1 यूहन्ना 2 - सिरमौरी नौवाँ नियमयीशु मसीह अमारा मौददगार 1 मैरै प्यारे नानड़िया, मोऐं ऐजी बातौ तुऔं इथकारिए लैखै लोई कै तुऐं पाप ना कौरौ। जै कुणिए पाप कौरौ, तौ पिता पौरमेशवर कै धोरे अमारा ऐक सहायक औसौ, सैजा यीशु मसीह औसौ जू अमारै पापौ कै माफी कारिए प्रार्थना कौरौ, औरौ सै धरमी औसौ। 2 सैजाई अमारै पापौ खै माफ कौरणौ कारिए बलिदान हौए गौआ औरौ सिरफ आमु कारिए ही नी पौरौ सारै दुनिया कै लोगौ खै पापौ कै माफी कारिए बलिदान हौए गौआ। पौरमेशवर कै आज्ञाए 3 जै आमु पौरमेशवर कै आज्ञाओं खै मानुए, तौ तेसीयांदा ही आमु पौता चालदा कै आमु तैसीखै जाणुए। 4 जू कुणिए आदमी ऐजौ बौल़ौ, “हांव तैसीखै जाणै गौआ,” पौरौ तैसकी आज्ञाओं खै ना मानौ, सै झूठा औसौ; औरौ सै पौरमेशवर कै साची सौंदेश कै हिसाब शै ना जियौं। 5 पौरौ जू कुणिए पौरमेशवर कै वचन खै मानौए, तैसदा साची पौरमेशवर का प्यार सिध्द हौए रौआ। ऐशैखै ही आमु पौता चालौ कै आमै पौरमेशवर कै साथै बौणैयौंदे रौंव। 6 जू कुणिए ऐजौ बौल़ौ कै हांव पौरमेशवर कै साथै बौणेयौंदा औसौ तौ सै आपी बै तैशैखै ही जियौं जैशै यीशु मसीह जियौं थिया। सौबीआरी प्यार कौरौ 7 ओए रै प्यारो, मोऐं तुऔं खै कुणजै नोऐं आज्ञा ना लैखै लैई, पौरौ सैजी पुराणी आज्ञा जू शुरु सै तुऔं भैट रौए; जिथु तुऐं शौणै राए जोबै तुऐं मसीह पांदी बिशवाश कौरा। 8 तोबै बै जू आज्ञा हांव तुऔं खै लिखुए सैजै नोऐं आज्ञा औसौ, जिथुकै जियौं सौचाई दा यीशु खुद जिया औरौ तुऐं बै इथी मुंजी जी रौवै। जिथुकै बुरै काम मिटदै जांदै लागै रौवै औरौ सौचाई को पेयाशो ऐबै बै चौमकै रौव। 9 जू कुणिए ऐजौ बौल़ौ कै हांव पेयाशै दा जी रौआ पौरौ आपणै बिशवाशी भाईटु शै बोयर राखौ, सै इबी तौड़ी बुराई मुंजी ही जी रौआ। 10 पौरौ जू कुणिए आपणै बिशवाशी भाईटु आरी प्यार राखौ सै पेयाशै दा जी रौआ, औरौ इथकारिए तैसदौ ऐशणौ किछै बै ना आथी जू ओकी कै पाप माफ कौरणौ कै बौजैह बौणौ। 11 पौरौ जू कुणिए आपणै बिशवाशी भाईटु आरी बोयर राखौ सै बुराई दा जी रौआ औरौ ना जाणौ कै कुकै जांदा लागै रौआ, जिथुकै बुराईए तैसीखै आन्धा कौरे दिया। चिट्ठी लिखणौ कै बौजैह 12 ओए रै नानड़िया, हांव तुऔं इथकारिए लिखु कै यीशु मसीह कै नांव शै तोंवारै पाप माफ हौए रौवै। 13 ओए रै पिताओं, मोऐं तुऔं इथकारिए लैखै लो जिथुकै तुऐं मसीह खै जाणौए, जू शुरु शै औसौ। औरौ तुऐं तैसीखै जाणौए। ओए रै जवानो, हांव तुऔं इथकारिए लिखु कै तुऐं तैसी दुष्ट शैतान पांदी जय पाए राए। ओए रै नानड़िया, मोऐं तुऔं इथकारिए लैखै लो कै तुऐं पिता पौरमेशवर कै जाणै पाया। 14 ओए रै पिताओं, मोऐं तुऔं इथकारिए लैखै लो कै जू दुनिया कै शुरुआत शै औसौ तुऐं तैसीखै जाणौ। ओए रै जवानो, मोऐं तुऔं इथकारिए लैखै लो, कै तुऐं ताकतवर हौए जांव, औरौ पौरमेशवर का वचन तुऔं दा बौणेयौंदा रौंव, औरौ तुऐं तैसी दुष्ट शैतान पांदी जय पाए राए। दुनिया कै बारै दै चैतावणी 15 तुऐं दुनिया शै औरौ दुनिया की चीज़ौ आरी प्यार ना राखौ। जै कुणिए दुनिया आरी प्यार कौरौ, तौ तेसिदा पिता पौरमेशवर का प्यार ना आथी। 