान्त कै पौरैशानै तुऔं दुखी कौरौ।

⁷ इनु मुसीबतौ का मकसद ऐजा दिखाणा औसौ कै का तुऐं सौथीखै पौरमेशवर पांदी भोरोशा राखौ। यीशु मसीह पांदी तोंवारा बिशवाश सूनै दा बै जादा कीमती औसौ। जैशै नाश हौणौवाल़ै सूनै खै आगी मुंजी जांचो औरौ शुद्ध कौरौ, तैशैखैई जै तोंवारा बिशवाश कड़ी परीक्षाओं कै दवारा पौरखै जाणौ कै बाद बै मोजबूत रौंव, तौ तोंवारा बिशवाश तैसी दूसै तुऔं बैजाए खुशी औरौ महिमा औरौ आदर दियांदा जोबै यीशु मसीह औटेयौ पाछु आन्दा।

⁸ तुऐं यीशु खै कौलोंई ना दैखै रैई, पौरौ तोबै बै तुऐं तैसीआरी प्यार कौरौ। तुऐं तैसी इबी ना दैखौ, पौरौ तुऐं तैसी पांदी बिशवाश कौरौ। इथकारिए, तुऐं आनन्द औरौ महिमा शै बैजाए खुशी हौं जिथु शोब्दो लैई ब्यान ना कौरियौ।

⁹ जिथुकै पौरमेशवर तोंवारै आत्मा कै पाप कै सौजा शै बौचांदा औरौ ऐजा यीशु मसीह दा तोंवारै बिशवाश का मकसद औसौ।

नबियों कै गवाही

¹⁰ ऐजी मोक्ति ऐशणै थै जिथकै बारै मुंजी पौरमेशवर कै बातौ बौताणौवाल़ै हौजौ जादा जाणणौ चांव थिए। तिनुऐ बौतौऊं कै कैशै पौरमेशवर तुऔं बौचाणौ कारिए तोंवारै खातिर दयालु तरीको शै काम कौरदा जिथकै तुऐं लायक ना आथी। तिनुऐ जोवाब खै जूणौ कारिए सावधानी शै जांच कौरे औरौ शिखाणौ कै बैजाए कौचिश कौरे।

¹¹ मसीह का आत्मा पौरमेशवर कै बातौ बौताणौवाल़ै दा थिया, जू मसीह खै दुखो औरौ तिनु दुखो कै भैटणौ वाल़ी महिमा कै बारै मुंजी तिनु आगै शै बौतांव थिया, तिनुऐ ऐजौ जाणणौ कै कौचिश कौरे कै आत्माए तिनु का दिखाए लौ थियु, ऐजी सौबै बातौ कोलो हौंदी औरौ ऐजी कैशै पूरी हौंदी।

¹² पौरौ पौरमेशवरे इनु पौरमेशवर कै बातौ बौताणौवाल़ै खै बौतौऊं कै तिनकै सौंदेश सिरफ आपणै खातिर नी पौरौ तोंवारै खातिर थिए। सैजा सौंदेश यीशु मसीह कै बारै मुंजी सुसमाचार औसौ जू तुऐं इबी शौणै राए। पौरमेशवरे स्वर्ग पौरैशा आपणा पवित्र आत्मा भैजा कै तुऐं सुसमाचार प्रचार कौरणौ दै लोगौ कै मौदद कौरौ। ऐजौ सौबै ऐतरो अनौखौ औसौ कै इथै तौड़ी कै स्‍वर्गदूत बै बैजाए खुश हौयौ इनु चीज़ौ कै हौन्दै बैई दैखै लो।

पवित्र जीवन जिणौ कै बुलाहट

¹³ इथकारिए, जू किछै तुऐं सुंचौए तिथपांदी तुऔं काबू राखणा चैंई। औरौ ऐशै कौरेयौ आपणै जीवन दै पूरै तरह शै आपणै बिशवाश कै साथै चालौ। औरौ तियौं मोक्ति कै आशा राखैयौंदे राखौ जू पौरमेशवर अनुग्रह शै तुऔं तोबै दैंदा जोबै यीशु मसीह स्वर्ग पौरैशा आला।

