1 यूहन्ना 5 - सिरमौरी नौवाँ नियमदुनिया पांदी जीत हासिल कौरणी 1 जैसका ऐजा बिशवाश औसौ कै यीशु ही मसीह, औरौ पौरमेशवर कै ओलाद औसौ, औरौ जू कुणिए पिता पौरमेशवर शै प्यार राखौ, सै तैसीआरी बै प्यार राखौ जू तैसकै ओलाद औसौ। 2 जोबै आमै पौरमेशवर आरी प्यार राखु औरौ तैसकी आज्ञाओं खै मानु, तौ इथी लैई आमै जाणै पांव कै आमु पौरमेशवर कै सौब ओलाद आरी प्यार राखु। 3 पौरमेशवर आरी प्यार कौरणौ का मतलब ऐजा औसौ कै आमु तैसकी आज्ञाओं खै मानु, औरौ तैसकी आज्ञाओं का पालन कौरणा चैईथा ना आथी। 4 जिथुकै जू कुणिए पौरमेशवर कै संतान औसौ, सै दुनिया पांदी जय पांव, सैजी जय जू दुनिया खै हराए दैंव सैजा अमारा बिशवाश ही औसौ। 5 दुनिया पांदी जय पाणौ वाल़ा कुण औसौ? सिरफ सैजा जैसका ऐजा बिशवाश औसौ, कै यीशु ही पौरमेशवर का बैटा औसौ। मसीह कै बारै दी गवाही 6 ऐजा यीशु मसीह औसौ जैसी इयौं दुनिया दा पौरमेशवरे भैजै राए, औरौ यूहन्नाए बपतिस्मा दाताए तैसीकै पाणी मुंजी बपतिस्मा दिया, औरौ बाद मै सै लोऊ बौवायौ मौरे गौआ। सै ना सिरफ बपतिस्मा लोन्दा ओऊवा, पौरौ आपणा लोऊ बौवायौ क्रूस पांदी मौरणौ कारिए बै ओऊवा। पवित्र आत्मा बौतांव कै यीशु मसीह पौरमेशवर कै ढौबौशा आए रौआ थिया औरौ जू पवित्र आत्मा बौतांव सैजौ हमैशा साचौ औसौ। 7 औरौ गवाही दैणैवाल़ै तीन औसौ; 8 पौरमेशवर कै आत्मा, पाणी का बपतिस्मा, औरौ लोऊ; औरौ ऐजै तीनै ऐकी बातौ पांदी राजी औसौ। 9 जोबै आमै आदमी कै गवाही मानै पांव, तौ पौरमेशवर कै गवाही तौ तैसदै बै बौढ़ेयौ औसौ, औरौ पौरमेशवर कै गवाही ऐजी औसौ कै तैणै आपणै बैटै कै बारै मुंजी गवाही दै राए। 10 जू पौरमेशवर कै बैटै पांदी बिशवाश कौरौए सै आपणै भीतरै गवाही राखौए; पौरौ जैणै पौरमेशवर पांदी बिशवाश ना कौरी तैणै पौरमेशवर कै झूठा बाणै राए; जिथुकै तैणै तियौं गवाही पांदी बिशवाश ना कौरी जू पौरमेशवरे आपणै बैटै कै बारै मुंजी दैय राए। सौदा कै जिन्दगी 11 औरौ सैजी गवाही ऐजी औसौ कै पौरमेशवरे आमु सौदा कै जिन्दगी दैय राए, औरौ ऐजी सौदा कै जिन्दगी आमु तैसकै बैटै कै दवारा भैटी रौए। 12 जू पौरमेशवर कै बैटै कै साथै बौणेयौंदा रौंव तैसकैई सौदा कै जिन्दगी औसौ, औरौ जू पौरमेशवर कै बैटै कै साथै बौणेयौंदा ना रौंव तैसीकैईं सौदा कै जिन्दगी बै ना आथी। 13 मोऐं तुऔं ऐजै चिट्ठी इथकारिए लैखै लौए कै तुऐं पौरमेशवर कै बैटै कै औधिकार पांदी बिशवाश कौरौ, ताकि तुऐं ऐजौ जाणै पांव कै सौदा कै जिन्दगी तोंवारै औसौ। असरदार प्रार्थना 14 आमु पौरमेशवर कै सामणै जू हिम्मत हौंव, सै ऐजी औसौ, कै जै आमु तैसकै इछा कै हिसाब शै मांगुए, तौ सै अमारी शुणौए। 15 औरौ जोबै आमै जाणुए कै जू किछै आमै पौरमेशवर कैईंदु मांगुए सै अमारै शुणौए, तौ ऐजौ बै जाणुए कै जू किछै आमुए तैसी कैईंदु मांगुए, सै आमु दैंदा। 16 जै कुणिए आदमी आपणै बिशवाशी भाईटु खै ऐशणा पाप कौरदै बैई दैखौ जिथका नतीजा मौत ना हौंव, तैसी कारिए प्रार्थना कौरौ, औरौ पौरमेशवर तैसी आदमी खै जिन्दगी दैंदा। पौरौ जैसी कोसी आदमीए ऐशणा पाप कौरे राला जिथका नतीजा मौत हौंव तौ हांव तैसकै बारै मुंजी तुऔं प्रार्थना कौरणौ कारिए ना बुलू। 17 सौबै भान्त का अधरम तौ पाप औसौ, पौरौ ऐशणा पाप बै औसौ जिथका नतीजा मौत ना आथी। सौबी बातौ का निचोड़ 18 आमै जाणुए कै जू कुणिए पौरमेशवर कै संतान औसौ सै लगातार पाप ना कौरौ; पौरौ जू पौरमेशवर कै संतान औसौ, तैसीखै सै बौचाएयौ राखौ: औरौ तैसीखै दुष्ट शैतान छोए बै ना सौकौ। 19 आमै जाणुए, कै आमै पौरमेशवर शै औसौ, औरौ सारै दुनिया तैसी दुष्ट शैतान कै वश दै पौड़ेयौंदे औसौ। 20 आमै ऐजौ बै जाणुए कै यीशु मसीह पौरमेशवर का बैटा इयौं दुनिया पांदी आए रौआ औरौ तैणै आमुखै सौमझ दैय राए कै आमै तैसी साची पौरमेशवर कै पौछेयाणु। जिथुकै आमै साची पौरमेशवर कै साथै औरौ तैसकै बैटै यीशु मसीह कै साथै बौणैयौंदे रौंव। यीशु मसीह ही साचा पौरमेशवर औरौ सौदा कै जिन्दगी औसौ। 21 ओए रै नानड़िया, आपी कै ऐशणी बातो औरौ चीज़ौ शै दूर राखौ जू तोंवारै दिल दै पौरमेशवर कै जौगैह लौए सौकौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation