1 यूहन्ना 1 - सिरमौरी नौवाँ नियमजीवन कै वचन कै घोषणा 1 आमै तुऔं खै ऐकी आदमी कै बारै मुंजी लैख लौ जू जीवन का वचन औसौ। सैजाई सोंईसारी कै शुरुआत शै थिया, जैसीखै आमुए शुणा औरौ जैसी आमुए आपणी आखी लैई दैखा, यानी जैसीखै आमुए ध्यान शै दैखा औरौ हाथौ लैई छुवा। 2 जू जीवन दैंव सै ऐसी दुनिया दा दैखिया, औरौ तुऔं बौतांवे कै ऐजा सैजाई औसौ जू सौदा कै जिन्दगी औसौ। सै पिता पौरमेशवर कै साथै थिया, औरौ जैसी पौरमेशवरे आमु दिखोऊवा। 3 आमुए यीशु मसीह कै बारै मुंजी जू किछै दैखी औरौ शौणै राए, तिथकै गवाही तुऔं कै बै दियुंए इथकारिए कै अमारै साथै तोंवारै बै संगति हौंव; औरौ अमारै संगति पिता पौरमेशवर औरौ तैसकै बैटै कै साथै बै हौंव। 4 औरौ ऐजी बातौ आमै इथकारिए लैखै लोई कै अमारै खुशी पोरे हौए जांव। पौरमेशवर कै साथै शामिल हौणौ 5 जू सुसमाचार आमुए यीशु कैईंदा शुणा औरौ ऐबै तुऔं खै बै शुणौऊं, सै ऐजा औसौ; कै पौरमेशवर पेयाशै कै जैशणा आछा औसौ औरौ तैसिदो ऐशणौ किछै बै ना आथी जू बुरु औसौ। 6 जै आमै बुलू कै पौरमेशवर कै साथै आमै शामिल औसौ पौरौ तोबै बै जू बुरै काम औसौ सैजैई कौरु तौ आमै झूठु बुलू औरौ सौचाई कै साथै ना जियुं। 7 पौरौ जै आमै सैजौई कौरु जू सोही औसौ जैशैखै पौरमेशवर सिध्द औसौ औरौ पेयाशै कै जैशणा औसौ, तैशैखैई अमारा बर्ताव बै पेयाशै कै जैशणा सोही हौंव, तौ आमु ऐकी दूजै कै साथै रोऊं, औरौ तैसकै बैटै यीशु मसीह का लोऊ आमु सौबी पापौ शै शुध्द कौरौ। 8 जै आमै बुलूए कै आमुए किछै बै पाप ना कौरी, तौ आपी खै धौखा दियु, औरौ आमु तियौं सौचाई पांदी बिशवाश ना कौरु जू पौरमेशवर बौल़ौए कै साचौ औसौ। 9 पौरमेशवर बिशवाश लायक औरौ धरमी औसौ, इथकारिए जोबै आमै वफादार औसौ। औरौ जै आमै आपणै पापौ खै तैसकै सामणै मानै पोऊँ, तौ सै अमारै पापौ खै माफ कौरौ, औरौ आमु सौबै भान्त कै बुरै कामौ शै शुध्द कौरौ। 10 जै आमै बुलूए कै आमै पाप ना कौरु, तौ आमै पौरमेशवर खै झूठा बाणौ, औरौ जू वचन सै बौल़ौए तैसीखै ना तौ सौमझौ औरौ ना मानौ। |
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
Beyond Translation