¹⁴ पौरमेशवर कै आज्ञा कै मानैया कौरौ जिथुकै तुऐं तैसकै नानड़िया औसौ। तिनु बुरै कामौ खै ना कौरौ जिनु तुऐं तोलो कौरणौ कै इछा राखौ थिए, जौल़ौ तुऐं पौरमेशवर कै सौचाई खै ना जाणौ थिए।

¹⁵ पौरौ ऐबै तुऔं हर काम मुंजी जू तुऐं कौरौए पवित्र हौणौ चैंई, जैशैकै पौरमेशवर पवित्र औसौ जैणै तुऔं आपणै संतान हौणौ कारिए चोणे राए।

¹⁶ जिथुकै पवित्र शास्त्र दो ऐजौ लैखै राए, “तुऔं पवित्र हौणौ चैंई जिथुकै हांव पवित्र औसौ।”

¹⁷ पौरमेशवर जाणौए कै हरेक आदमीए का-का कौरे राए, औरौ सै सौबी आदमी का न्यांव बिना कोसी भैदभाव कै कौरौ। जोबै तुऐं पौरमेशवर शै प्रार्थना कौरौ तौ तैसी पिता बौल़ौ। इथकारिए जोबै कै तुऐं धोरती पांदी ऐक प्रदेशी हौयौ रौंव तौ तुऔं पौरमेशवर का डौर मानैयौ तैसका बैजाए आदर कौरणा चैंई।

^18-19 तुऐं जाणौए कै बीतै सौमय दै तुऐं ऐक बैकार तरीकै शै जिन्दगी बिताए लौए थै, ऐक ऐशणा तरीका जू तिनु लोगौ कै दवारा तुऔं दैय राए जू तुऔं दै आगै रौंव थिए। पौरौ तुऔं तिथु बैकार जिन्दगी शै बौचाए पाए। तुऔंखै सूनु-चांदी जैशणी नाश हौणौवाल़ी चीज़ौ लैई ना खोरीदै रैई, पौरौ मसीह कै कीमती लोऊ लैई, जू ऐक शुध्द औरौ सिध्द मेम्ने कै जैशणा थिया।

²⁰ इयौं दुनिया कै बाणणौ दै आगै, पौरमेशवरे ऐजौ साबित कौरे दियु थियु कै यीशु मसीह छुड़ाणौवाल़ा हौंदा। पौरौ सै तोंवारै मौदद कौरणौ कारिए इनु आखरी दूसौ दा इयौं दुनिया दा ओऊवा।

²¹ जू किछै बै मसीहे कौरे राए तिथकै बौजैह शै तुऐं ऐबै पौरमेशवर पांदी बिशवाश कौरौ। औरौ तुऐं आपणा बिशवाश औरौ आशा पौरमेशवर पांदी राखै राए जिथुकै तैणै मसीह खै मौरेयौंदे मुंजीदा जियुंदी कौरा औरौ तैसी बैजाए महिमा दैय।

²² तुऔं तोंवारै पापौ शै शुध्द कौरे राए ऐबै तुऔं आपणै साथी बिशवाशी शै खराई कै साथै प्यार कौरणा चैंई। औरौ ऐकी दुजैआरी जादा शै जादा औरौ पूरै मन शै प्यार कौरणा जारी राखौ।

²³ तुऔं ऐकी दुजैआरी प्यार कौरणा चैंई जिथुकै तुऔं पौरमेशवर कै ढौबौशा ऐक नौवाँ जीवन भैटी रौआ। तुऔं खै ऐजा जीवन कोसी ऐशणी चीज़ौ लैई ना भैटी रैई, जू नाश हौए जांदी पौरौ किछै ऐशणी चीज़ौ लैई भैटी रौआ जू हमैशा रौंदी। मतलब, आमु ऐजा नौवाँ जीवन पौरमेशवर कै जियुंदी औरौ सौदा कै वचन शै भैटी रौआ।

²⁴ पवित्र शास्त्र ऐजौ बौल़ौ कै, “सौबै लोग घास कै जैशणै औसौ औरौ तिनकै सुन्दरता जोंगली फूलो कै जैशणै औसौ। घास शुकै जांव औरौ फोल़ जोमीनो पांदी झोड़ै जांव।

²⁵ पौरौ पौरमेशवर का वचन हमैशा बौणेयौंदा रौंदा।” ऐजा वचन सुसमाचार औसौ जू तुऔं मुंजी प्रचार कौरे राए थिया।