16 जिथुकै जू किछै दुनिया मुंजी औसौ, यानी शोरीर कै पापी अभिलाषा औरौ आखी की इछा औरौ धन दौलत का घमण्ड, ऐजौ पिता पौरमेशवर कै ढौबौशौ ना आथी पौरौ दुनिया कै ही ढौबौशौ औसौ। 17 दुनिया औरौ तिथकी इछाएं दुईनै नाश हौंदी लागै रोई, पौरौ जू पौरमेशवर कै इछा कै हिसाब शै जियौंए सै सौदा बौणेयौंदा रौंदा। आखरी सौमय कै धौखै 18 ओए रै नानड़िया, ऐजा आखरी सौमय औसौ जोबै मसीह औटेयौ पाछु आन्दा, औरौ जैशैखै तुऐं शौणै राए कै मसीह कै दुशमन आए गौवै, औरौ तैसकै हिसाब शै ऐबै बै बौहितै मसीह कै दुशमन ऊबै बिजै रौवै; इथलैई आमै जाणुए कै ऐजा आखरी सौमय औसौ। 19 सैजै लोग जू मसीह कै दुशमन औसौ अमारा साथ छोड़ेयौ हौटै गौवै जिथुकै सै अमारै आपणै ना थी, जै सै अमारै आपणै हौंदै, तौ सै अमारै साथै ही रौंदै पौरौ सै हौटै गौवै, जिथलैई ऐजा पौता लागै गौआ कै तिनुमुंजी दै कुणिए बै अमारै आपणै ना आथी। 20 पौरौ तुऔं तौ मसीह कै दवारा पवित्र आत्मा दैय राए, औरौ तुऐं सौबै साची शिक्षा जाणौए। 21 मोऐं तुऔं इथकारिए ना लैखै रैई कै तुऐं सौचाई कै ना जाणौ, पौरौ इथकारिए कै तुऐं साची शिक्षा कै जाणौए, औरौ ऐजौ बै जाणौए कै जू किछै झूठ औसौ, सैजौ सौचाई कै ढौबौशौ ना आथी। 22 झूठा कुण औसौ? सैजा, जू यीशु कै मसीह हौणौ कै मौना कौरौ; औरौ मसीह का दुशमन सैजाई औसौ जू पिता पौरमेशवर औरौ बैटै कै मौना कौरौ। 23 जू कुणिए पौरमेशवर कै बैटै कै मौना कौरौ तैसीकैईं पिता पौरमेशवर बै ना आथी, जू बैटै खै मानै पांव, तैसीकैईं पिता पौरमेशवर बै औसौए। 24 जू साचा सौंदेश तुऐं तोबै शुणा जोबै तुऐं मसीह पांदी बिशवाश कौरे राए थिया, सैजाई तुऔं दा बौणेयौंदा रौंव; औरौ जै सैजा सौंदेश तुऔं दा बौणेयौंदा रौंव तौ तुऐं बै बैटै दै औरौ पिता पौरमेशवर दै बौणैयौंदे रौलै। सौदा कै जिन्दगी का वादा 25 औरौ पौरमेशवरे आमुआरी वादा कौरे राए कै सै आमु सौदा कै जिन्दगी दैंदा। 26 मोऐं तुऔं तिनु लोगौ कै बारै मुंजी चैतावणी दैय लौए जिनुऐ झूठी शिक्षा कै दवारा तुऔं धौखा दैणौ कै कौचिश कौरे लौए। 27 औरौ तुऔं मसीह कै ढौबौशा पवित्र आत्मा दैय राए औरौ सै तोंवारै भीतरै रौंव; इथकारिए तुऔं शिखाणौ कारिए कोसी कै जौरुरी ना आथी यानी पवित्र आत्मा तुऔं तिनु बातौ कै बारै मुंजी सारै सौचाई कै जाणणौ दै मौदद कौरदा। औरौ जू किछै पवित्र आत्मा तुऔं शिखांव सै साची बातौ औसौ झूठी ना आथी, इथकारिए जैशै कै पवित्र आत्मा तुऔं कै कौरणौ खै बौल़ौए तैशै कै ही मसीह कै साथै एकता दै बौणैयौंदे रौव। पौरमेशवर कै ओलाद 28 ओए रै नानड़िया, मसीह कै साथै बौणैयौंदे रौव कै जोबै सै औटेयौ प्रगट हौंव तौ आमु हौंसला भैटौ, औरौ आमै तैसकै आणौ पांदी तैसकै सामणै बैज्जत ना हौंव। 29 जिथुकै तुऐं जाणौए, कै मसीह धरमी औसौ, तौ ऐजौ बै जाणौ कै जू कुणिए धार्मिकता का काम कौरौए सै पौरमेशवर कै संतान औसौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation