1 यूहन्ना 3 - सिरमौरी नौवाँ नियम1 सुंचौ, पिता पौरमेशवरे आमुआरी कैतरा प्यार कौरे राए कै आमु पौरमेशवर कै ओलाद बुली जांव, औरौ सौथी कै आमै तैसकै संतान औसौ बै। दुनिया कै लोग इयौं बातौ खै ना जाणौ जिथुकै सै पिता पौरमेशवर कै बै ना जाणौए। 2 ओए रै प्यारो, ऐबै आमु पौरमेशवर कै ओलाद औसौ, औरौ इबी तौड़ी ऐजौ प्रगट ना हौए रैई कै आमु का बौणदै। आमु ऐतरो जाणु कै जोबै यीशु मसीह प्रगट हौला तौ आमै तैसकै जैशणै हौंदै जिथुकै आमै तैसीखै तैशणाई दैखदै जैशणा सै औसौ। 3 औरौ जू कुणिए मसीह पांदी आशा राखौ, सै आपणै आपी खै तैशैखैई पवित्र कौरौ जैशैखै सै पवित्र औसौ। पाप औरौ पौरमेशवर की सन्तान 4 जू कुणिए आदमी लगातार पाप कौरौए, सै पौरमेशवर कै कानून खै मानणौ शै मौना कौरौ, औरौ पाप कौरणा कानून कै मानणौ शै मोना कौरणा औसौ। 5 तुऐं जाणौए कै यीशु मसीह इथकारिए ओऊवा कै पापौ कै मिटाए दैंव, औरौ तैसीदा कुणजाई पाप ना आथी। 6 जू कुणिए तेसिदा बौणेयौंदा रौंव, सै लगातार पाप ना कौरदा रौंव जू कुणिए पाप कौरौए, सै ना तौ मसीह खै सौमझौ औरौ ना तैसीखै जाणौए। 7 ओए रै नानड़िया, कोसी खै धौखा दै नी आया; जू कुणिए आदमी धार्मिकता कै काम कौरौए, सैजाई मसीह कै जैशणा धरमी औसौ। 8 जू कुणिए आदमी लगातार पाप कौरदा रौंव सै शैतान कै ढौबौशा औसौ, जिथुकै शैतान शुरु ही सै पाप कौरदा आए रौआ। पौरमेशवर का बैटा इथकारिए ओऊवा कै शैतान कै कामौ खै नाश कौरौ। 9 जू कुणिए आदमी पौरमेशवर कै संतान औसौ सै लगातार पाप ना कौरौ; जिथुकै पौरमेशवर का स्वभाव तैसदा बौणेयौंदा रौंव औरौ सै पाप कौरे ही ना सौकौ जिथुकै सै पौरमेशवर कै संतान औसौ। 10 इनु बातौ लैई पौता चालौ पौरमेशवर कै सन्तान औरौ शैतान कै सन्तान कुण औसौ; जूणजै लोग धार्मिकता कै काम कौरौ सै पौरमेशवर कै ढौबौशै औसौ, औरौ जू आपणै भाईटु आरी प्यार कौरौ सैजैई पौरमेशवर कै ढौबौशै औसौ। आपी मुंजी प्यार शै रौव 11 जू समाचार तुऐं शुरु शै शौणै राए, सै ऐजा औसौ कै आमु ऐकी दुजैआरी प्यार कौरणा चैंई। 12 आदम कै बैटै कैन कै जैशणै ना बौणौ जू तैसी दुष्ट शैतान शै थिया, औरौ जैणै आपणै भाई खै मारै दिया। तैणै आपणै भाई कै कियों बौजैह शै मारै दिया? जिथुकै तैसकै काम बुरै थिए, औरौ तैसकै भाई कै काम धार्मिकता कै थिए। 13 ओए रै बिशवाशी भाईटु, जै दुनिया कै लोग तुऔंआरी बैर राखौ तौ हैरान ना हौया। 14 आमै जाणुए कै आमै मौत कै शौकतै शै आज़ाद हौए गौवै, औरौ ऐबै आमुकैंई पौरमेशवर कै ढौबौशै सौदा कै जिन्दगी औसौ; जिथुकै आमु भाईटु आरी प्यार राखु। जू प्यार ना कौरौ सै मौत कै औधिकार दा रौंव। 15 जू कुणिए आदमी आपणै बिशवाशी भाईआरी बैर कौरौ, सै हथियारा औसौ; औरौ तुऐं जाणौए कै कोसी हथयारै दै सौदा कै जिन्दगी ना रौंव। 16 आमुए प्यार इथलैई जाणा कै यीशु मसीहे आमु कारिए आपणै प्राण दैय दियै, इथकारिए आमु बै भाईटु कारिए प्राण दैणै चैंई। 17 पौरौ जैसी कोसी कैई दुनिया कै धन दौलत हौंव औरौ सै आपणै बिशवाशी भाई कै गरीबी दै दैखैयो तैसी पांदी तरस खाणा ना चांव, तौ तेसिदा पौरमेशवर का प्यार ना हौए सौकौ। 18 ओए रै प्यारे नानड़िया, तुऔं साची मौदद कौरेयौ ओकीआरी आपणा प्यार दिखाणा चैंई ना कै सिरफ प्यार कै बारै मुंजी बातौ कौरणी चैंई। पौरमेशवर कै सामणै हिम्मत 19-20 जोबै आमु ऐकी दुजैआरी प्यार कौरु तौ इथी लैई आमै जाणुए कै आमु सौचाई कै औसौ; औरौ जैसी बातौ दा अमारा मन आमु दोषी ठोहरांव, तियौं बातौ कै बारै मुंजी आमै आपणै मनो कै तैसकी मौजूदगी दै चोयन दिलाए सौकु। जिथुकै पौरमेशवर अमारै मनो शै बौड़ा औसौ औरौ सै सौबै ठुँ जाणौए। 21 ओए रै प्यारो, जै अमारा मन आमु दोषी ना ठोहरांव, तौ आमु पौरमेशवर कै सामणै हिम्मत हौंव। 22 औरौ जू किछै आमै पौरमेशवर शै मांगुए, सैजौ आमु तैसी कैईंदु भैटौए; जिथुकै आमै पौरमेशवर की आज्ञाओं खै मानुए; औरौ जू पौरमेशवर कै भाँवए आमै सैजौई कौरु। 23 औरौ तैसकै आज्ञा ऐजी औसौ कै आमै तैसकै बैटै यीशु मसीह कै नांव पांदी बिशवाश कौरो, औरौ जैशै मसीहे आमु आज्ञा दैय राए तिथकै हिसाब शै आपी मुंजी प्यार राखौ। 24 औरौ जू पौरमेशवर कै आज्ञा खै मानौए, सै तैसकै साथै औरौ पौरमेशवर तैसकै साथै बौणेयौंदा रौंव औरौ पवित्र आत्मा लैई जू तैणै आमु दैय राए, आमै जाणुए कै पौरमेशवर अमारै साथै बौणेयौंदा रौंव। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation